Вы тут

Як супрацоўнічаюць Беларусь і Вялікабрытанія


Актывізаваць двухбаковае супрацоўніцтва Беларусі і Вялікабрытаніі дапамогуць міжпарламенцкія кантакты

Пра гэта ішла размова падчас сустрэчы спікера верхняй палаты беларускага парламента Наталлі Качанавай з Надзвычайным і Паўнамоцным Паслом Аб'яднанага Каралеўства Вялікабрытаніі і Паўночнай Ірландыі Жаклін Перкінс, якая адбылася на мінулым тыдні ў Савеце Рэспублікі.


Вітаючы госцю, Наталля Качанава адзначыла, што Беларусь заўсёды разглядала Вялікабрытанію як краіну, з якой у нас складваюцца добрыя стасункі. Апошнім часам інтэнсіфікаваўся двухбаковы палітычны дыялог, а таксама гандлёва-эканамічныя адносіны, што вельмі важна, падкрэсліла яна. «Гэта сведчыць пра тое, што ў нашых краін ёсць патэнцыял да ўзаемадзеяння і супрацоўніцтва», — звярнула ўвагу спікер беларускага парламента.

Калі звярнуцца да лічбаў, то за 11 месяцаў 2019 года агульны тавараабарот склаў 2,4 мільярда долараў, з іх экспарт — 2,2 мільярда, імпарт — 0,3 мільярда долараў. Сальда, як бачым, станоўчае — 1,9 мільярда. Што мы пастаўляем? Большай часткай гэта нафтапрадукты, азотныя ўгнаенні, металаканструкцыі, мэбля і іншыя тавары. А завозім рухавікі ўнутранага згарання, аўтамабілі, часткі для іх і трактароў, лекі, марожаную рыбу.

Дарэчы, Аб'яднанае Каралеўства займае другую пазіцыю (пасля Расіі) па аб'ёме прыцягнутых у беларускую эканоміку прамых замежных інвестыцый. Гэтая лічба за тры леташнія кварталы склала 1,4 мільярда долараў. У нашай краіне створана 211 арганізацый з брытанскім капіталам.

— Мы разлічваем на тое, што нашы добрыя стасункі будуць працягнуты і ў дзелавой, і ў палітычнай, і ў міжпарламецкай сферы, — падкрэсліла Наталля Качанава. — Патэнцыял для далейшага супрацоўніцтва ў нас вялізны.

Важным, на яе думку, з'яўляецца і наладжаны дыялог паміж парламентарымі. У парламентце Беларусі дзейнічае міжпарламенцкая група сяброўства, якую ўзначальвае член Савета Рэспублікі Алег Румо. У 2017-м упершыню адбыўся візіт дэлегацыі парламента Вялікабрытаніі ў нашу краіну, і беларускі бок разлічвае на працяг такіх кантактаў.

— Гэта вельмі важна, бо парламентарыі могуць многае, у тым ліку інтэнсіфікаваць адносіны, якія сёння выбудоўваюцца ў палітычнай і эканамічнай прасторы, — упэўнена спікер Савета Рэспублікі.

Асобна яна падзякавала Аб'яднанаму Каралеўству за тую дапамогу, якая была аказана пасля трагедыі на Чарнобыльскай АЭС і датычылася аздараўлення беларускіх дзяцей у гэтай краіне: з той пары амаль 10 тысяч хлопчыкаў і дзяўчынак пабывалі ў Вялікабрытаніі.

— Гэта цудоўны прыклад супрацоўніцтва, — падкрэсліла яна. — Калі маладыя людзі бачаць, як жывуць у іншай краіне, адчуваюць добрае стаўленне — гэта сведчыць пра тое, што ў нашых адносін, безумоўна, ёсць будучыня.

У сваю чаргу, Жаклін Перкінс падзякавала за цёплы прыём і пагадзілася з тым, што двухбаковыя адносіны паміж краінамі маюць добрыя магчымасці для далейшага развіцця. На ўзаемавыгаднае супрацоўніцтва, безумоўна, уплываюць і міжпарламенцкія кантакты, якія яна як дыпламат плануе актывізаваць у найбліжэйшай перспектыве. Для гэтага разглядаецца магчымасць арганізацыі візіту ў рамках адпаведнай групы дружбы членаў парламента Вялікабрытаніі ў Беларусь, каб замацаваць і яшчэ больш пашырыць гэтыя кантакты.

Вольга АНУФРЫЕВА

Фота БелТА

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.