Дзетдомаўскае братэрства

Вёска Веснава, як, дарэчы, і любая іншая, мае сваю гісторыю. Сёння яна больш вядомая з-за рэспубліканскага дома-інтэрната для дзяцей з асаблівасцямі псіхафізічнага развіцця. А некалі...

Многія не ведаюць, што некалі ў драўляных бараках тут быў дзетдом.

Архіўных дакументаў пра яго стварэнне вельмі мала. Са слоў сведак вядома, што так званая дзіцячая хата была адчынена ў былым маёнтку Ліпкі абшарніка Быкоўскага ў 1935 годзе, што першымі выхаванцамі яе сталі дзеці так званых «ворагаў народа», прычым не толькі з Беларусі, але і з Украіны, а першым дырэктарам — Міхась Бейкін. Яго жонка Ева працавала тут жа выхавальніцай...

Пасля вызвалення Глуска і раёна ад нямецка-фашысцкіх захопнікаў у Веснаўскай дзіцячай хаце знайшлі прытулак сіроты. Дзяржава, як магла, клапацілася пра іх, але яны працавалі таксама. Пры ўстанове заўсёды была дапаможная гаспадарка — з агародам і садам, з коньмі і каровамі, са свіннямі. Дзеці такім чынам змалку прывыкалі клапаціцца пра іх, вучыліся даглядаць і працаваць. Спачатку яны атрымлівалі сямігадовую адукацыю, затым абавязковай стала васьмігадовая, пасля чаго выпускнікі выходзілі ў самастойнае жыццё, раз'язджаліся па многіх краінах былога Савецкага Саюза. Але пры гэтым пры любой магчымасці яны прыязджалі ў Веснава, сустракаліся з тымі, хто стаў для іх блізкім. І паміж сабой падтрымлівалі сувязь, марылі выдаць кнігу пра гісторыю Веснаўскай дзіцячай хаты. Розных матэрыялаў для яе ўжо шмат, але ж калі нехта з чытачоў «Звязды» падзеліцца сваімі, кніга толькі выйграе.

Валерый Васілеўскі,

г. Глуск.