Беларускія гоншчыкі возьмуць удзел у мараканскім ралі-рэйдзе Desert Challenge, які па ўзроўні складанасці супастаўны з сусветна вядомым «Дакарам». Каманда «МАЗ-СПОРТаўта» паедзе на марафон двума экіпажамі і першы раз выставіць капотны грузавік, прадстаўлены ў канцы мінулага года. Дэбют адбудзецца ў Марока з 12 да 20 красавіка.
Большая частка маршруту праляжа па пустыні і пясчанай мясцовасці. Гоншчыкам падрыхтавалі 2741 км спецучасткаў, падзеленых на восем этапаў. Сярод перашкод — дзюны, мяккія пяскі і высахлыя рэчышчы рэк. «Цяпер усё больш кажуць, што «Дакар» можа вярнуцца ў Афрыку. Калі гэта адбудзецца, то мы павінны мець большае ўяўленне аб рэльефе і клімаце. Удзел у Morocco Desert Challenge якраз дазволіць атрымаць новы вопыт і апрабаваць спартыўныя грузавікі на гарачым кантыненце», — растлумачыў кіраўнік каманды «МАЗ-СПОРТаўта» Сяргей Вязовіч.
Беларусь на гонцы прадставяць два экіпажы. Сяргей Вязовіч паедзе за рулём капотнага спартыўнага грузавіка, кампанію яму складуць штурман Антон Запарошчанка і механік Сяргей Сачук. Другі экіпаж павядзе Аляксей Вішнеўскі разам са штурманам Паўлам Гараніным і механікам Віталём Мурылёвым.
У камандзе адзначаюць, што Вязовіч выступіць, хутчэй, пілотам-выпрабавальнікам: праверыць у гонцы капотнік, каб ужо ў Мінску давесці канструкцыі да дасканаласці. Калі «самы прыгожы МАЗ» пакажа сябе з найлепшага боку, то трапіць на «Дакар-2020». «Пасля тэстаў у Астрахані мы павысілі надзейнасць некаторых частак капотнага МАЗа. Аднак першы гоначны вопыт ён атрымае ў Марока. Па выніках мы будзем разумець, гатовы капотнік да сур'ёзных ралі-рэйдаў або патрабуе дапрацоўкі», — адзначыў Сяргей Вязовіч.
Дар'я ЛАБАЖЭВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
