У адзінстве прыгажосць і сіла

З розных месцаў прыйшлі ў рэдакцыю паведамленні пра тое, як адзначаўся Дзень яднання народаў Беларусі ды Расіі

Добра вядомы слоган пра тое, што ў адзінстве наша сіла, хочацца “прыўкрасіць” і слоўцам “прыгажосць”. Робім тое з улікам вестак і фотаздымкаў, якія прыйшлі ў рэдакцыю на пачатку красавіка. Бо, як вядома, любая сіла павінна быць згарманізаванаю. Адухоўленаю. Таму, дарэчы, на шматлікіх пляцоўках і праходзяць у гонар Свята яднання культурныя імпрэзы, а не спартыўныя ці ваенныя.

Пачнем з Сібіры, у якой жыве шмат нашых супляменнікаў. З Іркуцкай вобласці дайшлі весткі: у Куйтунскім раёне правялі ўжо Другі рэгіянальны фестываль “Наша сила в единстве” – у гонар Дня яднання. Галоўны “рухавік” у справе – мясцовая НКА беларусаў Куйтунскага раёна (суполкай кіруе Людміла Лаўшук) і мясцовы ДК. І яшчэ паўдзельнічалі ў свяце 7 дамоў культуры, іх творчых гуртоў. Яркая і разнастайная была праграма канцэрта. У ліку тых, хто віншаваў грамаду са святам, былі кіраўнік Андрушынскага муніцыпальнага ўтварэння Аляксандр Лаўшук ды вядомая ў Прыбайкаллі Алена Сіпакова – старшыня Іркуцкага таварыства беларускай культуры імя Яна Чэрскага.

І ў тыя ж дні быў наладжаны тэлемост паміж Маларыцкім раёнам Брэстчыны ды Іркуцкім раёнам Расіі. У адміністрацый раёнаў у планах – падпісанне пагаднення аб супрацы, пра тое і гаварылі. Чытаем на сайце ФНКА Беларусаў Расіі: “Тэлемост быў праведзены па ініцыятыве і пры непасрэдным удзеле НКА Беларусы Масквы і Беларусаў Забайкалля. У тэлемосце паўдзельнічалі кіраўнікі муніцыпалітэтаў і прадстаўнікі грамадскасці”. Пры тым вітальнае слова ад імя старшыні ФНКА Беларусаў Расіі зачытаў яго першы намеснік Аляксандр Даркавіч. У працы прынялі ўдзел кіраўнікі НКА Масквы, Іркуцкай і Смаленскай абласцей, Башкірыі, члены савета ФНКА.

Досвед працы маскоўскіх беларусаў па наладжванні супрацы з беларускімі рэгіёнамі ўжо апрабаваны. І калі 31 сакавіка праходзіў тэлемост між горадам Давыд-Гарадком Брэсцкай вобласці і паселішчам Марушкінскае горада Масквы, то згадвалі: пагадненне аб партнёрстве ў іх падпісана 6 гадоў таму – па ініцыятыве і пры непасрэдным удзеле НКА Беларусы Масквы. У тэлемосце паўдзельнічалі кіраўнікі муніцыпалітэтаў, прадстаўнікі грамадскасці. Герой Расіі Аляксандр Дарковіч, ураджэнец Давыд-Гарадка, найбольш спрыяе такому партнёрству.

У Новасібірскай вобласці зладзілі абласное свята, яго прымаў Кочанеўскі раён і Цэнтр культуры і адпачынку “Гармония”. Прычым і там нашы супляменнікі (з Новасібірскага цэнтра беларускай культуры, Новасібірскай рэгіянальнай НКА беларусаў) працавалі з мясцовымі ўладамі, культурнымі арганізацыямі. Ставілася мэта: умацаванне расійска-беларускай дружбы, зберажэнне беларускай і рускай культур. І больш за 150 чалавек з 7 раёнаў вобласці паўдзельнічалі ў свяце. Ладзілася выстава дэкаратыўна-прыкладнога мастацтва, прайшла цікавая канцэртная праграма. У ліку іншых вітала ўдзельнікаў імпрэзы Надзея Санцэвіч – старшыня Асацыяцыі нацыянальна-культурных аўтаномій і нацыянальных арганізацый “Содружество” Новасібірска і вобласці, яна ж і старшыня Новасібірскай рэгіянальнай НКА беларусаў.

З з горада Кургана вестка: Дзень яднання там адзначалі ў горадзе Шадрынску. “Зладзілі свята ў Цэнтры рускай культуры “Лад”, – напісала кіраўніца беларускай суполкі “Батькавщина” Людміла Урванцава. – Была ў нас і цікавая размова за круглым сталом, скіраваная на далейшую супрацу, і канцэрт мастацкіх калектываў”.

На сайце ФНКА Беларусаў Расіі ёсць інфармацыя пра свята ў Омскай вобласці з нагоды Дня яднання. Урачыстасць і канцэрт праводзілі рэгіянальная НКА беларусаў Омскай вобласці “Буслы” (“Аисты”) сумесна з Домам кіно. Прыйшлі ветэраны, дзеці вайны, былыя вязні фашысцкіх канцлагераў, працаўнікі тыла… Прыехалі з горада Тары – “Тарскія беларусы”, з Іванаўскага сельскага пасялення (Калачынскі раён) – “Іванаўскія беларусы”. Омскія курсанты, юнармейцы былі на свяце. Некалькі мастацкіх гуртоў, салістаў абласнога цэнтра ў канцэрце паўдзельнічалі.

І беларусы Томскай вобласці зладзілі 1 красавіка ў Доме дружбы канцэртна-інфармацыйную імпрэзу ў гонар Дня яднання. Актывісты НКА беларусаў у Томскай вобласці запрасілі сяброў з усіх нацыянальна-культурных аўтаномій, дыяспар вобласці. На свяце згадваліся этапы на шляху стварэння і ўмацавання Саюзнай дзяржавы, гаварылі пра напрамкі супрацы між Томскай вобласцю і Беларуссю. Выступалі вакальныя і харэаграфічныя гурты, салісты беларускай дыяспары, а потым накрылі святочны стол – з дэгустацыяй традыцыйных беларускіх страў.

Пра ўрачыстасць у Тальяці, у Культурным цэнтры “Автоград” паведаміла кіраўніца суполкі “Нёман” Людміла Дзёміна – яна ж і вітала ўдзельнікаў свята. У зале быў аншлаг: шмат ганаровых гасцей і звыш 800 гледачоў. Працавала выстава з бібліятэкі “Истоки”.У канцэртнай праграме “У гасцях у «Купалiнкi»” гучалі новыя песні беларускіх аўтараў, выступалі творчыя партнёры беларускай суполкі.

Сёлета актывізаваліся кантакты паміж Беларуссю і Рэспублікай Крым. А 1 красавіка на базе міжнароднага інфармагенцтва “Россия сегодня” прайшоў тэлемост “Мінск – Рэспубліка Крым” – па ініцыятыве РНКА “Беларусы Крыма”. Прадстаўнікі ўлады, кіраўнікі грамадскіх суполак абмяняліся думкамі на тэму “Эканамічны патэнцыял развіцця Крыма і Беларусі”. Гаварылі й пра турыстычны патэнцыял рэгіёнаў, развіццё культурных і гуманітарных сувязяў. Абмеркавалі новы этап інтэграцыі краін: бо прынята рашэнне ўрадаў аб пераходзе ва ўзаемаразліках у нацыянальных валютах. Адзначалася:  на фоне санкцыйнага ціску ЗША і калектыўнага Захаду ў дачыненні да Расіі і Беларусі значна актывізаваліся інтэграцыйныя працэсы на прасторы Саюзнай дзяржавы.

У рэдакцыі аднавіліся кантакты з Севастопальскім нацыянальна-культурным таварыствам “Беларусь”, і яго старшыня Валерый Казьянін паведаміў: у слаўным горадзе рускіх маракоў прайшла святочная вечарына “Дзве сястры – Беларусь і Расія”, прысвечаная Дню яднання. Месцам сустрэчы стаў рэтра-кінатэатр “Украіна”. Паўдзельнічалі ў свяце прадстаўнікі Асацыяцыі нацыянальна-культурных таварыстваў Севастопаля на чале са старшынёй Яўгенам Баккалам: гагаузы, марыйцы, мардва, чувашы й прадстаўнікі іншых народаў віншавалі сяброў па АНКОС з агульным святам. Вядучыя імпрэзы (беларус Валерый Казьянін і сябар Таварыства рускай культуры Вольга Карманава) нагадалі, што першы помнік Севастопаля усталяваны ў славу ўраджэнца Беларусі Аляксандра Казарскага, і некалькі вуліц горада названыя ў гонар беларускіх герояў. Хвілінай маўчання ўшанавалі прысутныя памяць загінулых у Вялікай Айчыннай вайне. Гучалі са сцэны вершы, песні на беларускай і рускай мовах, выступалі беларускія творчыя гурты “Натхненне” і “Белая Русь”, салісты і калектывы сяброў. А напрыканцы канцэрта ўсе яго ўдзельнікі разам спявалі песню “Беларусь – Расія”.

Пра святочную імпрэзу ў крымскай Еўпаторыі ў рэдакцыю паведаміла Дзіна Шаўчэнка – кіраўніца суполак “Крым – Беларусь” і “Беларускі Крыма” імя Еўфрасінні Полацкай. Дарэчы, адначасова на свяце адзначалася і 25-годдзе Мясцовай нацыянальна-культурнай аўтаноміі “Крым – Беларусь”. Імпрэза праходзіла ў Еўпатарыйскай дзіцячай школе мастацтваў.

І ў тыя ж дні ў Растоўскай вобласці адзначылі Дзень яднання: у Зернеградскім раённым Доме культуры. Дарэчы, якраз у тым рэгіёне жыве найбольш беларусаў на Доне, і таму Зернеград у дзясяты ўжо раз стаў цэнтрам свята. У ліку ганаровых гасцей – кіраўнік аддзялення ў Растове-на-Доне Пасольства Беларусі ў Расіі Дзяніс Цімохін і старшыня савета РНКА “Беларусы Растоўскай вобласці” Уладзімір Жываткевіч. Свята было шматнацыянальнае, з удзелам прадстаўнікоў шматлікіх дыяспар, кіраўнікоў паселішчаў, суседніх раёнаў і грамадскіх арганізацый. Каларытныя выступленні нацыянальных калектываў чаргаваліся з уручэннем падзячных лістоў ад арганізатараў удзельнікам урачыстасці.

Іван Ждановіч