Ірына Курачкіна — чэмпіёнка Еўропы

Важныя спартыўныя навіны.

1. Падчас першага Нацыянальнага форуму атлетаў адбыліся выбары новага саставу камісіі спартсменаў НАК Беларусі. У камісію ўвайшлі алімпійскі чэмпіён па веславанні на каноэ Аляксандр Багдановіч, прызёр чэмпіянатаў свету і Еўропы па мастацкай гімнастыцы Кацярына Галкіна, беларускі хакеіст, памочнік галоўнага трэнера ХК «Дынама-Мінск» Міхаіл Грабоўскі, старшы трэнер нацыянальнай каманды па акадэмічным веславанні, першая двухразовая алімпійская чэмпіёнка ў гісторыі Рэспублікі Беларусь Кацярына Карстэн, алімпійскі чэмпіён па тэнісе Максім Мірны, алімпійская чэмпіёнка ў лыжнай акрабатыцы (фрыстайл) Ала Цупер.

З 20 прэтэндэнтаў на форуме выбралі шэсць, а яшчэ чатыры будуць названыя паводле выканкама НАК, пасля чаго новы састаў камісіі прагаласуе за кандыдатуру старшыні.

2. У Варшаве прайшоў чэмпіянат Еўропы па барацьбе. На кантынентальным першынстве беларуская каманда заваявала сем медалёў. Ірына Курачкіна (57 кг) заваявала «золата» турніру. Сярэбранымі прызёрамі сталі прадстаўнікі грэка-рымскага стылю Кірыл Маскевіч (87 кг) і Радзік Куліеў (82 кг). Бронзавыя медалі ў актыве Алі Шабанава (86 кг) і Хаджы Раджабава (92 кг), а таксама Веранікі Івановай (62 кг) і Мікалая Стадуба (97 кг).

Сёння беларускія барцы маюць сем ліцэнзій для ўдзелу ў Алімпійскіх гульнях у Токіа. Наступным важным стартам для спартсменаў стане сусветны алімпійскі адборачны турнір, які пройдзе з 6 да 9 мая ў Балгарыі. На гэтых спаборніцтвах беларусы выступяць у шасці вагавых катэгорыях у вольнай барацьбе, а ў жаночай і грэка-рымскай — у пяці.

3. Беларускія баксёры выйгралі чатыры ўзнагароды на міжнародным турнірны «Кубак губернатара Санкт-Пецярбурга — 2021». Самае паспяховае выступленне паказаў прадстаўнік Гомельскай вобласці Уладзіслаў Смяглікаў (91 кг), які заваяваў «серабро». У гэтай жа катэгорыі бронзавым прызёрам стаў яшчэ адзін беларус Уладзіслаў Брадзецкі. У катэгорыі 63 кілаграмы «бронзу» заваяваў Дзмітрый Асанаў. Сярод баксёраў вагай 75 кілаграмаў бронзавым прызёрам стаў Віталь Бандарэнка.

4. Правы крайні гандбольнай зборнай Беларусі Мікіта Вайлупаў уваходзіць у тройку найлепшых снайпераў адборачнага турніру чэмпіянату Еўропы 2022 года. У трох праведзеных паядынках 6-й кваліфікацыйнай групы Мікіта Вайлупаў закінуў 30 мячоў: 14 разоў у вароты Латвіі (39:27), 11 — у італьянскія вароты (37:32) і 5 — у вароты нарвежскай каманды (33:25). Больш за беларуса закінулі толькі Кай Сміт (Нідэрланды) і Андзі Шмід (Швейцарыя), у якіх па 35 дакладных кідкоў.

5. Беларускія плыўцы разыгралі медалі чэмпіянату краіны і ўстанавілі шэраг рэкордаў. Ангеліна Малашчанка двойчы ўстанавіла юніёрскі рэкорд Беларусі на дыстанцыі 50 метраў брасам. У папярэднім заплыве спартсменка прыплыла да фінішу за 31,86 секунды, а ў фінальным — за 31,85 секунды. Іван Буевіч абнавіў юніёрскі рэкорд на дыстанцыі 50 метраў на спіне — 25,52 секунды. Алеся Акінчыц на дыстанцыі 1500 метраў вольным стылем абнавіла ўласны юніёрскі рэкорд — 17.11,54 секунды, а пасля ўстанавіла рэкорд на дыстанцыі 800 метраў вольным стылем (8.53,16 секунды). Жаночы квартэт у складзе Настассі Куляшовай, Аліны Змушкі, Настассі Шкурдай і Настассі Каракоўскай аднавіў рэкорд у камбінаванай эстафеце на дыстанцыі 4х100 метраў — 4.03,61.

На чэмпіянаце Беларусі спартсмены выканалі нарматывы для ўдзелу ў Алімпійскіх гульнях у Токіа. Аліна Змушка на дыстанцыі 100 метраў брасам абнавіла нацыянальны рэкорд (1.07,01 секунды) і заваявала ліцэнзію на Гульні. Сваю другую пуцёўку ў алімпійскі Токіа заваявала і Настасся Шкурдай, на дыстанцыі 100 метраў на спіне яна паказала найлепшы вынік.

Валерыя СЦЯЦКО