Цяпер архітэктура міжнароднай бяспекі разбураная, і аднапалярнаму свету ў любым выпадку ўжо не быць, будуецца шматпалярны свет. Акцэнт на гэтым зрабіў дзяржаўны сакратар Савета бяспекі Аляксандр Вальфовіч на сустрэчы з працоўнымі калектывамі Гомельскай вобласці па пытаннях ваенна-палітычнай абстаноўкі ў краіне і за мяжой, паведаміла БелТА.
«Абстаноўка цяпер у свеце насычаная падзеямі і, на жаль, характарызуецца абвастрэннем супрацьстаяння. Усё гэта наступствы барацьбы Усходу і Захаду, двух лагераў. З аднаго боку стаіць Расійская Федэрацыя, Кітай. З другога боку — калектыўны Захад на чале з ЗША, якія не хочуць саступаць у разбурэнні аднапалярнага свету, што існаваў да гэтага часу», — сказаў Аляксандр Вальфовіч.
Ён звярнуў увагу: амерыканцы, дзе з'яўляюцца, спрабуюць стварыць ачагі напружанасці. «Дзе з'яўляюцца амерыканцы, усюды ўспыхваюць канфлікты, усюды войны, слёзы, разруха, смерць. Гэта і далёкая дуга, і Азіяцка-Ціхаакіянскі рэгіён, і Сярэдняя Азія, і Еўропа», — пералічыў дзяржаўны сакратар Савета бяспекі. — Галоўная мэта амерыканцаў — прыбраць галоўнага канкурэнта — Расійскую Федэрацыю».
Ваенна-палітычная абстаноўка вакол Беларусі накіравана на тое, каб уцягнуць краіну ў канфлікт. Аляксандр Вальфовіч адзначыў, што з боку калектыўнага Захаду на чале з ЗША ідзе ўдушэнне Расійскай Федэрацыі з усіх бакоў. «Гэта і той ачаг напружанасці, які адбыўся ў сувязі з вывадам амерыканскіх войскаў з Афганістана. Вялікая колькасць узбраення, тэхнікі, боепрыпасаў кінута, пакінута на тэрыторыі Афганістана. Гэта стварэнне напружанасці на таджыкскай граніцы ў сувязі з тым. Даўно тлеючы канфлікт Арменія — Азербайджан. Пастаянныя канфлікты на кіргізска-таджыкскай граніцы», — пералічыў дзяржаўны сакратар Савета бяспекі. Ён нагадаў, што ў пачатку года на тэрыторыі Казахстана была спроба перавароту і стварэння ачага напружанасці.
Даўняя мэта, якая дасягнута амерыканцамі, — стварэнне напружанасці на тэрыторыі Украіны з уцягваннем Расійскай Федэрацыі, дадаў Аляксандр Вальфовіч. «У 2020 годзе была моцная спроба, якая сарвалася, уцягнуць Беларусь у гэтую чараду падзей і самкнуць кола вакол Расійскай Федэрацыі, сціснуць да апошняга. Усё гэта не можа не турбаваць. І сёння ўся ваенна-палітычная абстаноўка, спробы амерыканцаў, якія ўсё больш праяўляюцца, накіраваны на тое, каб Беларусь уцягнуць у канфлікт», — падкрэсліў ён.
На гэта была накіравана і міграцыйная сітуацыя летась, і пад выглядам яе ўрэгулявання стварэнне ваеннай напружанасці, ваеннай актыўнасці на тэрыторыі Польшчы, Літвы. «Мігрантаў няма, а напружанасць засталася, буйныя групоўкі засталіся, вучэнні засталіся, загаварылі аб прымяненні ядзернай тактычнай зброі. Абстаноўка сапраўды складаная», — звярнуў увагу Аляксандр Вальфовіч.
Аднак ніякай мабілізацыі ў Беларусі няма і не прадбачыцца, заявіў дзяржаўны сакратар Савета бяспекі. «Цяпер мы нейтралізуем пагрозы нашай нацыянальнай бяспецы, ваеннай бяспецы існуючым камплектам сіл і сродкаў сістэмы нацыянальнай бяспекі, ваеннай арганізацыі дзяржавы, — падкрэсліў Аляксандр Вальфовіч. — Мы спраўляемся. Але каб яны [Узброеныя Сілы] былі боегатовымі, яны павінны быць укамплектаваны». Дзяржсакратар адзначыў, што ідзе планавая прызыўная восеньская кампанія: «Няхай хлапчукі, хто не служыў у войску, атрымаюць вопыт, памужнеюць, знойдуць сяброў. Служыць у арміі сёння ганарова».
Страціць усё тое, што створана ў Беларусі, беларусы проста не маюць права, лічыць Аляксандр Вальфовіч. «Супраць Беларусі развязана гібрыдная вайна, а на яе фоне інфармацыйная вайна, у якой спрабуюць, перш за ўсё амерыканскія спецслужбы, спецслужбы калектыўнага Захаду, праз інтэрнэт укараніць у [свядомасць] людзей, што яны (ЗША, Захад. — Рэд.) усе белыя і харошыя, і ўсё, што ні робяць, гэта добра», — звярнуў увагу Аляксандр Вальфовіч. Ён падкрэсліў, што сёння інтэрнэт поўнасцю кантралюецца Захадам. Блакуюцца каналы інфармацыі, якія не патрэбныя ім. «Але тую інфармацыю, якую яны хочуць [данесці] у тым выглядзе, у якім ім гэта цікава, пад патрэбным ім соусам укараняюць у мазгі людзей. Перш за ўсё ў мазгі моладзі», — канстатаваў ён. Па словах дзяржаўнага сакратара Савета бяспекі, сёння беларускія СМІ навучыліся аператыўна рэагаваць на абстаноўку. «Але, на жаль, усе мы сёння не так уважліва, напэўна, глядзім і слухаем блокі навін. Чамусьці больш аддаём перавагу інтэрнэту», — звярнуўся да прадстаўнікоў працоўных калектываў Аляксандр Вальфовіч.
Менавіта таму кіраўнік дзяржавы прыняў рашэнне данесці праз падобныя сустрэчы да людзей інфармацыю аб тым, што цяпер адбываецца, якія мэты ў Захаду, што робіцца ў краіне, каб нейтралізаваць выклікі і пагрозы, каб жыццё ў Беларусі было мірным. «Каб нашы людзі маглі працаваць на заводах, фабрыках, прадпрыемствах, настаўнікі — вучыць дзяцей, урачы — лячыць у камфортных умовах», — заўважыў дзяржсакратар. — А ўмовы ў Беларусі сёння сапраўды камфортныя. Мы прывыклі да такога жыцця і не бачым, што адбываецца ў постсавецкіх рэспубліках, якая там абстаноўка ў плане камфорту. Многія засталіся на ўзроўні 80-х гадоў мінулага стагоддзя. Як было пабудавана, так усё і засталося. Беларусь рушыла далёка наперад. І страціць усё гэта мы проста не маем права».
Пётр ДУНЬКО
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
