Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» традыцыйна расказваем пра самыя актуальныя падзеі выхадных.


1. Зборная Беларусі не змагла прабіцца ў фінал Кубка Федэрацый, прайграўшы ў паўфінале зборнай Аўстраліі. У першы дзень спаборніцтваў на корце Раt Rаftеr Аrеnа Арына Сабаленка ва ўпартай барацьбе абыграла Саманту Стосур — 7:5, 5:7, 6:3, а Вікторыя Азаранка саступіла Эшлі Барці — 6:7 (2:7), 3:6. У нядзелю дзяўчаты памяняліся ролямі, Арына саступіла Эшлі Барці — 6:2, 6:2, а Вікторыя была мацнейшай за Саманту Стосур — 6:1, 6:1.

Усё вырашылася ў парнай сустрэчы, у якой былі задзейнічаны ўсё тыя ж спартсменкі. Беларускі не змаглі перайграць больш тытулаваны і дасведчаны менавіта ў парным разрадзе тандэм — 5:7, 6:3, 2:6.

— Свой адзіночны матч я правяла на высокім узроўні. І ў цэлым на працягу двух гульнявых дзён мы паказвалі тэніс высокага ўзроўню, — дзеліцца Вікторыя Азаранка. — Я атрымлівала задавальненне гуляць у такой атмасферы, гуляць за нашу краіну. Гуляць у камандзе — гэта зусім іншыя адчуванні, таму я вельмі рада быць тут. Спадзяюся, балельшчыкам таксама спадабалася наша гульня. У пары мы згулялі матч вельмі высокага ўзроўню. Калі казаць пра нюансы, то не хапае крыху сыгранасці, таму мы будзем аналізаваць гэта і вучыцца на сваіх памылках. Дзяўчаты гулялі некалькі гадоў без мяне, на жаль, і цяпер у мяне ёсць магчымасць вяртацца ў зборную. Хоць мы і прайгралі, але я пакідаю гэты матч з усмешкай, таму што ведаю, што гэта пачатак будучага, калі мы гэтага захочам. Арына вельмі моцна дадала з таго моманту, калі мы апошні раз з ёй гулялі, адсюль мы будзем рухацца толькі ўверх. Будзем старацца дзесьці гуляць разам, каб да Алімпіяды быць гатовымі, таму што гэта важна для нашай краіны і нас абедзвюх.

— Я што магла, то і зрабіла, можна было, вядома, і лепш, але атрымалася так, як ёсць, — каментуе выступленне Арына Сабаленка. — У пары мы выдатна гулялі, выдатны ўзровень гульні, неверагодная атмасфера, мы атрымлівалі асалоду ад барацьбы. Вядома, хацелася перамагчы, а каму не хочацца выйграць, але сёння яны выйгралі, а заўтра мы іх. Гэта тэніс, мяч круглы.

У фінале цяперашняга сезона 9—10 лістапада зборная Аўстраліі згуляе са зборнай Францыі.

2. Беларускі экіпаж капотнага МАЗа пад кіраваннем Сяргея Вязовіча перамог у ралі-рэйдзе Mоrоссо Dеsеrt Сhаllеngе. Другое месца з 22-хвілінным адставаннем заняў спартсмен з Нідэрландаў Петэр Верслейс на грузавіку MАN. Трэцім завяршыў марафон МАЗ Аляксея Вішнеўскага, прайграўшы партнёру па камандзе 25 хвілін.

«Заўсёды прыемна перамагаць, асабліва калі спаборнічаеш з такімі сур'ёзнымі сапернікамі. Гонка аказалася вельмі складанай і цікавай. Мы прывязём дадому не толькі чэмпіёнскі тытул, але і багаты вопыт, які зможам прымяніць на любым ралі-рэйдзе, у якой бы частцы свету ён ні праходзіў», — расказаў лідар каманды «МАЗ-СПОРТаўта» Сяргей Вязовіч.

3. Хакеісты юніёрскай зборнай Беларусі паспяхова выступаюць на чэмпіянаце свету ў вышэйшым дывізіёне. На старце першынства наша каманда перамагла аднагодкаў з Чэхіі і Фінляндыі з аднолькавым лікам 4:3 і забяспечыла сабе пуцёўку ў плэй-оф. У паядынку 3-га тура папярэдняй групы А падапечныя Яўгена Есаулава саступілі галоўным фаварытам турніру камандзе Канады з буйным лікам 1:11, а ўвечары ў панядзелак правяла свой заключны паядынак першага этапу супраць хакеістаў Швейцарыі.

Пасля завяршэння групавога раўнда па чатыры наймацнейшыя каманды працягнуць барацьбу за ўзнагароды, а горшыя дружыны двух квінтэтаў паспрачаюцца за права застацца ў эліце ў серыі да дзвюх перамог.

4. Згуляны матчы 4-га тура чэмпіянату краіны па футболе. Салігорскі «Шахцёр» перамог на выездзе «Гомель» з лікам 1:0, «Энергетык-БДУ» на сваім полі здолеў даць бой аднаму з фаварытаў турніру брэсцкаму «Дынама», згуляўшы ўнічыю — 1:1. Вынікі астатніх сустрэч: «Мінск» — «Дняпро» — 0:0, «Нёман» — «Віцебск» — 1:0, «Славія» — БАТЭ — 1:2, «Гарадзея» — «Тарпеда-БелАЗ» — 0:3, «Тарпеда» (Мінск) — «Дынама» (Мінск) — 0:1, «Слуцк» — «Іслач» — 1:3 .

Становішча ў групе лідараў пасля чатырох тураў: «Шахцёр» — 12 ачкоў, «Дынама» (Мінск) — 10, «Дынама» (Брэст) — 10, БАТЭ — 9, «Іслач» — 9.

Дар'я ЛАБАЖЭВІЧ

Загаловак у газеце: Усё яшчэ будзе!

Выбар рэдакцыі

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.

Грамадства

Як жывуць апошнія жыхары вёскі Вясневічы

Як жывуць апошнія жыхары вёскі Вясневічы

Галоўная славутасць Вясневічаў, яе жывая гісторыя — 96-гадовы Аляксей Юркевіч.

Культура

Наталля Батракова: Чытачы пішуць, што мае героі нібыта працуюць у суседнім офісе

Наталля Батракова: Чытачы пішуць, што мае героі нібыта працуюць у суседнім офісе

З Наталляй Батраковай мы сустрэліся на адкрыцці абноўленай кнігарні «Светач», што на сталічным праспекце Пераможцаў, 11.