Кіраўск рыхтуецца стаць сталіцай «Дажынак‑2014» для раёнаў Магілёўскай вобласці
Святочныя мерапрыемствы адбудуцца адначасова ў Кіраўску і аграгарадку Мышкавічы. Прычым пачнуцца яны 19 верасня раённымі «Дажынкамі» і закончацца 20‑га абласнымі. На рэканструкцыю аб'ектаў сацкультбыту і жыллёвага фонду, а таксама добраўпарадкаванне тэрыторый выдаткавана, паводле інфармацыі Камітэта па архітэктуры і будаўніцтве Магілёўскага аблвыканкама, амаль 82 мільярды рублёў. У тым ліку 20 мільярдаў з рэспубліканскага бюджэту.
Яшчэ 21 мільярд выдаткаваў лідар па жніве ў Кіраўскім раёне — СВК «Рассвет». За кошт гэтых сродкаў цалкам адновяць 11 шматкватэрных дамоў у Кіраўску, раённы Дом культуры, мышкавіцкі Дом культуры і шмат іншых будынкаў; яшчэ на шэрагу аб'ектаў вядзецца бягучы рамонт. Акрамя гэтага, у Кіраўску заменяць водаправодную сетку і пакладуць асфальт на 8 вуліцах. Яшчэ 9 вуліц заасфальтуюць у Мышкавічах. Падрыхтаваны і план культурных мерапрыемстваў.
— Мы чакаем гасцей на святы хлеба, сала, мёду, бульбы і рыбы, — паведаміў начальнік аддзела ідэалагічнай работы, культуры і па справах моладзі Кіраўскага раёна Андрэй Карпук. — Запланаваны спартыўнае свята, выстаўка сельгастэхнікі, шматлікія канцэрты. Будуць працаваць сельгаспадворкі, конная школа, дзіцячыя атракцыёны. Я ўжо не кажу пра гандлёвыя рады, якіх будзе вельмі шмат.
З раёнаў вобласці ў Кіраўску чакаюць каля 600 афіцыйных гасцей, якія прыедуць у складзе дэлегацый. Дасланы запрашэнні першым асобам дзяржавы і вобласці, а таксама кіраўніцтву гарадоў-пабрацімаў з Бранскай і Белгародскай абласцей.
Між тым на Магілёўшчыне ў кожным райцэнтры святкуюцца свае асобныя «Дажынкі». У гэтую суботу перадавікоў віншуюць у Клічаўскім раёне. У аграгарадку Новыя Максімавічы разгорнецца кірмаш, у якім прымуць удзел аграпрамысловыя прадпрыемствы раёна і творчыя калектывы. Жыхары пазмагаюцца за званне «Мядовага караля» і «Уладара сяла», прымуць удзел у конкурсах-выставах на лепшую страву і хлебны каравай, прадэманструюць самыя буйныя ўзоры вырашчанай сваімі рукамі садавіны і гародніны.
Нэлі ЗІГУЛЯ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?