Праект па аздараўленні ў Беларусі дзяцей з Данбаса будзе прадоўжаны

Гэтай восенню ў аздараўленчым лагеры «Дубрава» ААТ «Беларуськалій» пабывала больш за тысячу дзяцей з Данбаса. Гэты гуманітарны праект быў ініцыяваны Фондам Аляксея Талая і знайшоў моцную падтрымку ў Беларусі і Расіі.

З пачатку верасня тут адпачываюць дзеці з малазабяспечаных сем’яў, сем’яў, якія страцілі карміцеля, сіроты, а таксама пацярпелыя ад ваенных дзеянняў. З пачатку жыццё ў лагеры здавалася ім нейкім незвычайным. Па словах Алены Лявіцкай, суправаджаючага педагога з Данецка, у першыя дні дзеці проста прывыкалі да цішыні. Магчымасць выкупацца ў любы момант здавалася шчасцем. А мерапрыемствы, шоу, забавы, экскурсіі, напэўна, застануцца ў сэрцы кожнага.

Днямі «Дубраву» наведалі госці. Сярод іх Дзяржаўны сакратар Саюзнай дзяржавы Дзмітрый Мезенцаў, ініцыятар праекта Аляксей Талай, генеральны дырэктар ААТ «Беларуськалій» Іван Галаваты. Яны паразмаўлялі з дзецьмі ў у нефармальнай абстаноўцы. Задавалі пытанні аб іх марах і планах на будучыню.

У адзін голас госці гаварылі аб тым, што гэту ініцыятыву абавязкова будуць працягваць.

«У нас ёсць фармат, зацверджаны як праект Саюзнай дзяржавы, выдзелены дзясяткі мільёнаў рублёў, — адзначыў Дзмітрый Мезенцаў. — Будзем весці размову з кіраўнікамі суб’ектаў Расійскай Федэрацыі, кіраўнікамі абласцей Беларусі, каб гэты добры зачын Фонду Аляксея Талая быў маштабна працягнуты. Мы павінны дапамагаць гэтым дзецям забыцца складаныя старонкі, каб яны адбыліся як людзі і сфарміравалі сваю мару». 

Зараз змена доўжыцца 15 дзён. Але Іван Галаваты, генеральны дырэктар ААТ «Беларуськалій» заявіў аб магчымасці пашырэння фармату аздараўлення:

«Сапраўды, гэта мы будзем і сёлета працягваць, і ў наступным годзе. І я ўпэўнены, што нашу ініцыятыву падхопяць яшчэ многія прадпрыемствы і аздараўленчыя цэнтры Рэспублікі Беларусь і Расійскай Федэрацыі».

Аляксея Талая дзеці сустракалі асабліва цёпла. Як толькі ён з’явіўся ў памяшканні, яны пачалі радасна вітаць вядомага паралімпійца. Аляксей не першы раз наведвае гэтых дзяцей. Ён з усёй душой адносіцца да працы свайго Фонду. Аляксей паведаў, што ў чацвёртую змену плануецца сабраць самых цяжкіх дзетак і адвезці іх да беларускага Дзеда Мароза. Таксама ён выказаў падзяку «Беларуськалію», Прэзідэнту краіны, які падтрымаў ініцыятыву і кожнаму беларусу, які ў гэты няпросты час рублём і нават капейкай паўдзельнічаў у дабрачынным праекце. Аляксей падкрэсліў, што нават нашы дзеці падключыліся да ініцытывы, сабраўшы вялікую колькасць канцылярскіх прылад для дзяцей Данбаса. Гэты груз разам з гэтай групай адправіцца ў школы Данецка.

Трэба адзначыць, што Беларусь штогод рэалізуе праекты па аздараўленні дзяцей з іншых краін. У гэтым годзе ў нас аздараўляліся дзеці з Сірыі, Азербайджана і Украіны. 

Лізавета ГОЛАД

Фота аўтара