Кіраўнікі вядучых канфесій Рэспублікі Беларусь прынялі зварот да палітыкаў еўрапейскіх дзяржаў і вернікаў у сувязі з міграцыйным крызісам на беларуска-польскай граніцы.
Подпісы пад дакументам паставілі мітрапаліт Мінскі і Заслаўскі Веніямін, Патрыяршы Экзарх усяе Беларусі, арцыбіскуп мітрапаліт Мінска-Магілёўскі Рымска-каталіцкай царквы Іосіф Станеўскі, муфцій Мусульманскага рэлігійнага аб’яднання Абу-Бекір Шабановіч, галоўны рабін Рэлігійнага аб’яднання абшчын прагрэсіўнага іудаізму Рыгор Абрамовіч.
«Трагічныя падзеі, звязаныя з міграцыйным крызісам, якія адбываюцца цяпер на міралюбівай і шматпакутнай беларускай зямлі, чалавечае гора і боль тысяч людзей, якія замярзаюць на межах нашых дзяржаў, заахвоцілі нас звярнуцца да вас, — гаворыцца ў дакуменце. — Асноўныя сусветныя рэлігіі прапаведуюць любоў да бліжняга свайго і заклікаюць да міласэрнасці, дабра і спачування: Слова Божае кажа нам аб тым, што вандроўнікі мы перад Ім і «прышэльцы, як і ўсе бацькі нашыя, як цень дні нашыя на зямлі і няма нічога трывалага».
«Мы, кіраўнікі вядучых канфесій Рэспублікі Беларусь, звяртаемся да палітыкаў сучасных эканамічна развітых і паспяховых еўрапейскіх дзяржаў. Не віна гэтых людзей, што яны, пакінуўшы свае родныя землі, дзе ідуць ваенныя дзеянні, шукаюць лепшага лёсу для сябе і сваіх дзяцей. Не віна іх у тым, што ад безвыходнасці і страху яны, пераадольваючы тысячы кіламетраў, разнастайныя цяжкасці і пазбаўленні, змушаныя шукаць прытулак у іншых краінах.Шлях да сваёй лепшай будучыні ў Еўропе гэтыя людзі шукаюць праз Беларусь.Людзі ўсіх нацыянальнасцяў і веравызнанняў жадаюць жыць пад мірным небам і бачыць усмешкі на тварах дзяцей», — гаворыцца ў звароце.
У дакуменце адзначаецца: «Зусім хутка хрысціянскі свет запяе славу нарадзіўшамуся Хрысту. Многія дамы будуць упрыгожаны да Божага Нараджэння, сімвалізуючы жаданне прыняць народжанага Бога ў сваім сэрцы. Чакаючы літасці і цудаў Божых у сваім жыцці, пераймаючы Творцу, мы можам утварыць цуд самі. Гэты перыяд адыходзячага года ва ўсіх традыцыйных рэлігіях вернікі больш актыўна робяць справы дабрачыннасці, міласэрнасці і дапамогі тым, хто жыве ў нястачы, прысвячаючы іх Богу, што ў гэтым годзе мы паднясём у дар Богу? Бо ў кожнага бежанца, які чакае вырашэння свайго лёсу на еўрапейскай мяжы, ёсць свая асабістая трагедыя. Іх слёзы, якія праліліся ад болю на роднай зямлі, працягваюць пралівацца».
«Кожны чалавек, створаны па вобразу і падабенству Божаму, мае права быць пачутым і зразуметым, жыць у міры, быць упэўненым у сваім заўтрашнім дні і будучыні сваіх дзяцей, — адзначылі кіраўнікі канфесій Беларусі. — У чаканні Ражства Хрыстова і Новага года заклікаем палітыкаў, усіх вернікаў і проста неабыякавых людзей Еўропы да мудрасці, міласэрнасці і спагады, да выратавання людзей, якія знаходзяцца без прытулку, у стане роспачы. Мы ўсе заклікаемся словам Божым да найхутчэйшага вырашэння сітуацыі, якая склалася — даць ім не толькі надзею і параду, а неабходную дапамогу і магчымасць рэалізаваць свае спадзяванні».
«Сёння мы павінны задумацца: а што чакае нас у недалёкай перспектыве? што будзе заўтра? Бо кожнаму з нас належыць даць адказ перад Госпадам за свае дзеі, бо на зямлі мы толькі прышэльцы і падарожнікі. Хай будзе з усімі намі мір і Божае благаслаўленне!» — гаворыцца ў звароце кіраўнікоў вядучых канфесій Рэспублікі Беларусь.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.