Усяго за 20 хвілін ад цэнтра сталіцы, на Мінскім моры, з'явіўся сучасны яхт-клуб
Парусны цэнтр адначасова з'яўляецца спартыўна-забаўляльным комплексам, які ўключае ў сябе яхт-клуб, дзіцяча-юнацкую спартыўную школу, гасцявы дом, пункт пракату і рэстаран.
Да пачатку работы цэнтра было прымеркавана правядзенне міжнароднай рэгаты "Адкрыты Кубак "Бульбашъ" у класе яхт "ЭМ-Ка". Спаборніцтвы прайшлі ў мінулыя выхадныя і мелі статус адборачнай рэгаты да чэмпіянату Расіі. У гэтым годзе ў рэгаце ўзялі ўдзел 14 экіпажаў, з іх 10 каманд з Расіі і 4 — з Беларусі.
Старшыня Беларускай федэрацыі паруснага спорту Ігар Рачкоўскі таксама стаў удзельнікам рэгаты ў складзе аднаго з экіпажаў, у які ўвайшлі Сяргей Краўцоў і Ігар Чорны.
На адкрыцці спартыўнага цэнтра старшыня федэрацыі распавёў пра тое, як будаваўся аб'ект і што ён значыць для развіцця паруснага спорту ў нашай краіне.
— У Беларусі заўсёды была магутная федэрацыя паруснага спорту. Практычна трэць спартсменаў зборнай СССР — гэта прадстаўнікі нашай краіны. Аднак пасля распаду Саюза з-за розных абставін сітуацыя змянілася: у Беларусі, па сутнасці, быў адзін цэнтр паруснага спорту ў Мінску і некалькі аддзяленняў — у Гомелі і Гродне. Перад намі стаяла першачарговая задача — вярнуць нашых кваліфікаваных спецыялістаў, трэнераў з-за мяжы і пачаць ствараць неабходную матэрыяльна-тэхнічную базу. Першы з тых, хто адгукнуўся, — гэта Аляксандр Шпілько (сёння ён з'яўляецца галоўным трэнерам нацыянальнай зборнай) і Генадзь Страх, які да таго часу паспяхова працаваў у Славеніі.
Мы забяспечылі гэтую базу дошкамі для серфінгу і купілі яхты класа "Аптыміст". На сёння закуплена каля 200 суднаў розных класаў. Наступным этапам развіцця стала будаўніцтва паруснага цэнтра. Каля двух гадоў таму тут стаяла некалькі вагончыкаў. Вакол пясок, дзецям немагчыма было нават нармальна пераапрануцца. Нацыянальная каманда, дарэчы, таксама месцілася ў чыгуначным вагончыку. Але ў нас з'явіўся сур'ёзны спонсар — кампанія "Бульбашъ", і на працягу двух гадоў гэтая тэрыторыя змянілася. Кошт аб'екта — каля 5 мільёнаў долараў. Кампанія пабудавала дзіцячую школу і парусны цэнтр. Гэтае супрацоўніцтва прыемна здзівіла ў плане сваёй сацыяльнай адказнасці. Заключыўшы з намі інвестдагавор, кампанія адразу ж прыступіла да будаўніцтва аб'екта, адклаўшы пры гэтым свае праекты.
Ігар Рачкоўскі адзначыў, што цяпер акваторыя Мінскага мора і інфраструктура сучаснага паруснага цэнтра па ўсіх параметрах падыходзіць для таго, каб праводзіць чэмпіянаты свету. У 2017 годзе павінен адбыцца еўрапейскі кангрэс паруснага спорту. Чакаецца, што Беларусь наведае прэзідэнт федэрацыі.І ў гэтым жа годзе плануецца правесці ў нашай краіне юнацкі чэмпіянат Еўропы, у якім прымуць удзел 49 краін.
Сёння акваторыя Мінскага мора разлічана на стаянку 70 суднаў. Усё часцей арганізатары "падцягваюць" спаборніцтвы бліжэй да берага, каб гледачы маглі ў камфортных умовах назіраць за рэгатай. Гэты парусны цэнтр добра падыходзіць для правядзення падобных спаборніцтваў.
Спецыялісты лічаць, што падобных аб'ектаў на Мінскім моры павінна быць яшчэ некалькі. На беразе плануецца абсталяваць веладарожку, пракат веласіпедаў, зімой — пракат лыж.
Аднак галоўная задача для федэрацыі і новага цэнтра на Мінскім моры — гэта папулярызацыя паруснага спорту і прыцягненне ў яго дзяцей.
Усяго ў Беларусі сёння 4 буйныя школы паруснага спорту: дзве ў Мінску і па адной у Гродне і Гомелі. Менавіта тут, у ДЮСШ на беразе Мінскага мора, была выхавана чэмпіёнка свету Таццяна Драздоўская.
Наогул, у гэтую школу прымаюць дзяцей з 9 гадоў, але часта трэнеры ідуць на ўступкі і бяруць дзетак маладзейшага ўзросту. Набор адбываецца ў верасні, навучальны працэс пачынаецца з 1 кастрычніка. Да мая дзеці займаюцца ў трэнажорных залах і басейнах, якія арандуе школа: да выхаду на "вялікую" ваду ім неабходна навучыцца добра плаваць. Трэнеры абавязкова чытаюць курс тэорыі. Калі дазваляюць умовы надвор'я (гэта звычайна ў маі), заняткі праводзяцца на вадасховішчы. Паколькі лета ў Беларусі дастаткова кароткае, то трэніравацца маленькім спартсменам прыходзіцца кожны дзень, акрамя панядзелка, па 5-6 гадзін.
Штогод праходзяць зборы і спаборніцтвы за мяжой. Звычайна гэта Літва, Польшча, Іспанія. У будучым плануецца дамовіцца са школай Паламус у Іспаніі, куды беларускія дзеці маглі б выязджаць цэлы год.
— Тры гады таму мы знаходзіліся тут жа, але ўмовы былі не самымі лепшымі, няма дзе пераапрануцца, адсутнічаў водаправод, душ. Цяпер дзякуючы федэрацыі ў нашай ДЮСШ сучасны добры будынак, з усімі выгодамі. Сюды мы заехалі ў маі. Гэта, безумоўна, надасць імпульс развіццю паруснага спорту. Прыязджаюць бацькі, бачаць, у якія ўмовы трапляюць іх дзеці, і не баяцца давяраць іх нам. Адзінае — дзеці цяпер сталі адрознівацца ад тых, што былі раней. Сёння іх псуюць камп'ютары і смартфоны.
Хацелася б адзначыць, што навучанне на ўсіх этапах у нас абсалютна бясплатнае — і зімой, калі мы арандуем басейны і трэнажорныя залы, і ўлетку, калі займаемся на вадзе.
— Існуе праблема недабору дзяцей, хоць мы даём рэкламу і на тэлебачанні, і ў школах, — расказвае загадчык гападарчай службы ДЮСШ Аляксандр Мадыцкі. — Многія прыходзяць, але надоўга не затрымліваюцца. У нашым відзе спорту неабходна, каб добра працавала і галава, і рукі: ветразь жа — складаная штука. На сёння ў нашай школе — найлепшыя ўмовы ў рэспубліцы. Штогод праходзіць спартакіяда сярод СДЮШ, мы рэгулярна займаем першыя месцы. Сёлета дзеці былі на спаборніцтвах у Польшчы і Літве чатыры разы, заўсёды вярталіся з прызавымі месцамі.
Цяпер у школе працуе 5 трэнераў (усе яны былыя спартсмены высокага класа), займаецца 80 дзяцей. 70 працэнтаў з іх — хлопчыкі, але пасля поспехаў Таццяны Драздоўскай пачалі прыходзіць і дзяўчынкі. Федэрацыя перадала на баланс ДЮСШ 70 суднаў.
Пакуль існуе невялікая праблема з тым, як дабіраюцца дзеці: яны могуць прыязджаць толькі на прыгарадных аўтобусах, якія ходзяць адзін раз у гадзіну. Калі дзіця спазнілася хоць на дзве хвіліны, то застанецца без трэніроўкі. Адміністрацыя школы мае намер вырашыць гэтую праблему, звярнуўшыся ў адпаведныя органы з просьбай, каб з пасёлка Ждановічы да паруснага цэнтра хадзілі гарадскія аўтобусы.
На думку трэнераў, дзяцей у парусны спорт цягне драйв. Дзіця адкрэніваецца, вісіць над яхтай, трымае яе целам — гэта лепш, чым любы атракцыён.
Кожны вялікі поспех у спорце пачынаецца з дзіцячых школ і дзіцячых перамог. Сёння Беларусь мае добрую базу і перспектыўную моладзь. Летась беларускія дзеці-"дошчачнікі" сталі чэмпіёнамі свету і чэмпіёнамі Еўропы. У гэтым годзе двое з іх сталі срэбранымі прызёрамі.
Вялікія планы і ў дарослых спартсменаў: сёлета ім неабходна заваяваць дзве ліцэнзіі на Алімпіяду ў Рыа-дэ-Жанэйра: адну ў класе "Лазер-Радыял", другую ў віндсёрфінгу ў класе RS-Х.
Дар'я Лабажэвіч.
Дарэчы
Яхт-клуб прапануе таксама платныя паслугі:
— Марская прагулка на яхце або катары;
— Магчымасць фота- і відэаздымкі
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.