Сакавік — месяц поўнай нераўнавагі ва ўсім. Часам здаецца, што надвор’е нібы жартуе з намі: то на вуліцы становіцца цёпла, то зноў вяртаюцца маразы. Безумоўна, надыход каляндарнай вясны ўжо адчуваецца (сонейка свеціць ярчэй, дзень стаў даўжэй), але канчатковая змена сезонаў — працэс вельмі павольны. І без сапраўднай барацьбы тут не абыходзіцца!
У першай палове сакавіка адбываецца актыўная барацьба зімы з вясной. І сакавік у чарговы раз нам нагадаў, што ён месяц зімовы. Пад уздзеяннем паветраных мас з самых халодных рэгіёнаў Расіі, а таксама панавання антыцыклонаў адбылося так званае ўльтрапалярнае ўварванне. З’ява вельмі рэдкая. Да нас зноў прыйшлі маразы, а паўночны вецер узмацняў адчуванне холаду. Асабліва гэта адчулі жыхары ўсходніх і паўночна-ўсходніх рэгіёнаў нашай краіны. Дарэчы, вяртанне маразоў у сакавіку — нармальная сінаптычная сітуацыя.
Напрыканцы мінулага тыдня крыху пацяплела. Ці значыць гэта, што ў змене сезонаў надыдзе карэнны пералом і нарэшце да нас прыйдзе вясна? На жаль, не.
Перыяд цяпла будзе непрацяглым, і ўжо ў другой палове тыдня новая хваля халоднага арктычнага паветра зноў пачне паступаць на тэрыторыю Беларусі. І толькі ў пачатку трэцяй дэкады сакавіка мы пачнём развітвацца з зімовым надвор’ем.
Дарэчы, важнай асаблівасцю сакавіка з’яўляецца істотны дэфіцыт ападкаў. За першую дэкаду месяца выпала менш за 1 мм вільгаці. У другой дэкадзе такая тэндэнцыя захаваецца. Па папярэдніх даных, істотнае пацяпленне пачнецца ў 20 лічбах сакавіка, але будзе суправаджацца дажджамі і нават мокрым снегам. Так што цёплыя зімовыя рэчы раю пакуль не здымаць!
Кацярына ТУМАС-ЦІШКЕВІЧ
Фота: «ЗВЯЗДА»
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
