Аб гэтым zviazda.by расказаў кіраўнік адміністрацыі Кітайска-Беларускага індустрыяльнага парка «Вялікі камень» Аляксандр Ярашэнка. Што ўяўляе сабой праект цяпер, больш падрабязна ў нашым матэрыяле.
Суразмоўнік перакананы: гэта самы буйны і паспяховы праект ініцыятывы Кітая «Адзін пояс — адзін шлях» за мяжой.
— Праект развіваецца дастаткова дынамічна, — кажа ён. — Нягледзячы на аб’ектыўныя (у тым ліку пандэмійныя) прычыны, летась нам удалося прыцягнуць 20 рэзідэнтаў.
Кіраўнік адміністрацыі парку лічыць такі вынік работы за мінулы год дастаткова добрым і падкрэслівае, што праект пазіцыянуецца як інтэрнацыянальны:
— Гэта міжнародная інвестыцыйная кітайска-беларускія пляцоўка, дзе практычна цалкам прадстаўлены Еўрапейскі рэгіён, ёсць Злучаныя штаты Амерыкі, Швейцарыя, Сінгапур — то-бок мы запрашаем да дзейнасці любую краіну свету, — кажа Аляксандр Ярашэнка.
Паводле яго слоў, галоўныя патрабаванні да рэзідэнтаў — наяўнасць высокіх тэхналогій і інавацый.
— Тое, што мы чакаем і развіваем у парку «Вялікі камень», — падкрэслівае ён.
Дык колькі ж іх зараз? Паводле слоў суразмоўніка, у сапраўдны час зарэгістравана 85 рэзідэнтаў з аб’ёмам заўяленых інвестыцый больш за 1 мільярд 240 мільёнаў долараў. 37 суб’ектаў гаспадарання ўжо распачалі актыўную гаспадарчую дзейнасць па выпуску прадукцыі і аказанні паслуг. Тэрыторыя індустрыяльнага парка «Вялікі камень» на дадзены момант складае 11 761 гектар.
— Фінансавыя вынікі, яшчэ пакуль сціплыя з пункту гледжання таго, што мы знаходзімся ў пачатку свайго шляху, — кажа кіраўнік адміністрацыі, але разам з тым прыводзіць некалькі паказальных лічбаў. — У тэрыторыю на дадзены момант украдзена больш за 720 мільёнаў долараў.
Суразмоўнік удакладняе: больш за 300 мільёнаў долараў складаюць інвестыцыі рэзідэнтаў індустрыяльнага парка. Акрамя таго, тут прысутнічае акцыянерны капітал кампаніі па развіцці парка, бюджэты дзвюх краін. Што датычыцца выдаткаў з бюджэту Рэспублікі Беларусь, яны цалкам вярнуліся, сцвярджае ён.
— Мы ўжо ўклалі ў праект 34 мільёны долараў і для нашай невялікай краіны гэта дастаткова салідныя грошы, — акцэнтуе ўвагу Аляксандр Ярашэнка. — Але пры тым што ў нас, здавалася б, добры афшор з добрымі падатковымі льготамі прамыя адлічэнні ў бюджэт у выглядзе падаткаў ад нашых рэзідэнтаў — кампаній парка — ужо цалкам перавысіла прамыя выдаткі бюджэту.
Пры гэтым ён звяртае ўвагу і на так званы ўскосны эфект.
— Створана больш за 1700 працоўных месцаў, пры гэтым больш 80 % работнікаў, як правіла, беларусы, — кажа кіраўнік парку і тлумачыць. — Нашы людзі працуюць на гэтых прадпрыемствах з заробкам больш з дзве тысячы 700 рублёў, што вышэй сярэдняга заробку па краіне больш, чым у два разы.
Цікавая і геаграфія экспарту кампаній-рэзідэнтаў. Цяпер прадукцыя пастаўляецца на экспарт у 20 краін свету і летась даход (паводле статыстыкі за 9 месяцаў) склаў 64 мільёны долараў.
— Выручка ў нашых рэзідэнтаў вырасла больш, чым у два разы, але пры гэтым экспартная выручка (ад прадукцыі, вывезенай за межы Беларусі) вырасла больш, чым у тры разы, — падкрэслівае Аляксандр Ярашэнка і тлумачыць. — Ідзе актыўнае прасоўванне прадукцыі на экспарт, то-бок наша прадукцыя — экспартаарыетаваная. А значыць, яна якасная, карыстаецца попытам і гатова канкурыраваць на знешніх рынках.
Працягваючы тэму эканамічнага эфекту, кіраўнік Кітайска-Беларускага індустрыяльнага парка «Вялікі камень» упэўнены, што лічбы па чыстым прыбытку па выніках года значна палепшацца.
— Улічваючы ў цяперашні час актыўную інвестыцыйную стадыю развіцця нашага праекта (будуюцца заводы, насычаюцца абсталяваннем, выпускаецца першая прадукцыя), летась мы атрымалі станоўчы эканамічны эфект непасрэдна рэзідэнтамі, — падкрэслівае Аляксандр Ярашэнка і выказвае спадзяванні, што такі дынамічны пачатак адаб’ецца на перспектывах развіцця гэтага амбіцыйнага праекта.
Расказваючы аб інфраструктуры парка, яго кіраўнік звярнуў увагу на выставачны комплекс, дзе летась праходзіла выстаўка «Белагра-2021».
— У нас ёсць, што паказаць і расказаць, аб праекце можна казаць гадзінамі, — кажа з усмешкай суразмоўнік. — Больш за тое, у нас з’явіўся цудоўны аб’ект — інавацыйны цэнтр, які мае форму васьмёркі і займае амаль 19 тысяч «квадратаў».
Гэта пяціпавярховы будынак з адным нулявым (пад зямлёй) і чатырма паверхамі, які будаваўся за сродкі тэхніка-эканамічнай дапамогі Кітая. У ім ёсць адмысловая дэманстрацыйная зала, у якой плануецца арганізацыя выстаўкі прадукцыі кампаній-рэзідэнтаў.
— Але самае галоўнае, дзеля чаго ён ствараўся і будаваўся, — пад новае заканадаўства для суб’ектаў інавацыйнай дзейнасці, так званыя стартапы, — кажа суразмоўнік. — На два гады мы ім даем ільготныя перавагі, якімі карыстаюцца рэзідэнты парка, але яны пакуль не рэзідэнты. Чалавек прыходзіць з ідэяй. Мы даем месца, фінансавую падтрымку, тэхнічнае суправаджэнне і гэтак далей, ён ні за што не плаціць, аднак павінен прайсці абарону сваёй ідэі.
Тлумачачы задуму такога кроку, Аляксандр Ярашэнка звяртае ўвагу, што гэта выдаткі ў будучыню:
— Мы суправаджаем старпаты ад ідэі да камерцыйнага ўвасаблення, каб потым яны сталі нашымі рэзідэнтамі: для нас важны інавацыйны шлях развіцця.
Паводле яго слоў, летась з трох такіх стартапаў быў зарэгістраваны адзін рэзідэнт, які займаецца дакладным земляробствам.
— Праект вельмі цікавы і накіраваны на кропкавае нанясенне ў зямлю хімікатаў і ўгнаенняў, — рэзюмуе кіраўнік адміністрацыі парку.
На мінулай пазачарговай сёмай сесіі Савета Рэспублікі быў разгледжаны праект Закона Рэспублікі Беларусь «Аб змяненні законаў па пытаннях дзейнасці Кітайска-Беларускага індустрыяльнага парка «Вялікі камень»
У прыватнасці, на пасяджэнні была акцэнтавана ўвага, што «Вялікі камень» прывабны адмысловымі фінансавымі ўмовамі, развітой інфраструктурай, лагістыкай і геаграфічным месцазнаходжаннем. Пра што сведчыць стабільны і паступальны рост колькасці рэзідэнтаў (на 10 — 15% у год) і вытворчасцяў, якія ствараюцца.
Парк створаны для прыцягнення ў нашу краіну найвышэйшых тэхналогій. Для гэтага рэзідэнты Парку павінны аператыўна, па месцы знаходжання ў парку атрымліваць неабходныя дазволы і іншыя дакументы, патлумачылі сутнасць прапанаваных змен у Пастаяннай камісіі Савета Рэспублікі па рэгіянальнай палітыцы і мясцовым самакіраванні.
У абгрунтаванні неабходнасці прыняцця змен звяртаецца ўвага, што дадзены законапраект накіраваны на ўдасканаленне прававых адносін у індустрыяльным парку, што дасць магчымасць забяспечыць аператыўнасць ажыццяўлення адміністрацыйных працэдур і, як следства, палепшыць інвестыцыйны клімат.
Праектам Закона пашыраецца кампетэнцыя дзяржаўнай установы «Адміністрацыя Кітайска-Беларускага індустрыяльнага парка «Вялікі камень» у галіне выкарыстання і аховы нетраў, а таксама найменні геаграфічных аб’ектаў.
Сенатары цалкам пагадзіліся з прапанаванымі навацыямі.
Вольга АНУФРЫЕВА
Фота: БелТА, belgazprombank.by
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
