На мінулым тыдні мы распавядалі пра вёску Касарычы ў Глускім раёне. У прыватнасці, пра выкуплены і адрэстаўраваны Андрэем Уфімцавым мясцовы клуб, у якім месяц таму пад цяжарам снегу абваліўся дах. Аднаўляць яго ўзімку той яшчэ квэст. Але мясцовыя жыхары замет таго, каб сумаваць і апускаць рукі, крэатывяць.
— У культурным цэнтры вёскі «Макар-клубе» на гэты год запланавана шмат цікавых бясплатных мерапрыемстваў для вяскоўцаў і іх гасцей, у тым ліку другі плёначны кінафестываль, — кажа Андрэй. — Каб іх правесці, трэба аператыўна паставіць дах на месца. На аднаўленне яго патрэбна сума ў памеры каля 11 тысяч долараў. Частку мы ўжо сабралі пры дапамозе неабыякавых людзей, і аплацілі будматэрыялы. Для таго, каб знайсці астатнюю суму прыдумалі калекцыю NFT-карцін.
Яна называецца «Як у Макара паехаў дах» і ўключае 10 сюжэтаў коштам ад 20 да 11 тысяч долараў у эквіваленце. Кожная выява абыгрывае нейкую мясцовую ідыёму, у прыватнасці: «з дубу рухнуць», «з Луны зваліцца», «сесці на каня», «маку аб’есціся», «несці пургу»...
— Мы стварылі NFT пры дапамозе штучнага інтэлекту з выкарыстаннем архіўных фотаздымкаў Макара Лаўрыновіча — майго прадзеда і паважанага мясцовага жыхара, які пражыў у вёсцы 100 год. У гонар яго і названы вясковы культурны цэнтр. Усе грошы ад продажу карцін пойдуць на рамонт даху ў «Макар-клубе», — паведаміў Андрэй.
Першыя вынікі ўжо ёсць — куплена адна карцінка. Касарычане спадзяюцца, што гэта толькі пачатак. Разам з тым, дзякуючы крэатыўнасці вяскоўцаў пра «Макар-клуб» цяпер ведае значна больш людзей. Некаторыя з іх працягваюць дапамагаць больш звыклым спосабам, пераводзячы грошы на картку. Ёсць ахвотныя прынесці карысць і рукамі. Дарэчы, на гэтым тыдні валанцёрская дапамога ў Касарычах будзе не лішняй. Усіх валанцёраў мясцовыя жыхары абяцаюць накарміць і прадставіць дах над галавой.
Даведка
«Макар-клуб» — культурны цэнтр Касарычаў, важнае месца памяці і сустрэч старажылаў вёскі. На больш як 200 кв. м. размясціліся прасторная грамадская гасцінная, каворкінг, сучасная бібліятэка, буккросінг, кіна-канцэртна-выставачная зала, першы ў Беларусі Музей індзейца, а таксама гістарычны музей з ткацкім станком, маляванкамі і архіўнымі фотаздымкамі вяскоўцаў. За год працы ў цэнтры прайшоў фестываль плёначнага кіно, творчы летнік для дарослых, майстар-класы для дзяцей, а таксама грамадскія абмеркаванні з мясцовымі жыхарамі наконт далейшага развіцця вёскі. Дзверы «Макар-клуба» адкрытыя для любых творчых культурных праектаў.
Надзея ДРЫНДРОЖЫК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
