Удзельнікі легендарнай будоўлі распавядаюць, як разам з магістраллю «ўзводзілі» ўласныя лёсы
Калі адгарнуць старонкі гісторыі на 40 гадоў назад, можна ўбачыць, як будавалася Байкала-Амурская магістраль. У 1974 годзе пачаўся дзесяцігадовы рамантычны перыяд будаўніцтва, калі чыгуначная лінія з вектарам на Усход пракладвалася сапраўды ўдарнымі тэмпамі. За гэты час тысячы людзей дакрануліся да адной з самых маштабных будоўляў мінулага стагоддзя. «Звязда» зазірнула ў сямейны фотаальбом тых юнакоў і дзяўчат, лёс якіх вызначыла кароткая абрэвіятура з невымерным зместам — БАМ.
«Куды ты едзеш? Ты ж дзяўчына»
Таццяна Міхайлаўна Галабурда дагэтуль не разумее, як ёй, дзяўчыне з паўднёва-ўсходніх рэгіёнаў Украіны, давялося жыць там, дзе ўжо 25 верасня трэба апранаць футра. Яе асабістая гісторыя, як і шмат іншых, разгортвалася па вядомым савецкім сцэнарыі.
— Пасля заканчэння васьмі класаў мы з бацькамі вырашылі, што я буду паступаць у Ясінавацкі тэхнікум транспартнага будаўніцтва. Якую спецыяльнасць выбраць, нават не ўяўляла. Прыехалі з мамай у тэхнікум, праглядзелі плакаты.
Даспадобы прыйшлася выява каменшчыцы. «Будаваць — значыць ствараць», — падумалася тады. У 15 гадоў я мала што разумела. Паказала на плакат і пайшла здаваць экзамены, — з самаіроніяй успамінае Таццяна Міхайлаўна.
Паспяхова вытрымаўшы іспыты, студэнтка Таццяна пачала спасцігаць азы грамадзянскага і прамысловага будаўніцтва. Вучыцца было няцяжка. Праўда, з-за пастаянных трэніровак і спартыўных спаборніцтваў вучоба нярэдка адыходзіла на другі план. Таму, калі надышоў час размеркавання, прэтэндаваць на месца ў Мінску, Маскве альбо Данецку выпускніцы не давялося.
— Прапанавалі Чалябінск, але я катэгарычна была супраць. І тут якраз сяброўка прыбегла ды захоплена пачала расказваць пра БАМ. «Паехалі, Танька! Што ты губляеш?» Падумала — і праўда, такі варыянт выглядае нашмат прывабней, чым «уральскі». Тым больш у Іркуцку жылі мае дзве сястры і брат. Таму сумаваць не прыйшлося б.
Бацькі, вядома, не так натхнёна ўспрынялі рашэнне дачкі. Тата стрымана круціў галавой, паўтараючы: «Куды ты едзеш? Ты ж дзяўчына». Маму ж Таццяна пашкадавала, даслаўшы ў лісце кароткае: «Гэта не я зрабіла выбар. Мяне туды пасылаюць».
— Помню, як садзілася ў цягнік і дзелавіта казала сабе: «Тры гады выкрасліць з жыцця!» Аднак, калі разабрацца, бамаўскі час стаў найлепшым у маім жыцці.
Добрай раніцы, БАМ!
Сем дзён і начэй у дарозе з вясёлай шумнай кампаніяй. Менавіта тут Таццяна Міхайлаўна ўпершыню пакаштавала гарбату па расійскім рэцэпце — з лімоннай кіслатой.
— Помню, камусьці з хлопцаў маці дала з сабой пяцілітровы слоік згушчанага малака. Толькі ўявіце, якім дзівам гэта было ў 1975 годзе! Папрасілі ў правадніка гарбаты, дабавілі туды малака. А яно звярнулася. «Мабыць, няякаснае», — расчараваліся мы, выкінуўшы пяць літраў дэфіцыту. І толькі праз некалькі гадоў жыцця на БАМе зразумелі, што такі эфект дае спалучэнне малака з лімоннай кіслатой.
Будоўля стагоддзя сустрэла маладое папаўненне маркотнай дажджлівай раніцай і адразу зацягнула ў вір штодзённай працы. Свой БАМаўскі шлях Таццяна Міхайлаўна пачала з работы маляром. Атынкаваць сцены дамоў, паклеіць шпалеры — здаецца, дэталі, аднак менавіта з такіх элементарных дробязяў узрастала маштабная інфраструктура БАМа. Хаця напачатку самім рабочым прыйшлося жыць у звычайных будаўнічых вагончыках, з двума імправізаванымі пакоямі і печкай-буржуйкай. Харчаваліся ў сталоўцы. Ваду прывозілі ў бочках. Хаця пітная вада там знаходзілася літаральна пад нагамі. Падкалупнеш зямлю — і ўтвараецца крыштальна чыстая лужыца, праўда, ад хвоі занадта горкая.
Усё ж паўсюль суцэльная тайга.
— Канешне, спачатку жыць у такіх умовах было нязвыкла. Аднак у маладосці не вельмі надаеш гэтаму ўвагу. Усё здавалася натуральным. А калі атрымала першы сур'ёзны заробак, набыла першыя туфлі на абцасах і святочную сукенку... Аказалася, што шкадаваць мне няма пра што. БАМ, зразумела, вельмі добра забяспечвалі, каб людзі туды ехалі і маглі «змарнаваць» заробленыя грошы. Някепскія, дарэчы.
Брыгада Таццяны Міхайлаўны ніколі не сядзела без працы. «Нават сама хадзіла да кіраўніцтва і прасіла для нас які-небудзь новы аб'ект», — прызнаецца субяседніца. Так яна ў добрым сэнсе патрапіла «на аловак». А пасля на пасаду інжынера.
— Лічу, што мне вельмі пашчасціла ў жыцці, — працягвае Таццяна Міхайлаўна. — З простага люду я выйшла ў інжынеры. Пачынаць давялося з нуля. У тэхнікуме я рабіла чарцяжы, аднак ніколі не паглыблялася ў праектныя падрабязнасці. Першы месяц калегі дапамагалі разабрацца ў справе. А пасля так зацікавілася, што не магла кінуць яе.
«...І адразу закахалася»
Акрамя рэальнага будаўнічага, існавала, канешне, і пазапрацоўнае жыццё. Паказвалі кіно, ладзілі канцэрты, спаборнічалі ў спорце, праводзілі камсамольскія зборы. На адным з такіх пасяджэнняў Таццяна Міхайлаўна ўбачыла свайго будучага мужа — беларуса Аляксея Іванавіча Галабурду.
— Ён падымае вочы. Я глянула ў іх — і адразу закахалася, — сарамліва распавядае суразмоўца. — Праз колькі дзён пазнаёміліся. Хутка будзе 40 гадоў, як мы разам.
Аляксей Іванавіч, не баючыся перамен і рызыкі, разам з сябрамі адправіўся на будаўніцтва Зейскай гідраэлектрастанцыі. Хтосьці са знаёмых падказаў, што на БАМе заробкі нашмат вышэйшыя. Так ён пераехаў у Тынду. З «айчыннай» прафесіі хіміка Аляксей Іванавіч спачатку перакваліфікаваўся ў бетоншчыка, а пасля — у сталяра і цесляра.
— Працавалі ўсе мы без пафасу, — дзеліцца Таццяна Міхайлаўна. — Адчування ўсесаюзнай значнасці будоўлі не было, хоць яно навязвалася. Мы прыехалі сюды для таго, каб проста падзарабіць.
За восем «БАМаўскіх» гадоў маладая сям'я Галабурдаў прыдбала не толькі новыя прафесіі, але і двух дзяцей — сына і дачку. У пачатку 1980-х магутнае будаўніцтва БАМа пачало павольна, але ўпэўнена згасаць. Колькасць працоўных месцаў скарачалася. Да таго ж сын Юра моцна захварэў. Тындзенскія ўрачы настойліва рэкамендавалі зрабіць яму аперацыю ў Брэсце, і Галабурды прынялі рашэнне вярнуцца дадому, на малую радзіму Аляксея Іванавіча.
— Аляксей без цяжкасцяў знайшоў сабе працу, маючы такі досвед. А вось мяне тут ніхто не чакаў. Уладкавацца па спецыяльнасці не атрымалася. Было крыўдна, бо я прыехала добра падрыхтаваным інжынерам. Аднак перавагу аддавалі новаспечаным, але родным спецыялістам. Тры гады я прасядзела без працы. Пасля пайшла ў калгас на запраўку, куды ніхто з мясцовых ісці не хацеў.
Таццяна Міхайлаўна памятае, як холадна было на новым месцы працы. Памяшканне не ацяплялася. Адзінай крыніцай цяпла ў ім сталі прывезеныя з БАМа дублёнкі і футра. Яны і сёння вісяць у шафе як маўклівы напамін пра сібірскую старонку жыцця. Адтуль жа — добры стос фотаздымкаў і медаль за будаўніцтва БАМа.
— Шчыра кажучы, я адчувала гонар ад таго, што працавала на БАМе. Аднак ніколі гэтым не выхвалялася. Некаторыя жартавалі з мяне. Станавілася няёмка, але я ніколі не крыўдзілася. Праўда, неяк на свята Перамогі мне прыйшло ў галаву начапіць медаль. Прыйшла ў краму. Прадавец уважліва паглядзела на мяне і кажа: «У мяне таксама такі ёсць, толькі за поспехі ў гандлі. Чаму я яго не нашу?» Мне стала вельмі сорамна, і з таго часу я нікому не паказвала той медаль.
Наогул, Таццяна Міхайлаўна і Аляксей Іванавіч не вельмі часта распавядаюць пра свой БАМаўскі час: не бачаць у ім вялікай значнасці. Магчыма, у маштабах сусвету гэта так і ёсць.
— Толькі аднойчы я была на сустрэчы выпускнікоў нашага курса. Мой куратар тады спытала мяне, ці шкадую, што рызыкнула паехаць на БАМ. «Ніколі!» — упэўнена адказала я. Не варта шкадаваць пра маладосць!
За гады, што аддзялілі жыццё ад БАМаўскіх успамінаў, Таццяна Міхайлаўна не разгубіла ні кроплі сваёй ранейшай энергічнасці. Час выходзіць на пенсію мінуў тры гады таму, але яна не шукае сабе спакою. Працуе прарабам, вучыцца ездзіць на матацыкле і... быццам імкнецца вярнуцца ў тую сваю маладосць. Аляксей Іванавіч ад жонкі не адстае: працуе на металургічным прадпрыемстве і з асаблівай пяшчотай чакае ў госці сваю малодшую ўнучку Мілану.
Любоў КАСПЯРОВІЧ.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.