Не захаваўшы спадчыну продкаў, можна страціць і будучыню - Сергеенка

Не захаваўшы пакінутую нашымі продкамі спадчыну, у перспектыве можна страціць і будучыню. Такое меркаванне выказаў сёння кіраўнік Адміністрацыі Прэзідэнта Ігар Сергеенка ў час пасяджэння Бярозаўскага райвыканкама, перадае БелТА.

«У свеце цяпер сур’ёзныя эканамічныя праблемы, санкцыі, абвастрэнне міжнароднай абстаноўкі. Недалёка ад нас у шэрагу рэгіёнаў праходзяць ваенныя дзеянні. Мы сёння абмяркоўваем, як захаваць гісторыка-культурную спадчыну. Можа здацца, што мы адарваныя ад жыцця ідэалісты. Гэта не так. Не захаваўшы тое, што створана нашымі продкамі, у перспектыве можна страціць і будучыню, — падкрэсліў Ігар Сергеенка. — Не проста так выспела ідэя назваць гэты год Годам гістарычнай памяці. Гэта ўсё зыходзіла са стасункаў з рознымі калектывамі ў розных рэгіёнах краіны».

Кіраўнік Адміністрацыі Прэзідэнта звярнуў увагу, што беларусы сталі адзначаць новае дзяржаўнае свята — Дзень народнага адзінства. «Не ўсе разумеюць, што гэта за дзень у гісторыі нашай краіны. Моладзі трэба тлумачыць і расказваць пра падзеі 17 верасня. Нараўне з Днём Незалежнасці, Днём Перамогі, па сутнасці справы, гэта трэцяе па значнасці дзяржаўнае свята», — дадаў Ігар Сергеенка.

У прыватнасці, падзеі 17 верасня пераплецены з гісторыяй Бярозаўскага раёна. У Бярозе-Картузскай у 1934-1939 гадах размяшчаўся канцэнтрацыйны лагер. Там былі заключаны людзі, якія выказвалі сваю нязгоду з польскай уладай. Лагер спыніў сваё існаванне 17 верасня 1939 года. На яго месцы ў сярэдзіне мінулага стагоддзя ў памяць аб вязнях устанавілі абеліск. У мінулым годзе да мемарыяла дабавілі дзве гранітныя пліты, выява на якіх нагадвае аб сценах і калючым дроце канцлагера. Ігар Сергеенка ўсклаў кветкі да памятнага знака і ўшанаваў памяць ахвяр.

Побач з манументам стаіць будынак так званых чырвоных казарм. Там якраз размяшчаўся канцлагер. Год таму на першым паверсе стварылі часовую экспазіцыю, цяпер — пастаянную ўжо. Для наведвання адкрыты тры залы. У адной з іх адноўлена абстаноўка карцара, у другой — камеры вязняў. На выставе сабраны арыгінальныя фатаграфіі і дакументы, транспаранты і лістоўкі, успаміны і асабістыя рэчы вязняў. Прадстаўлены макет, на якім можна ўбачыць асноўныя будынкі канцлагера. Адчуць драматызм таго, што адбывалася ў тыя гады, дапамагаюць таксама праектар, мультыборды, акуляры віртуальнай рэальнасці. Наведвальнікі могуць скарыстацца аўдыягідам. Бярозаўскі гісторыка-краязнаўчы музей выкарыстаў свае фонды. Матэрыяламі з калегамі падзяліліся Нацыянальны гістарычны і Брэсцкі абласны краязнаўчы музеі.

«Вам ёсць на чым вучыць гісторыі і паказваць. Гэта можа быць карысна не толькі моладзі раёна, але жыхарам Брэсцкай вобласці і ўсёй краіны», — сказаў кіраўнік Адміністрацыі Прэзідэнта.

На пасяджэнні райвыканкама ўдзялілі ўвагу гісторыка-культурнай спадчыне, а таксама падрыхтоўцы кадраў і ідэалагічнай рабоце ў калектывах. «Ідэалагічная работа паняцце шматграннае. Гэта не толькі правядзенне адзіных дзён інфармавання, але і веданне абстаноўкі ў калектыве, аказанне дапамогі ў вырашэнні жыллёвых або іншых пытанняў, выхаванне на традыцыях. Павінны працаваць людзі неабыякавыя, — лічыць Ігар Сергеенка. — З людзьмі на месцах трэба працаваць, а не адмахвацца. Праблема сама не разыдзецца, калі яна ёсць у чалавека (асабістая яна або звязаная з грамадскай пазіцыяй). Трэба даводзіць, вучыць і вырашаць, каб людзі бачылі аддачу».

Кіраўнік Адміністрацыі Прэзідэнта сёння наведае таксама ўрочышча Бронная Гара. Там на месцы брацкай магілы ахвяр фашызму плануюць стварыць мемарыяльны комплекс. У гады Вялікай Айчыннай вайны гітлераўцы прывозілі туды з розных гарадоў мірных жыхароў, большасць з якіх былі яўрэямі. Людзей заганялі ў ямы і там расстрэльвалі. Каб скрыць сляды злачынстваў, у сакавіку 1944 года акупанты прымусілі палонных выкопваць і спальваць целы забітых. Ва ўрочышчы былі расстраляны больш за 51 тыс. чалавек.

Фота БелТА