Сакрэты поспеху Ірыны Дарафеевай, вынікі літконкурсу і карона для мамы.

Самае цікавае — у свежым нумары часопіса «Алеся».

«Поспех я атаясняю са штодзённай працай і яе вынікам»

Так лічыць заслужаная артыстка Беларусі Ірына Дарафеева — спявачка, актрыса, педагог, у кожным са сваіх амплуа паспяховая і запатрабаваная. 

У інтэрв’ю «Алесі» Ірына Дарафеева расказала пра свае планы ў 2023-м годзе — юбілейным у яе творчай біяграфіі, пра новыя музычныя праекты.

— Хочацца адзначыць свой творчы юбілей ярка, каб гэта стала заўважнай падзеяй у культурным жыцці краіны, падарункам для майго гледача. Спадзяюся, што гэта адбудзецца ў Віцебску на фестывалі «Славянскі базар» на сцэне Летняга амфітэатра, — адзначыла спявачка.

З гутаркі вы таксама даведаецеся, хто і што натхняе Ірыну Дарафееву, сагравае яе сэрца, калі гаснуць сафіты. 

«Ты — песня, што з самага сэрца»

Падведзены вынікі літаратурнага конкурсу часопіса «Алеся» і Саюза пісьменнікаў Беларусі «Вы — пачатак прыгажосці, вы — жыцця першапрычына». Конкурс у дзвюх намінацыях — на найлепшы паэтычны і найлепшы празаічны твор, прысвечаны беларускай жанчыне, — абвясціў у верасні 2022 года часопіс сумесна з Саюзам пісьменнікаў Беларусі. Напрыканцы мінулага года былі падведзены вынікі творчага спаборніцтва, аб іх вы зможаце даведацца са студзеньскага нумару «Алесі» і прачытаць творы пераможцаў конкурсу. 

Карона для мамы, парады настаўніка і псіхолага 

Мінчанка Марына Парамонава — пераможца II рэспубліканскага конкурсу прыгажосці «Краса Беларуси — 2022» сярод шматдзетных жанчын — упэўнена: каб пачувацца каралевай, побач павінен быць каханы мужчына. Самая прыгожая мама разам з мужам выхоўвае чатырох дзяцей.

— Я рада, што ў мяне вялікая сям’я, што ніколі не бываю адна, — падзялілася Марына Парамонава. — Для кагосьці гэта мінус, а для мяне адназначна плюс. Зусім не разумею прыхільнікаў чайлдфры. Дзеці — наш працяг, яны раскрываюць нас, дораць адчуванне паўнаты жыцця.

Тэму сям’і ў студзеньскім нумары часопіса працягваюць парады бацькам ад настаўніка гісторыі і грамадазнаўства мінскага ліцэя № 2 Фёдара Радзівонава і разважанні псіхолага Таццяны Шаранда.

Рацыён «жалезнага» здароўя, зімовыя шпацыры і модны манікюр

Са студзеньскага нумару «Алесі» вы даведаецеся, як правесці зімовы час з карысцю для здароўя, якія прадукты харчавання ўтрымліваюць жалеза і чаму спецыялісты раяць нам есці смаўжоў. Прачытаеце, якія трыкатажныя сукенкі і світары ў трэндзе гэтай зімой і якія прыродныя сродкі дапамогуць вашым вейкам. Таксама вашай увазе — правілы догляду вуснаў, самыя модныя варыянты манікюру гэтай зімы ды іншыя цікавосткі.

Алена ВАЛЕР’ЕВА