Міграцыйны крызіс на беларуска-польскай мяжы прадаўжаецца. Наведваючы 26 лістапада транспартна-лагістычны цэнтр каля пагранперахода “Брузгі” на Гродзеншчыне, дзе размешчаны бежанцы, Аляксандр Лукашэнка заявіў: у Беларусі гатовыя зрабіць усё для людзей, якія трапілі ў пастку на мяжы.
Тыя, хто цікавіцца падзеямі ў Беларусі, ведаюць: драма разгарнулася на беларуска-польскай мяжы ў лістападзе. Сотні бежанцаў з Ірака, Сірыі ды іншых краін Блізкага Усходу, дзе прадаўжаюцца ваенныя дзеянні, спрабавалі разам з дзецьмі праз Беларусь, беларуска-польскую мяжу трапіць у Заходнюю Еўропу, Германію: каб уратавацца там ад бяды. Аднак польскія сілавікі жорстка, сілай, з грубымі парушэннямі і міжнародных пагадненняў, і элементарных законаў чалавечай маралі пачалі выцясняць бежанцаў са сваёй тэрыторыі. На Гродзеншчыне беларускія пагранічнікі зафіксавалі дзясяткі такіх антыгуманных выпадкаў, у тым ліку і з чалавечымі ахвярамі. У прымежных раёнах Польшчы аб’яўлена цяпер надзвычайнае становішча, там сканцэнтраваныя ваенныя сілы. Хвалі бежанцаў ніяк не могуць прабіць глухую сцяну Еўрасаюза, і ўрэшце няшчасныя людзі вымушаныя былі стварыць стыхійны лагер прама на беларуска-польскай мяжы. Іх колькасць перавышала тры тысячы, сярод бежанцаў шмат дзяцей, жанчын (ёсць і цяжарныя).
Больш за тыдзень таму стала зразумела, што на мяжы завязаўся тугі вузел праблем і хутка яго не развязаць. Тады па даручэнні Прэзідэнта ў транспартна-лагістычным цэнтры побач з пагранпераходам “Брузгі” (які цяпер закрыты) быў створаны часовы пункт размяшчэння бежанцаў. Дзякуючы намаганням беларускага боку там створаны неабходныя бытавыя ўмовы: людзі ў цяпле, маюць начлег і ежу. Разгорнута і палявая лазня, пры неабходнасці аказваецца меддапамога. Бежанцам рэгулярна дастаўляюць гуманітарную дапамогу: да збору яе падключаны сотні валанцёраў па ўсёй краіне.
Прэзідэнт Беларусі Аляксандр Лукашэнка, наведваючы 26 лістапада транспартна-лагістычны цэнтр, агледзеў там пункт раздачы прадуктаў харчавання. Цікавіўся: ці на ўсіх цяпер хапае прадуктаў. Кіраўнік дзяржавы сустрэўся з прадстаўнікамі Чырвонага Крыжа, гутарыў з бежанцамі, якія не губляюць надзею трапіць у краіны Еўрасаюза, потым і выступіў перад імі, адказваў на пытанні. “Праўда ў тым, што мы ні ў якім разе не будзем гуляць і рабіць палітыку на вашых лёсах”... “У Беларусі гатовы зрабіць усё для бежанцаў, якія трапілі ў бяду”... Такая пазіцыя кіраўніка дзяржавы, які ўпэўнены ў пераадоленні міграцыйнага крызісу на мяжы. Ён адзначыў, што з Беларусі ўжо было эвакуявана на радзіму каля тысячы мігрантаў. “Але я хачу, каб вы ведалі. Мы ні ў якім разе не будзем вас затрымліваць, грузіць у самалёты і адпраўляць на радзіму, калі вы таго не хочаце”.
Для тых, хто жадае глыбей зразумець сутнасць крызісу на беларуска-польскай мяжы, раім паглядзець эксклюзіўнае інтэрв’ю Прэзідэнта Беларусі Аляксандра Лукашэнкі брытанскай медыякампаніі ВВС. Поўная версія інтэрв’ю – на ютуб-канале “АТН: новости Беларуси и мира” па спасылцы https://www.youtube.com/watch?v=FMd1Zk7CbXE&t=1s .
Іван Ждановіч
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».