У традыцыйным спартыўным аглядзе «Звязда» ўспамінае, якімі спартыўнымі падзеямі жылі аматары беларускага спорту на мінулым тыдні.
1. Наваполацкі «Нафтан» у гасцях разграміў брэсцкае «Дынама» — 7:0. Хет-трыкамі адзначыліся Валерый Жукоўскі і Ігар Крывабок. Яшчэ адзін гол на рахунку Руслана Гунчака. Галоўны трэнер «нафтавікоў» Валерый Стрыпейкіс вельмі стрымана ўспрыняў гэты вынік: «Бываюць такія дні і гульні, калі ўсё атрымліваецца. Пры падрыхтоўцы да матча мы ведалі, што сапернік мае праблемы з саставам. Галоўным было давесці да хлопцаў, каб яны настроіліся на гульню. Яны малайцы, здолелі гэта зрабіць». Яшчэ два клубы атрымалі перамогу з сухім лікам: «Мінск» нечакана лёгка перайграў «Шахцёр» (3:0), а «Нёман» у гасцях адолеў «Гомель» (2:0). Дарэчы, гродзенцы змагаюцца за пападанне ў шасцёрку лепшых на першым этапе.
Сваіх балельшчыкаў парадаваў «Слуцк», які ў дадатковы час вырваў перамогу ў «Тарпеда-БелАЗ» — 2:1. Вырашальны мяч у вароты Васіля Хамутоўскага забіў Дзмітрый Алісейка. А «Белшына» і «Дняпро» пераможцу не выявілі, згуляўшы ў безгалявую нічыю.
Адзначым, што беларускае «класіка» паміж мінскім «Дынама» і барысаўскім БАТЭ ў межах 19‑га тура перанесена на 13 жніўня. Прычына — занятасць клубаў у еўракубкавых турнірах.
2. Хакейнае «Дынама» ў таварыскім матчы разграміла браціслаўскі «Слован» — 6:0. Дублем адзначыўся Шарль Лінгле, які з новага сезона вяртаецца ў стан «зуброў». Па шайбе ў свой актыў запісалі таксама навічкі мінскага клуба Нік Бэйлен, Раян Веске і Джонатан Чычу; яшчэ адна шайба на рахунку Сяргея Дразда. Пасля матча галоўны трэнер «Дынама» Любамір Покавіч ацаніў гульню сваіх падапечных: «Перамагчы «Слован» 6:0 — вельмі прыемна… і няпроста. Гульня відавочна атрымалася. Нам не закінулі ні разу, затое мы праводзілі прыгожыя атакі. Вынік радуе, але не трэба забываць пра тое, што гэта толькі падрыхтоўка».
3. Беларускі велагоншчык Яўген Гутаровіч выйграў стартавы этап «Тура Польшчы». У кантактнай барацьбе ён апярэдзіў Рамана Майкіна, Мануэле Моры і Марка Халера.
Незадоўга да фінішу спартсмены трапілі ў сапраўдны шторм — град, дождж, моцны сустрэчны вецер. Але, нягледзячы на дрэннае надвор'е, арганізатары не сталі спыняць гонку. У выніку ўсё скончылася групавым фінішам. Цікава, што многія фаварыты трапілі ў завалы, не вытрымаўшы напружання форс-мажорнага этапу.
Дарына ЗАПОЛЬСКАЯ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.