Інстытут члена акружной камісіі з правам дарадчага голасу спросціць работу палітычных партый падчас будучых выбараў у Палату прадстаўнікоў. Такое меркаванне выказала старшыня Цэнтральнай камісіі па выбарах і правядзенні рэспубліканскіх рэферэндумаў Лідзія ЯРМОШЫНА на ўчарашнім пасяджэнні Цэнтрвыбаркама.
Працаваць з апанентамі
«Думаю, гэта спросціць работу для палітычных партый — значыць у іх будзе не адзін прадстаўнік пры афіцыйнай выбарчай акрузе, а гіпатэтычна іх можа быць і 110, — адзначыла Лідзія Ярмошына. — Гэта магчыма, калі партыя вылучыла сваіх прадстаўнікоў па 110 акругах».
На яе думку, такое новаўвядзенне на будучых парламенцкіх выбарах — урок талерантнасці і ўмення працаваць з апанентамі. Перш за ўсё, гэта тычыцца мясцовых улад.
«Мясцовыя выбарчыя органы павінны будуць працаваць з прадстаўнікамі апазіцыйных структур як са сваімі калегамі і вучыцца слухаць іншы пункт гледжання», — заўважыла старшыня Цэнтральнай камісіі.
Яна таксама звярнула ўвагу, што да парламенцкай кампаніі зменены парадак аспрэчвання ўсіх канкрэтных сітуацый, якія ўзнікаюць падчас выбараў. Так, калі раней адмова ў рэгістрацыі кандыдата ў дэпутаты магла абскарджвацца толькі ў Цэнтральнай камісіі, а далей рашэнне Вярхоўнага суда з'яўлялася канчатковым, то зараз рашэнне акруговай камісіі абскарджваецца ў тэрытарыяльнай камісіі, рашэнне абласной тэрытарыяльнай камісіі — у абласным (мінскім гарадскім) судзе. Пры гэтым рашэнне суда абласнога ўзроўню з'яўляецца канчатковым. Ні ў Цэнтральную камісію, ні ў Вярхоўны суд справа не ідзе.
Нагадаем, на сёлетніх выбарах кандыдат у дэпутаты не зможа стаць даверанай асобай іншага кандыдата, а вылучацца можна будзе толькі па адной акрузе. Адна з найважнейшых навел датычыцца падвядзення вынікаў выбараў — яно спрашчаецца. Раней выбары ў парламент маглі праходзіць у два туры, цяпер жа на іх распаўсюджваецца прынцып адноснай большасці.
Назіральнікаў запросіць МЗС
Падчас размовы з журналістамі старшыня ЦВК адзначыла, што Міністэрствам замежных спраў з нагоды выбараў будуць накіраваны афіцыйныя лісты ў міжнародныя арганізацыі, якія займаюцца маніторынгам і з'яўляюцца найбольш аўтарытэтнымі ў гэтай галіне.
«Яны будуць самастойна фарміраваць місіі, — заўважыла яна. — Гэта могуць быць місіі АБСЕ, СНД, Савета Еўропы. Еўрапарламент таксама заяўляе пра сваё жаданне. Гэта ўжо, у прынцыпе, структура Еўрапейскага саюза».
Што да Цэнтрвыбаркамаў краін Еўрасаюза, то беларускі ЦВК накіроўвае запрашэнні толькі дзвюм еўрапейскім камісіям — Літвы і Латвіі.
Рэкамендацыі БДІПЧ АБСЕ ўлічаны часткова
Па словах Лідзіі Ярмошынай, ужо на працягу цяперашняй выбарчай кампаніі наша краіна ўлічыць частку рэкамендацый БДІПЧ АБСЕ, якія былі дадзены пасля правядзення ў Беларусі прэзідэнцкіх выбараў.
«Па выніках прэзідэнцкіх выбараў БДІПЧ АБСЕ было дадзена 30 рэкамендацый, 22 з іх патрабуюць унясення змяненняў у выбарчае заканадаўства, — паведаміла старшыня Цэнтральнай камісіі. — Мы не можам зрабіць гэта цяпер, паколькі стартуе новая выбарчая кампанія. Аднак частка прапаноў будзе рэалізавана ў выглядзе паляпшэння правапрымяняльнай практыкі».
На ўчарашнім пасяджэнні зацвярджаліся метадычныя рэкамендацыі для ўчастковых выбарчых камісій. У прыватнасці, у дакуменце змяшчаецца норма аб тым, што назіральнікі могуць прысутнічаць пры падліку галасоў, вызначана месца іх знаходжання каля стала для падліку галасоў, іх правы і абавязкі. «Паляпшэнне сітуацыі з доступам назіральнікаў да працэдуры падліку галасоў — гэта і ёсць паляпшэнне правапрымяняльнай практыкі, якое мы можам зрабіць у рамках рэкамендацый БДІПЧ», — сказала Лідзія Ярмошына.
Акрамя таго, будзе павышана празрыстасць пры разглядзе выбарчых спрэчак. Гэта азначае, што ўсе рашэнні выбарчых камісій, прынятыя ў сувязі са скаргамі, павінны публікавацца ў інтэрнэце — размяшчацца на сайце. Яшчэ адна абавязковая ўмова — павышэнне галоснасці, дыскусійных пасяджэнняў выканаўчых органаў пры зацвярджэнні складу выбарчых камісій.
«Тыя навелы, якія ўвайшлі ў метадычныя тлумачэнні, гэта, перш за ўсё, рэкамендацыі міжнародных выбарчых экспертаў», — сказала старшыня Цэнтрвыбаркама. Яна таксама падкрэсліла, што ўказанне ЦВК з'яўляецца абавязковым да выканання камісіямі на месцах.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
