З вёскі Кавальцы Дзяржынскага раёна звярнуліся крыху збянтэжаныя дачнікі: паводле іх слоў, недзе з мінулых серады-чацвярга не працуюць тэлефоны. Кажуць, быццам падчас палявых работ недзе плугамі пашкодзілі тэлефонны кабель.
Як адзначылі самі заяўнікі, часовае знікненне сувязі з вонкавым светам — гэта, можна сказаць, для іх і не праблема. Цяпер жа ў кожнага мабільны тэлефон як мінімум. Іншая справа, што ўжо колькі дзён у мясцовай краме нельга было разлічыцца па банкаўскай картцы: тэрмінал там працуе ад тэлефоннай сувязі.
Намеснік начальніка Дзяржынскага раённага вузла электрасувязі Аляксандр Якаўлеў адразу пацвердзіў: так, згаданая праблема маецца, над яе вырашэннем зараз працуюць спецыялісты. На момант, калі дачнікі і мясцовыя жыхары ў Кавальцах атрымаюць гэты нумар газеты, сувязь у іх ужо павінна быць адноўлена.
— Падчас правядзення сельскагаспадарчых работ на полі плугі моцна заглыбіліся і парвалі тэлефонны кабель. Апошні знаходзіцца на балансе мясцовай гаспадаркі. Пакуль шукалі месца парыву — а ён атрымаўся вялікім, недзе пад сто метраў, — вырашалі іншыя пытанні (кабель аплаціла гаспадарка, работы праводзіў раённы вузел электрасувязі), вось і прайшоў час, — распавёў Аляксандр Вячаслававіч. — Што тычыцца часовай праблемы з разлікамі па банкаўскай картцы, дык трэба памятаць — такія збоі, на жаль, раз-пораз бываюць і з іншых прычын.
Зрэшты, як дадаў далей суразмоўца, непасрэдна да іх нашы заяўнікі не звярталіся. Калі б хто з насельнікаў Кавальцоў меў патрэбу, у раённым вузле электрасувязі маглі б выдаць ахвотным у часовае карыстанне бесправадныя тэлефоны.
Сяргей РАСОЛЬКА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.