Вы тут

Для добрых стартаў. У Мінску з'явілася яшчэ адна ўнікальная спартыўная пляцоўка


Яна размясцілася ў Партызанскім раёне сталіцы па вуліцы Ваўпшасава і ўжо паспела прыцягнуць мноства аматараў як зімовых, так і летніх відаў спорту. Месца лыжаролернай трасы было вызначана тут яшчэ ў 2013 годзе, а ўчора адбылося яе ўрачыстае адкрыццё пасля рэканструкцыі, побач з трасай з'явіліся два новыя спартыўныя аб'екты: пляцоўка з вулічнымі трэнажорамі і пляцоўка для стральбы. Паспрабаваць сябе тут ужо можа любы ахвотны.


У рамках цырымоніі адкрыцця новага аб'екта сталіцы прайшлі паказальныя выступленні ролераў дзяржаўнай установы адукацыі «Цэнтр дадатковай адукацыі дзяцей і моладзі «Вікторыя» і адкрытая трэніроўка спартсменаў установы «Дзіцяча-юнацкая спартыўная школа па лыжных відах спорту» галоўнага ўпраўлення фізічнай культуры, спорту і турызму Мінгарвыканкама.

Даўжыня ўсяго маршруту лыжаролернай трасы складае два з паловай кіламетры і ўяўляе сабой паласу для каньковага ходу з лыжнёй для класічнага ходу побач. Шырыня яе складае 4-5 метраў. Здзейсніць шпацыр па трасе тут можна не толькі днём, але і ўвечары — для зручнасці ўздоўж дарожкі ўстаноўлены асвятляльныя мачты, таксама ёсць пункт пракату спартыўнага інвентару.

— Партызанскі раён з'яўляецца самым маладым у горадзе, але сёння тут 342 аб'екты для заняткаў спортам, — расказаў кіраўнік Адміністрацыі Партызанскага раёна Валерый ВАРАНІЦКІ. — Яшчэ адзін з іх — гэта дарожка, рэканструяваная для катання на ролікавых каньках, яна прыстасаваная для людзей з абмежаванымі магчымасцямі. Пабудаваны сучасныя раздзявальні, пункт пракату і цір. Я спадзяюся, што жыхары раёна і горада ацэняць гэты аб'ект, і на ім вырастуць годныя людзі і добрыя спартсмены.

Дзякуючы рэканструкцыі аб'ект абзавёўся адкрытым стрэльбішчам на 16 установак, дзе змогуць трэніравацца юныя біятланісты. Мадэрнізаваны пункт пракату: тут замянілі мэблю і абсталяванне, зрабілі ўчастак для сушкі і захоўвання абутку з ролікавымі канькамі і лыжамі, рабочыя месцы для рамонту лыжаў і ролікаў. Арганізавана зона захоўвання рэчаў наведвальнікаў, якія прыйдуць на трасу са сваім інвентаром.

— Перш за ўсё я хачу выказаць шчырую падзяку Адміністрацыі Партызанскага раёна за гэтую трасу для катання на ролікавых каньках. Я ведаю, якой працы патрабавала яе будаўніцтва. Спадзяёмся, гэта ацэняць жыхары горада і асабліва маладое пакаленне, прадстаўнікі якога хутка ўвойдуць у лік нашых лыжнікаў і біятланістаў, — адзначыў старшыня Беларускай федэрацыі біятлона, заслужаны трэнер Беларусі па біятлоне Андрыян ЦЫБУЛЬСКІ.

Адзначым, што маса новых спартыўных аб'ектаў з'яўляецца па ўсёй краіне. Напрыклад, на гэтым тыдні ў Навагрудку адкрыўся фізкультурна-аздараўленчы комплекс «Лідар». Цяпер там ёсць спартыўная зала з трыбунамі на 750 глядацкіх месцаў, 25-метровы басейн, зала барацьбы, трэнажорная і фітнес-залы, памяшканні для заняткаў лёгкай атлетыкай, настольным тэнісам, а таксама кафэ. Побач размешчаны дзве пляцоўкі для гульні ў пляжны футбол і валейбол, варкаўт-комплекс, абсталяваны пляж і аўтастаянка. Забяспечана даступнасць для асоб з інваліднасцю: ёсць ліфт, у басейне — спецыяльны пад'ёмнік, маюцца сродкі візуальнай і тактыльнай інфармацыі. Адзначым, што комплекс прызначаны не толькі для юных атлетаў: тут можа займацца любы ахвотны. Гараджане даўно марылі аб сучасным аб'екце для заняткаў фізкультурай і спортам.

«Штогод мы адкрываем некалькі такіх спартыўных збудаванняў. Напрыклад, у Гродзенскай вобласці ў пачатку гэтага года аналагічны комплекс пачаў працаваць у Астраўцы, — адзначыў на адкрыцці аб'екта ў Навагрудку міністр спорту і турызму Беларусі Сяргей Кавальчук. — У планах — будаўніцтва ФАКа ў Слоніме. Да канца ліпеня скончыцца рэканструкцыя плавальнага басейна ў Смаргоні. Пастаўлена задача, каб у кожным раённым цэнтры былі падобныя аб'екты, і мы паступова рухаемся да вызначаных мэт».

Таксама на гэтым тыдні ўрачыста адкрылі новую футбольную пляцоўку ў Дуброўне, яна размешчана ў густанаселеным мікрараёне горада, памер поля складае 20 на 40 метраў. Яго з'яўленне будзе спрыяць развіццю футбола — вядучага ў раёне віду спорту.

Дар'я ЛАБАЖЭВІЧ

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.