Вы тут

Прэзідэнт не задаволены тым, як у рэгіёнах выконваецца «матрыца задач»


Кіраўнік дзяржавы правёў нараду па актуальных пытаннях рэгіянальнага развіцця.


«У апошні час быў праведзены шэраг маштабных мерапрыемстваў, на якіх разгледзелі стан спраў і паставілі першачарговыя задачы для розных сфер эканомікі, — нагадаў Аляксандр Лукашэнка. — Абмеркаваны пытанні жыллёва-камунальнай гаспадаркі, аграпрамысловага комплексу, будаўніцтва. Гэтыя галіны шмат у чым вызначаюць стан беларускай эканомікі, а таксама яе магчымасці вырашаць сацыяльныя задачы».

Акрамя таго, дадаў ён, у выніку былі падпісаны тры Дырэктывы — своеасаблівыя «дарожныя карты» для АПК, будаўніцтва і ЖКГ, якія ўстанаўліваюць сістэмныя задачы і неабходныя для іх вырашэння інструменты.

Таксама намечаны шляхі ўдасканалення сістэмы адукацыі і перспектывы беларускай навукі.

«Вызначаны выразныя этапы паскарэння развіцця рэгіёнаў. Мы дамовіліся на працягу двух гадоў забяспечыць паскоранае сацыяльна-эканамічнае развіццё адразу 11 буйных гарадоў, — сказаў Прэзідэнт. — Сёння перад урадам і губернатарамі стаіць задача забяспечыць рэалізацыю ўсіх прынятых дамоўленасцяў, планаў і дырэктыў на месцах».

Такім чынам, агульная мэта дадзеных праграмных рашэнняў — дасягненне годнага ўзроўню і якасці жыцця нашых грамадзян.

Безумоўна, падмурак паспяховага развіцця дзяржавы — моцная эканоміка. «Я ўжо шмат разоў казаў: калі ў нас і будуць нейкія праблемы — толькі тады, калі ў нас будзе дрэнна працаваць эканоміка», — сказаў ён.

Таму, патлумачыў Аляксандр Лукашэнка, перш за ўсё неабходна развіваць эканоміку рэгіёнаў, ствараць там рабочыя месцы з годным узроўнем зарплаты.
«Удзел вертыкалі ўлады ў дасягненні гэтай мэты ацэньваецца па выкананні пэўных задач. Мы яе назвалі матрыцай», — сказаў кіраўнік дзяржавы.

Усё не па плане

І якія вынікі? Па-першае, пераважная большасць абласцей у мінулым годзе не дасягнула планавых лічбаў па валавым рэгіянальным прадукце і вытворчасці працы.

«Некаторыя рэгіёны не выканалі заданні па экспарце тавараў, прыцягненні прамых замежных інвестыцый. І ніхто не знізіў узровень выдаткаў на вытворчасць і рэалізацыю прадукцыі. Гэта значыць, асноўныя паказчыкі эфектыўнасці праваленыя. У гэтым годзе яшчэ не ўсімі губернатарамі забяспечваецца выкананне тых планаў, якія мы перад сабой намецілі. Але сёння важныя не столькі аб’ёмы вытворчасці, колькі яе эфектыўнасць і канчатковы вынік — прыбытак і рэнтабельнасць», — падкрэсліў ён.

Беларускі лідар звярнуў увагу, што значная частка прадпрыемстваў па-ранейшаму працуе са стратамі.

Дзе праекты і інвестыцыі?

«Другое. Не выбудаваная сістэмная праца з інвестарамі, — адзначыў Прэзідэнт. — Відавочна, з кожным інвестарам трэба працаваць індывідуальна. Колькі з іх мы страцілі за кошт сваёй цяганіны, бюракратызму і адсутнасці рашучасці выканаць задачу».

Вядома, што ўсе рэгіёны падпісалі дамовы з кітайскімі правінцыямі і гарадамі. Многія кіраўнікі неаднаразова бывалі ў гэтай краіне.

«Дзе праекты і інвестыцыі? — пацікавіўся Аляксандр Лукашэнка. — Нават па наяўных інвестпраектах праца вядзецца няякасна. Не выконваюцца тэрміны рэалізацыі, аддача ад іх вельмі нізкая».

«Як я ўжо падкрэсліваў, нам не патрэбны інвестыцыі дзеля інвестыцый. Патрэбны вытворчасці заўтрашняга дня, новыя тавары і тэхналогіі. Патрэбна разыначка на кожным прадпрыемстве. Варта генераваць новыя ідэі, укараняць ноу-хау, выпускаць запатрабаваную на рынку прадукцыю», — дадаў ён.

Тэма занятасці і своечасовай выплаты заробкаў — пад асаблівым кантролем

Трэцяе — большасць рабочых месцаў, якія ствараюцца ў краіне, не належаць да высокапрадукцыйных і прадугледжваюць нізкую кваліфікацыю работнікаў і невысокі ўзровень заработнай платы.

«Хоць адна з першарадных задач мясцовых органаў улады — арганізацыя вытворчасцей менавіта з паглыбленай перапрацоўкай сыравіны і атрыманне экспартаарыентаванай і імпартазамяшчальнай прадукцыі з высокім дабаўленым коштам. Я яшчэ раз падкрэсліваю: інвестыцыі — не дзеля інвестыцый. Інвестыцыі павінны быць такія, якія пакідаюць штосьці ў краіне. Да нас шмат прыходзіць інвестараў, якія просяць поўнае вызваленне ад падаткаў, сацыяльных абавязацельстваў і іншае. Пытанне: навошта нам патрэбныя такія прадпрыемствы? Яшчэ і зарплату плацяць мізэрную», — сказаў беларускі лідар.

Па яго словах, прыйшоў той перыяд, калі інвестар павінен прыходзіць да нас у краіну і працаваць на агульных умовах. Льготы павінны атрымліваць толькі тыя інвестары, у кім «мы жыццёва зацікаўлены». 

Акрамя таго, ён дадаў, што ў раёнах і гарадах павінны быць створаны ўмовы і стымулы для прыцягнення працоўных рэсурсаў пад патрэбнасць эканомікі рэгіёнаў.

«Чацвёртае. Не выконваюцца мае патрабаванні па росце зарплаты. Больш за тое, яна яшчэ і выплачваецца не ў час. І гэта адказнасць прэм’ер-міністра і першага віцэ-прэм’ера», — адзначыў Прэзідэнт.

У 2018 годзе толькі 10 з 128 раёнаў і гарадоў мелі зарплату вышэй за сярэднюю па краіне. На Магілёўшчыне няма ніводнага такога раёна ці горада. 

«Вы ведаеце, што тэма занятасці і своечасовай выплаты заробкаў — пад маім асаблівым кантролем. І сваіх жорсткіх установак у гэтым пытанні мяняць я не маю намеру, таму што людзі хочуць кожны дзень есці і ў нешта апрануць дзяцей, каб адправіць у школу або дзіцячы сад», — падкрэсліў Аляксандр Лукашэнка.

Самавольнае будаўніцтва

Пятае — у будаўнічым комплексе не забяспечваецца апераджальнае развіццё інжынернай і транспартнай інфраструктуры, а таксама стварэнне аб’ектаў сацыяльнай сферы. Напрыклад, у Бараўлянах сёння ў дзіцячых дашкольных установах дэфіцыт месцаў.

Кіраўнік дзяржавы звярнуў увагу, што па-ранейшаму адзначаюцца факты самавольнага будаўніцтва, пра якія мясцовая ўлада, магчыма, пазнае толькі са сродкаў масавай інфармацыі.

«Наогул я сумняваюся, што гэтая самая мясцовая ўлада пра гэта не ведала да таго, як у сродках масавай інфармацыі гэта прагучала», — сказаў ён.

Сітуацыя з пасяўной

«Шостае. Веснавыя палявыя работы пачаліся з праблем. Губернатарам ужо даўно трэба было вызначыць выразны, дэталёвы (наколькі гэта магчыма) план дзеянняў па правядзенні гэтай самай пасяўной кампаніі. Ад вывазу арганікі на палі і да завяршэння ўсіх палявых работ. Правалаў у гэтым годзе быць не павінна», — заявіў ён.

Беларускі лідар заклікаў спыніць спісваць усе свае пралікі на надвор’е, паколькі ў нашай краіне дастаткова сіл і сродкаў, каб пасеяць у любое надвор’е.

Прэзідэнт нагадаў, што гаспадаркі павінны быць забяспечаны тэхнікай, палівам, мінеральнымі ўгнаеннямі і насеннем. Ён падкрэсліў, што наш урад выпадае з нейкіх кампаній. У сувязі з гэтым кіраўнік дзяржавы заклікаў прэм’ер-міністра, віцэ-прэм’ера і міністра фінансаў зняць пытанні ўгнаенняў, тэхнікі, калі неабходна, і фінансавання. На працягу гэтага тыдня ўсе пытанні, якія залежаць ад урада, павінны быць знятыя.

«Але больш за ўсё мяне турбуе і насцярожвае, што месцамі ў правядзенні палявых работ няма элементарнага парадку. Я хачу, каб губернатары і ўся вертыкаль улады зрабілі адпаведныя высновы з падзей Магілёўскай вобласці і іншых рэгіёнаў. Рэгіёны з рук прэч дрэнна падрыхтаваліся да гэтай кампаніі. Ці бачыце, вясна рана прыйшла, не разварушылася», — канстатаваў Аляксандр Лукашэнка.

Як паведамляюць Генеральная пракуратура і МУС, перад пачаткам пасяўных работ 503 адзінкі тэхнікі знаходзіліся ў непрацоўным стане і не падлягаюць аднаўленню. Паўтары тысячы адзінак не прайшлі тэхагляд. Больш за тры тысячы машын і агрэгатаў спісаныя, да гэтага часу не здадзены на металалом і захоўваюцца з парушэннем правілаў.

«У некаторых гаспадарках у перыяд асноўных работ трактароў і камбайнаў пад плотам не менш, чым у полі. Як гэта выглядае ў жыцці, вы таксама бачылі ў «Купалаўскім». І як захоўваецца вельмі дарагая тэхніка, вы таксама бачылі», — сказаў ён.

Рабіць, але па тэхналогіі

Асобную ўвагу кіраўнік дзяржавы надаў захаванню рэгламентаў і нарматываў. Ён у чарговы раз звярнуў увагу, што безумоўнае выкананне тэхналогіі — гэта аснова асноў поспеху ў АПК, але гэта датычыцца ўсіх сфер.

«Які вынік вы плануеце атрымаць, калі пад яравую сяўбу мінеральных угнаенняў назапашана толькі палова ад патрэбы. А ў Віцебскай і Магілёўскай абласцях, дзе ў нас земляробства на «вышэйшым» узроўні, аж чвэрць. Кожны год праблема з нарыхтоўкай кармоў, умовамі іх закладкі і захоўвання. Даходзіць да таго, што зімой вада ў паілках жывёл замярзае. Я не ведаю, як вы поіце гэтых жывёл. Спачатку парушаем тэхналогію вытворчасці, ну а потым трэба ж твар захаваць, займаемся прыпіскамі», — падкрэсліў Аляксандр Лукашэнка.

У 2018 годзе ні адна вобласць не справілася з выкананнем даручэння па нарыхтоўцы паўтарагадовага запасу травяных кармоў. У выніку ў асобных раёнах іх пачынаюць завозіць з іншых рэгіёнаў ужо да канца лістапада. Спіс такіх гаспадарак павінен ляжаць на стале ў Прэзідэнта, аб гэтым дамаўляліся па восені.

«Вось гэтыя ўсе перавозкі, гэтая ўся лагістыка — гэта выдаткі. Адсюль недахоп грошай на бягучыя патрэбы. У выніку цяперашняе фінансавае становішча шэрагу арганізацый не дазваляе павысіць прывабнасць сельскай працы, якая застаецца адноц з самых нізкааплатных. І хто, скажыце, пойдзе туды працаваць, на такую заработную плату? — справядліва заўважыў кіраўнік дзяржавы. — Павінна быць найжорсткая дыктатура тэхналогій, вытворчай дысцыпліны. Пра гэта мы гаворым ледзь не на кожнай нарадзе. Але, як вы, я думаю, адчулі, ніхто нікога ўгаворваць больш не будзе».

Беларускі лідар падкрэсліў: яму надакучыла безгаспадарчасць. Сёлетні год — год азелянення і навядзення парадку, таму краіна павінна тануць у кветках і зеляніне. Уздоўж аўтамабільных дарог, на пустках і тэрыторыях, якія не выкарыстоўваюцца, павінны расці дрэвы і хмызнякі.

Узяць тыя ж дарогі — зеляніна ўздоўж дарог, гэта практычна, менш касіць. Па гэтым пытанні кіраўнік дзяржавы спытае з кожнага памочніка па абласцях і Мінску.

«Гэта, у рэшце рэшт, наша візітная картка. Вам трэба навесці парадак раз і назаўжды. Тады будуць людзі разумець, які парадак павінен быць і як яго падтрымліваць», — дадаў ён.

«Хацелася б сёння пачуць ад губернатараў, што перашкаджае безумоўна выконваць задачы, якія пастаўлены, мы ўжо разжавалі гэтыя праблемы, далей няма куды. Якія фактары перашкаджаюць развіццю рэгіёнаў?» — спытаў ён.

Кіраўнік дзяржавы таксама пацікавіўся ў прысутных, што неабходна зрабіць для іх эфектыўнага і збалансаванага развіцця ў доўгатэрміновай перспектыве? Як плануецца скарачаць рэгіянальныя адрозненні ва ўзроўні і якасці жыцця насельніцтва?

«Яшчэ раз прашу: без усялякіх самасправаздач. Не час», — сказаў Прэзідэнт.


Уладзімір Краўцоў: Ёсць неабходнасць заняцца ў сельскай гаспадарцы нечым новым

Па выніках нарады з журналістамі пагутарыў старшыня Гродзенскага абласнога выканаўчага камітэта.

Ён адзначыў, што ў вобласці актыўна ідуць усе веснавыя палявыя работы. «Працуюць усе гаспадаркі вобласці. Асаблівасць гэтага года — ранняя вясна, вельмі сухое надвор'е, таму трэба паспець у час усё зрабіць. Сяўба ранніх яравых, збожжавых — ужо практычна напалову адсеяліся, — сказаў ён. — Разам з тым, адчуваецца недахоп асобных пазіцый. Дарэчы , сёння мы ў Прэзідэнта абмеркавалі пытанні паліва, знойдзена рашэнне».

Што тычыцца новых напрамкаў у рабоце, а таксама стварэння высокапрадукцыйных працоўных месцаў, як з гэтымі пытаннямі ідуць справы ў Гродзенскай вобласці? Паводле слоў старшыні Гродзенскага аблвыканкама, пры шэрагу тых традыцыйных прадуктаў, якія вырабляюцца ў сельскай гаспадарцы, ёсць неабходнасць заняцца нечым новым, тым больш, што змяняецца клімат. Гэта і вінаград, і кавуны — нягледзячы на скепсіс пэўных асобаў, станоўчы вопыт тут ёсць. У той жа Гродзенскай вобласці ёсць праект, які развіваецца замежнымі кампаніямі, па вытворчасці клубніцы. У мінулым годзе пачала працаваць прыватная фабрыка па вытворчасці грыбоў.

У прамысловасці, лічыць Уладзімір Краўцоў, складаней. «Не так проста ўжыць высокія тэхналогіі, павінны быць інвестары, адпаведныя ўмовы. Мы гэтым шляхам таксама ідзем з шэрагам замежных кампаній», — дадаў ён.

Уладзіслаў ЛУКАШЭВІЧ

Фота БЕЛТА

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.