Лукашэнка правёў сустрэчы з Эрдаганам, Такаевым і прэм’ер-міністрам Пакістана

На палях саміту Нарады па ўзаемадзеянні і мерах даверу ў Азіі Прэзідэнт Беларусі Аляксандр Лукашэнка правёў двухбаковыя сустрэчы з Прэзідэнтам Турцыі Рэджэпам Таіпам Эрдаганам, Прэзідэнтам Казахстана Касым-Жамартам Такаевым і прэм’ер-міністрам Пакістана Шахбазам Шарыфам, перадае БелТА.

Сустрэча Лукашэнкі і Эрдагана доўжылася амаль гадзіну. На ёй таксама прысутнічалі кіраўнікі МЗС і іншыя афіцыйныя асобы з абодвух бакоў.

Лідары краін не сталі рабіць пратакольных заяў для прэсы, а адразу пачалі перагаворы. Не да пратакола — тэм для абмеркавання шмат і вельмі яны важныя.

Прэзідэнт Беларусі Аляксандр Лукашэнка ўпэўнены, што Азіі ў цяперашняй абстаноўцы ў свеце трэба не ўпусціць момант і смялей браць на сябе лідарскія функцыі. Аб гэтым ён заявіў на сустрэчы з Прэзідэнтам Казахстана Касым-Жамартам Такаевым.

«Вялікі дзякуй за запрашэнне. Я сапраўды шчыра не проста адчуваю, — я лічу, як сёння сказаў, настае час Азіі. Азія, Усход — людзі вельмі акуратныя, асцярожныя, вывераныя. Гэтыя паводзіны Азіі не павінны стаць прычынай таго, што Азія ўпусціць гэты момант. Усе цяпер шукаюць, на каго б абаперціся. І так здарылася, што ШАС і ваша арганізацыя (НУМДА. — Заўвага БелТА), якая была створана па ініцыятыве Казахстана тут, — гэта, я вам скажу, моцна. І тое, што вы цяпер пачалі развіваць гэту арганізацыю, ператвараць яе ў глабальную, — гэта вельмі правільна. Таму трэба смялей браць руль кіравання светам у рукі і кіраваць», — сказаў Прэзідэнт Беларусі.

Касым-Жамарт Такаеў падкрэсліў, што рады бачыць Аляксандра Лукашэнку, асабліва ў Астане, і падзякаваў за ўклад у работу саміту.

Прэзідэнт Казахстана канстатаваў, што Азія паказвае вельмі добрыя вынікі ў сваім развіцці, і гэта, безумоўна, рэгіён з вялікай будучыняй у плане эканомікі. «Вядома, у Азіі лакаматывам выступае Кітай. Але ёсць і іншыя дзяржавы», — адзначыў ён. Касым-Жамарт Такаеў у прыватнасці згадаў В’етнам, які таксама быў прадстаўлены на саміце. Гэта краіна з вялікай эканомікай, якая бурна развіваецца.

Аляксандр Лукашэнка згадзіўся з гэтым тэзісам, але падкрэсліў і значную ролю Казахстана ў Азіі. «Вы сказалі аб тым, што так, ёсць вельмі сур’ёзныя буйныя дзяржавы ў гэтай арганізацыі. Але я не лічу, што Казахстан маленькая дзяржава і не здольна ўнесці ўклад у тое, каб усё ж такі азіяцкія арганізацыі сёння дамінавалі ў свеце. І вы многае зрабілі для гэтага», — адзначыў ён.

«Лічбы сведчаць самі за сябе. У нас ВУП амаль $190 млрд па гэтым годзе будзе. Гэта больш, чым эканомікі ўсёй Цэнтральнай Азіі. Я не для таго, каб пахваліцца. Гэта статыстычны факт», — згадзіўся казахстанскі лідар.

Што датычыцца двухбаковых адносін з Беларуссю, Касым-Жамарт Такаеў запэўніў, што з яго боку будзе рабіцца ўсё магчымае, каб эфектыўнае і шматбаковае супрацоўніцтва прадаўжала развівацца.

«Мы настроены абсалютна на станоўчы лад, танальнасць. Я пастаянна гавару і членам урада, што трэба рабіць усё магчымае, каб нарошчваць гэты аб’ём. Ці то гандаль, інвестыцыйнае супрацоўніцтва, сумесныя праекты. У прынцыпе, няма падстаў біць трывогу, нічога такога страшнага не адбываецца. Проста трэба выкарыстоўваць існуючыя магчымасці. Вы лепш пра іх ведаеце, паколькі даўным-даўно знаходзіцеся ў тэме», — сказаў Прэзідэнт Казахстана.

У Астане Аляксандр Лукашэнка таксама правёў сустрэчу з прэм’ер-міністрам Пакістана Шахбазам Шарыфам.

Лідары краін сустракаліся нядаўна, на палях Саміту ШАС у Самаркандзе амаль месяц таму. Але ёсць неабходнасць зноў зверыць гадзіннікі адносна супрацоўніцтва ў цэлым, а таксама абмеркаваць канкрэтныя пытанні ўзаемаадносін, графік візітаў і кантактаў.

Фота: БелТА