На Гомельшчыне тры новыя смеццявозы — сучасныя мадэлі вытворчасці Мінскага аўтамабільнага завода — папоўнілі парк тэхнікі камунальнікаў рэгіёна. Новыя машыны — значная дапамога ў абслугоўванні аддаленых раёнаў, дзе пасля закрыцця міні-палігонаў узніклі складанасці з вывазам адходаў з кантэйнерных пляцовак. Вырашыць экалагічную праблему ўдалося дзякуючы падтрымцы кіраўніцтва Гомельскага аблвыканкама. Між тым, сёння ў рэгіёне трымаць на кантролі развіццё інфраструктуры збору бытавога смецця, навядзення парадку на кантэйнерных пляцоўках і палігонах адходаў дапамагаюць маніторынгі супрацоўнікаў Камітэта дзяржаўнага кантролю Гомельскай вобласці.
Больш як 85 % жыхароў Гомельшчыны забяспечана кантэйнерамі для раздзельнага збору смецця. У рэгіёне працуе 19 сартавальных станцый, смеццеперапрацоўка наладжана на асобных прадпрыемствах. Выпрацаваць сістэму нарыхтоўкі другасных рэсурсаў дапамагае выкананне задач, акрэсленых Дзяржпраграмамі «Ахова навакольнага асяроддзя і ўстойлівае выкарыстанне прыродных рэсурсаў на 2021—2025 гады» і «Камфортнае жыллё і спрыяльнае асяроддзе на 2021—2025 гады». Разам з тым на Гомельшчыне вельмі актуальнымі застаюцца пытанні эфектыўнай сарціроўкі смецця, павышэння ўзроўню здабывання і выкарыстання другасных матэрыяльных рэсурсаў.
— У вобласці штогод больш за 200 тысяч тон другаснай сыравіны па сутнасці закопваецца ў зямлю — не перапрацоўваецца, а працягвае захоўвацца. Адна з прычын невыканання заданняў па атрыманні другасных матэрыяльных рэсурсаў — дэфіцыт магутнасцяў сартавання і выкарыстання адходаў, — на вынікі праведзеных кантрольных мерапрыемстваў звяртае ўвагу начальнік упраўлення кантролю за работай галін гаспадаркі Камітэта дзяржаўнага кантролю Гомельскай вобласці Дзмітрый Прыкота. — Магутнасць сартавальных станцый ахоплівае менш за 30 % ад агульнай колькасці адходаў. У асобных раёнах ёсць дэфіцыт кантэйнераў для раздзельнага збору адходаў.
Маніторынг сітуацыі выявіў і нераўнамерную загрузку палігонаў. Да гэтага часу не пачата будаўніцтва рэгіянальных смеццеперапрацоўчых комплексаў на тэрыторыі Гомельскага, Жлобінскага і Мазырскага раёнаў, не ўведзены ў эксплуатацыю цэх па тэрмічным абясшкоджванні адходаў.
— За мінулы год — студзень—чэрвень бягучага года у арганізацыі ЖКГ паступіла больш за 300 зваротаў, у ліку якіх скаргі на неналежнае ўтрыманне кантэйнерных пляцовак, парушэнні графікаў вывазу адходаў, прэтэнзіі да кошту гэтых паслуг, — дадаў Дзмітрый Прыкота. — Асноўная ўдзельная вага ў сабекошце паслуг па абыходжанні з цвёрдымі камунальнымі адходамі займаюць транспартныя выдаткі на іх перавозку. Варта адзначыць, што арганізацыямі праводзіцца пэўная работа па зніжэнні транспартных затрат на перавозку адходаў: перыядычна пераглядаюцца і аптымізуюцца схемы вывазу смецця на палігоны са складаннем новых маршрутных графікаў.
Пры гэтым у вобласці ёсць станоўчыя прыклады абыходжання з адходамі і забеспячэння высокага ўзроўню здабывання другасных матэрыяльных рэсурсаў.
— Актуальнае прыцягненне інвестараў у дадзеную сферу для рэалізацыі праектаў па стварэнні аб'ектаў па перапрацоўцы адходаў, — падкрэсліў спецыяліст Дзяржкантролю. — Так, ініцыіраваны прапановы ўраду сумесна з зацікаўленымі службамі прыняць меры па павышэнні ўзроўню здабывання і выкарыстання другасных матэрыяльных рэсурсаў, стварэння рэгіянальных комплексаў па абыходжанні з цвёрдымі камунальнымі адходамі, аналізу рэзерваў па скарачэнні затрат прадпрыемстваў ЖКГ на аказанне паслуг па зборы і вывазе адходаў, фактаў неналежнай якасці такіх паслуг.
Камітэтам дзяржаўнага кантролю Гомельскай вобласці прапанавана аблвыканкаму сумесна з іншымі зацікаўленымі службамі прыняць меры па ліквідацыі выяўленых недахопаў і павышэнні эфектыўнасці рэгіянальнай сістэмы абыходжання з цвёрдымі камунальнымі адходамі. Прапанавана ў тым ліку дадатковае эканамічнае стымуляванне арганізацый і насельніцтва да раздзельнага збору смецця, а таксама пераймання станоўчага замежнага вопыту здабывання і выкарыстання другасных матэрыяльных рэсурсаў. Ход работы адносна выяўленых праблемных пытанняў узяты на кантроль КДК Гомельскай вобласці.
Наталля КАПРЫЛЕНКА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
