Аб неабходнасці прыняцця Закона «Аб народным апалчэнні» прадстаўнікам масмедыя расказаў міністр абароны Віктар Хрэнін. Гэта, па яго словах, абумоўлена двума фактарамі. «Перш за ўсё, гэта стварэнне дадатковых умоў для падтрымання правапарадку ў перыяд ваеннага становішча на тэрыторыях, якія ў найменшай ступені будуць ахоплены органамі ўнутраных спраў і войскамі, — патлумачыў кіраўнік абароннага ведамства. — А гэта найперш нашы сельскія населеныя пункты, асобныя раённыя гарады. Другі фактар — гэта даць нашым грамадзянам, якія не будуць ахоплены мабілізацыйнымі мерапрыемствамі, магчымасць удзельнічаць у абароне краіны».
У законапраекце прадугледжана, што склад, колькасць, задачы народнага апалчэння будуць вызначаць органы мясцовай улады. «Аднак асноўнай задачай для народнага апалчэння застаецца абарона перш за ўсё свайго дома, сваёй маёмасці і выкананне мерапрыемстваў па забеспячэнні правапарадку сумесна з міліцыяй», — падкрэсліў міністр абароны.
Згодна з дакументам, добраахвотнікі, якія ўступілі ў шэрагі народнага апалчэння, будуць размяшчацца па месцы жыхарства і выконваць свае працоўныя функцыі. У наймальніка будзе права вызваляць гэтых грамадзян ад працы з захаваннем заработнай платы і працоўнага месца. Прадугледжана, што на добраахвотнікаў будуць распаўсюджвацца і сацыяльныя гарантыі: тыя, якія распаўсюджваюцца на вайскоўцаў па мабілізацыі.
Міністр абароны расказаў, што восенню 2022 года ў нашай краіне быў праведзены эксперымент па арганізацыі народнага апалчэння. Ён прайшоў на базе Лабжанскага сельскага савета Клімавіцкага раёна Магілёўскай вобласці. «Людзі адгукнуліся, жадаючыя прыняць удзел у народным апалчэнні прыйшлі, — заўважыў Віктар Хрэнін. — Мы з імі правялі адпаведныя заняткі і зразумелі, што ў нашых людзей ёсць такая патрэба — мець сваё дачыненне да забеспячэння абароны нашай дзяржавы. У цэлым, лічу, што народнае апалчэнне, якое мы ствараем, дапоўніць і павысіць магчымасці той жа тэрытарыяльнай абароны і палепшыць якасць выканання задач па забеспячэнні абароны нашай краіны».
Склад народнага апалчэння, усе спісы будуць вызначаны ўжо цяпер, у мірны час. Для таго, каб у выпадку ўзнікнення пагрозы гэтыя пытанні не прыйшлося вырашаць імгненна. «Хутка і імгненна нічога не атрымліваецца і не ствараецца, — адзначыў Віктар Хрэнін. — Кантрольныя, праверачныя мерапрыемствы, якія мы праводзім як з Узброенымі Сіламі, так і з тэрытарыяльнай абаронай, мы будзем праводзіць у тым ліку і з народным апалчэннем. Кожны павінен умець валодаць зброяй і абараняць свой дом. Гэтая сутнасць і закладваецца ў стварэнне народнага апалчэння».
Міністр абароны адзначыў дастатковую колькасць мабілізацыйнага рэсурсу. Пры гэтым, па разліках вайскоўцаў, колькасць народнага апалчэння можа скласці 100 — 150 тысяч чалавек. Аднак кіраўнік ваеннага ведамства не выключае, што добраахвотнікаў можа быць і больш. Для добраахвотнікаў прадугледжаны курсы падрыхтоўкі. Вайскоўцы ў кароткі прамежак часу здольныя навучыць людзей. Прычым як пры стварэнні народнага апалчэння, так і да яго стварэння ў мірны час.
Вераніка КАНЮТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
