Нягледзячы на ковідныя абмежаванні, у Беларусі працягваюць аказваць стаматалагічную дапамогу. Ва ўсіх рэгіёнах створаны выязныя брыгады для хворых на каранавірус, разам з тым у планавым парадку ўрачы працягваюць прыём пацыентаў.
Асноўныя кампаненты для работы ў ковід-умовах для стаматалагічных клінік і аддзяленняў — тэрмаметрыя, захаванне дыстанцыі, апрацоўка рабочага месца. Акрамя таго, стаматалагічная служба з'яўляецца адной з самых аснашчаных у плане санітарнай бяспекі.
Ва ўсіх рэгіёнах краіны створаны выязныя брыгады па аказанні неадкладнай медыцынскай дапамогі пацыентам з COVІD-19. Напрыклад, у Мінску даросламу насельніцтву такую дапамогу аказвае 3-я стаматалагічная паліклініка Мінска, дзіцячаму — 4-я гарадская дзіцячая бальніца.
— У 2021 годзе планавая стаматалагічная дапамога не спынялася, і цяпер урачы працягваюць працаваць. Колькасць наведванняў захоўваецца на ўзроўні 2020 года. Летась было каля 13 мільёнаў наведванняў, у 2020 годзе — 12 мільёнаў. Прычым амаль 22 % наведанняў — з мэтай прафілактычных аглядаў, і гэта сведчыць аб тым, што беларусы сталі больш клапаціцца пра сваё здароўе, — расказвае галоўны пазаштатны стаматолаг Міністэрства аховы здароўя, галоўны пазаштатны стаматолаг камітэта па ахове здароўя Мінгарвыканкама, галоўны ўрач 7-й гарадской стаматалагічнай паліклінікі Валерый Недзень.
Амаль 102 мільёны рублёў атрымана ў 2021-м ад аказання платных паслуг (80 мільёнаў у 2020-м). У дзяржаўнай стаматалагічнай службе працуе больш за 9 тысяч медыкаў, з іх 37 % урачы-стаматолагі. У цэлым урачы-стаматолагі складаюць каля 8-10 % ад усіх урачоў.
Як расказала доктар медыцынскіх навук, прафесар 3-й кафедры тэрапеўтычнай стаматалогіі Беларускага дзяржаўнага медыцынскага ўніверсітэта Юлія Дзянісава, сёння стаматалогія знаходзіцца на этапе перазагрузкі на новы ўзровень — мультыдысцыплінарны. Калі раней пры вялікай праблеме да стаматолага-терапеўта падключаліся артадонт, артапед, сківічна-тваравы хірург, то сёння гэта ўзаемадзеянне з іншымі медыцынскімі і немедыцынскімі спецыялістамі. Напрыклад, клетачная інжынерыя, лічбавыя і геномныя тэхналогіі. Адным з такіх кірункаў з'яўляецца мультыдысцыплінарная перыданталогія.
— Калі з карыесам мы спраўляемся, то хвароба перыядонту — тканак, якія акружаюць зуб, — выходзіць на першы план. У пацыентаў ад 35 гадоў і старэйшых яго распаўсюджанасць складае больш за 95 % — ад лёгкіх формаў гінгівіту да складаных формаў хутка прагрэсуючага перыядантыту. Каля 30 % сярод хвароб перыядонту — паталагічны працэс, які далёка зайшоў і прыводзіць да хуткай страты зубоў. Прычым людзі маладога ўзросту дастаткова хутка іх страчваюць, — звяртае ўвагу Юлія Дзянісава.
Калі раней перыядантолагі маглі аказаць толькі неадкладную дапамогу — зняць запаленне і выдаліць зуб, то сёння распрацаваны комплекс мерапрыемстваў, якія дазваляюць не толькі захаваць зубы і стабілізаваць паталагічны працэс, але і палепшыць якасць жыцця пацыента.
— Часта хваробы перыядонту і змяншэнне аб'ёму касцявой тканкі звязаныя з сістэмнай паталогіяй. Напрыклад, гэта могуць быць праявы цукровага дыябету, іншай эндакрыннай паталогіі, дэфіцыту вітаміну Д, астэапарозу, пра якія пацыент можа не ведаць, але стаматолаг можа меркаваць і накіраваць да патрэбнага спецыяліста.
У гэтай катэгорыі пацыентаў выкарыстоўваюцца і клетачныя тэхналогіі, калі ўласныя ствалавыя клеткі пацыента дыферэнцыруюцца і ўводзяцца ў выглядзе ін'екцыі пацыенту, каб павялічыць аб'ём дзясны і якасць касцявой тканкі. Каманда беларускіх стаматолагаў пад кіраўніцтвам прафесара Сяргея Рубніковіча стала піянерам у гэтым кірунку на постсавецкай прасторы.
Алена КРАВЕЦ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
