Афрыканская краіна прапануе нашым прадпрымальнікам сумесную распрацоўку радовішчаў прыроднага газу
Пра гэта паведаміў выканаўчы дырэктар Канфедэрацыі гандлёвых асацыяцый Мазамбіка Раджэрыа Манюэль на беларуска-мазамбікскай бізнес-сустрэчы, якая адбылася ў Беларускай гандлёва-прамысловай палаце.
Экспартуем тэхналогіі
«У Мазамбіку знойдзены вялікія запасы прыроднага газу, і гэтая сфера можа быць перспектыўнай для інвеставання з боку прадстаўнікоў беларускага бізнэсу, а таксама для супрацоўніцтва», — адзначыў выканаўчы дырэктар.
Сёння ў распрацоўцы і здабычы прыроднага газу ў Мазамбіку занятыя кампаніі з Італіі і ЗША. Акрамя таго, разведаны радовішчы вугалю, будуюцца вугальныя шахты. «Мы зацікаўлены ў супрацоўніцтве ў гэтай сферы з прадстаўнікамі малога і сярэдняга бізнесу Беларусі, якія змогуць узяць удзел у рэалізацыі буйных праектаў», — падкрэсліў Раджэрыа Манюэль. Намеснік старшыні Беларускай гандлёва-прамысловай палаты Уладзімір Улаховіч адзначыў, што сумесная распрацоўка радовішчаў прыроднага газу — гэта перспектыўная прапанова: «Афрыка багатая на мінеральныя рэсурсы і карысныя выкапні. Беларусь, у сваю чаргу, можа прапанаваць тэхналогіі, напрыклад, тыя, якія прымяняе «Беларуськалій». У гэтым напрамку ў нас ужо ёсць партнёры ў Паўднёва-Усходняй Азіі, Лацінскай Амерыцы. У Афрыцы гэтыя тэхналогіі таксама могуць быць запатрабаваны».
Дапаможам накарміць краіну і кантынент?
Міністр гандлю і прамысловасці Мазамбіка Арманда Інрога заявіў, што яго краіна зацікаўлена ў беларускім вопыце і распрацоўках у сферы сельскай гаспадаркі. «Афрыка — гэта кантынент, які адчувае праблемы з харчовай бяспекай, а Беларусь з'яўляецца важным сельгасвытворцам, а таксама экспарцёрам сельскагаспадарчых прадуктаў. Таму мы гатовыя і хочам вучыцца ў Беларусі, як вырабляць сельгаспрадукцыю і развіваць сельскую гаспадарку, каб у перспектыве стаць адной з краін — экспарцёраў гэтай прадукцыі, да таго ж у Мазамбіку ёсць 35 млн га ворнай зямлі», — падкрэсліў міністр. Дарэчы, не выключана стварэнне сумесных з Беларуссю прадпрыемстваў. Тым больш што Беларуская гандлёва-прамысловая палата і Канфедэрацыя гандлёвых асацыяцый Мазамбіка падпісалі мемарандум аб узаемаразуменні.
Уладзімір Улаховіч адзначыў, што дакумент стане своеасаблівай асновай для развіцця бізнес-кантактаў паміж краінамі. Арганізацыі плануюць наладзіць абмен інфармацыяй, што дапаможа абодвум бакам у пошуку патэнцыйных партнёраў. Раджэрыа Манюэль у сваю чаргу падкрэсліў, што падпісанне мемарандума стане стымулам для развіцця ўзаемавыгаднага супрацоўніцтва паміж прадпрымальнікамі дзвюх краін.
Уладзіслаў КУЛЕЦКІ.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.