Ідэі грамадзянскай актыўнасці моладзі абмеркавалі з сенатарам

Аўтарскія экспазіцыі аб родным краі ў сельскіх Дамах культуры, абменныя экскурсіі для жыхароў аграгарадкоў, удзел у прыёмах грамадзян у сельсаветах... Гэтыя і іншыя ідэі грамадзянскай актыўнасці моладзі абмеркавалі ўдзельнікі сустрэчы са старшынёй Пастаяннай камісіі Савета Рэспублікі па адукацыі, навуцы, культуры і сацыяльным развіцці Віктарам Лісковічам у Гомельскім раёне.

Для парламентарыя падрыхтавалі насычаную праграму візіту. Пачаўся ён з матывацыйнай сустрэчы, як самі маладыя людзі назвалі некалькі гадзін жывых стасункаў з сенатарам. Задавалі хвалюючыя пытанні сенатару, дзяліліся ідэямі і напрацоўкамі актывісты маладзёжных Саветаў Гомельскага раённага Савета дэпутатаў і Гомельскага раённага аб'яднання прафсаюзаў.

Маладым актывістам было цікава пачуць ад Віктара Лісковіча пра яго асабісты досвед выкарыстання сучасных інфармацыйных рэсурсаў для дэманстрацыі грамадзянскай пазіцыі і «трансляцыі» той работы, якую праводзіць сам парламентарый і яго калегі. Сенатар падзяліўся, што самастойна, без памочнікаў, вядзе свае старонкі ў сацсетках.

— Заўсёды гатовы пазіцыянаваць каштоўнасць дзяржавы, у прыватнасці, і праз сваё жыццё, і праз работу. Для мяне важна паказаць, наколькі насычанае жыццё з пункту гледжання службовай дзейнасці ў кожнага, хто ёю займаецца. І ў той жа час хачу паказаць, што мы такія самыя простыя людзі, як усе. Мы можам і адпачываць, і атрымліваць задавальненне ад жыцця, заўважаем прыгажосць навакольнага свету, любуемся прыродай... У нас у краіне ёсць усё, чым можна ганарыцца і шанаваць, усё, каб гарманічна пражыць гэтае жыццё, — распавёў пра свой досвед вядзення акаўнта ў Іnstagram сенатар, на якога падпісаны, дарэчы, 15 тысяч чалавек, у асноўным — моладзь.

Не саромецца рабіць сэлфі на важных афіцыйных мерапрыемствах, — прагучаў і такі рэцэпт цікавай падачы дзяржаўнай дзейнасці ад сенатара. Ён падкрэсліў, што сацсеткі дапамагаюць і ў вырашэнні хвалюючых пытанняў, якія паступаюць ад грамадзян.

— Ідэі, звароты і прапановы паступаюць перыядычна. За два гады актыўнай прысутнасці ў сацсетках не было пагрозлівых ці крытычных пасылаў у адрас органаў улады ці асабіста мяне. Наадварот, паступаюць словы падтрымкі. Ідэі, у тым ліку ад моладзі, заўсёды імкнуся трансфармаваць у дзеянні, прыцягнуць ініцыятараў да іх рэалізацыі. Ёсць і тыя, хто звяртаецца па дапамогу ў індывідуальным парадку, — адпраўляю запыты ў органы дзяржаўнай улады, — падзяліўся Віктар Лісковіч.

На сустрэчы аб тым, як сучасныя інфармацыйныя тэхналогіі выкарыстоўваюцца моладдзю Гомельскага раёна, расказаў член Маладзёжнага парламента пры Нацыянальным сходзе Беларусі Станіслаў Сямёнаў. Малады чалавек — аўтар інтэрнэт-партала і мабільнага дадатку «Гомельскі раён у тваёй руцэ». Гэта праект стаў адным з пераможцаў першага абласнога конкурсу грамадзянскіх ініцыятыў Гомельскай абласной асацыяцыі мясцовых Саветаў дэпутатаў. Рэсурс не толькі знаёміць з жыццём раёна, але дапамагае вырашаць і канкрэтныя праблемы, з якімі анлайн звяртаюцца жыхары раёна.

— З пачатку года атрымалася вырашыць 30 зваротаў. Людзі звярталіся па самых розных пытаннях — ад усталявання кантэйнераў для збору смецця да дапамогі ў афармленні дзіцяці ў дзіцячы садок, — распавёў Станіслаў Сямёнаў.

Яго пазіцыя: пры кожным сельсавеце неабходна ствараць ініцыятыўную маладзёжную групу, якая будзе дапамагаць у стварэнні і рабоце вясковых чатаў.

Карыстаючыся магчымасцю непасрэдна звярнуцца да моладзі раёна, Віктар Лісковіч акцэнтаваў увагу на некалькі цікавых ідэй. Прагучала прапанова, напрыклад, правесці маладзёжныя спаборніцтвы па азеляненні населеных пунктаў.

— Я ў Гомелі не першы раз і мяне заўсёды ўражвае багацце кветак. Але каб яны цешылі, неабходныя велізарная праца і клопат. Улады знаходзяць час і магчымасць ствараць прыгажосць для сваіх гараджан. Кветкі — гэта гармонія ў гарадской атмасферы. Заўсёды ў Гомелі лаўлю сябе на думцы, наколькі мудра паступаюць улады горада, не шкадуючы сродкаў і сіл, каб праз кветкі паказваць пазітыў жыцця, — падзяліўся сенатар.

Ідэю па стварэнні маладзёжных зялёных зон адразу падтрымалі раённая арганізацыя БРСМ, Маладзёжны савет Гомельскага райсавета дэпутатаў і Маладзёжны савет раённага аб'яднання прафсаюзаў.

Ініцыятывы вясковай моладзі могуць садзейнічаць унутранаму турызму як драйверу развіцця сельскіх тэрыторый — з такім пасылам да моладзі раёна звярнуўся старшыня Пастаяннай камісіі Савета Рэспублікі.

— У кожным сельскім Доме культуры можна распрацаваць найбагацейшую музейную экспазіцыю. Моладзь, вазьміце на сябе рэалізацыю такой ідэі і прыцягніце да яе ўсіх школьнікаў раёна! — заклікаў Віктар Лісковіч. — А яшчэ з добрага савецкага мінулага мы забыліся, як важна абменьвацца паездкамі: паміж аграгарадкамі, сельсаветамі, раёнамі. Гэта аб'яднае і стане самай лепшай інфанагодай, пра якую вы зможаце цікава расказаць у сваіх сацсетках.

Таксама сенатар прапанаваў раённым органам улады запрашаць маладзёжных актывістаў браць удзел у прыёмах грамадзян.

— Работа вопытных кіраўнікоў — найлепшы прыклад для моладзі, — падкрэсліў Віктар Лісковіч.

Пасля сустрэчы парламентарый і маладзёжныя актывісты раёна наведалі мемарыяльны комплекс «Партызанская крынічка» і месца пошукавых работ у Чонкаўскім лесе. Таксама Віктар Лісковіч азнаёміўся з работай санаторыя «Чонкі», дзіцячага аздараўленчага летніка «Чонкаўскі бор» і ўнікальнай для раёна дзіцячай дашкольнай установы — ясляў-сада «Вясёлка-горад».

Наталля КАПРЫЛЕНКА