Зрабіла за мяжой першую прышчэпку ад гепатыту В. Наступную прышчэпку (бо ўсяго іх патрэбна тры) хацела зрабіць на радзіме. Аднак у некалькіх медустановах мне адмовілі з-за адсутнасці вакцыны. Няўжо ў Мінску недахоп вакцын супраць гепатыту В?
Ірына, г. Мінск.
Галоўны дзяржаўны санітарны ўрач г. Мінска Наталля ЖУКАВА:
— У арганізацыях аховы здароўя сталіцы ёсць паўгадавы запас вакцыны для прафілактыкі гепатыту В у дзяцей (вакцынацыя дзяцей пачынаецца ў першыя 12 гадзін пасля нараджэння ў радзільным доме, а потым праводзіцца ў паліклініцы ва ўзросце 1 і 5 месяцаў), а таксама амаль гадавы запас вакцыны для папярэджання гепатыту В у дарослых. Вакцыны набыты за кошт сродкаў рэспубліканскага бюджэту для забеспячэння выканання Нацыянальнага календара прафілактычных прышчэпак.
Дарослым бясплатная вакцынацыя праводзіцца пры наяўнасці пэўных паказанняў: у пэўных прафесійных групах (медыцынскія работнікі; спецыялісты, занятыя на вытворчасці лекавых сродкаў, донарскай крыві і інш.), пры наяўнасці павышанай рызыкі заражэння на гепатыт В (асобы, якія знаходзяцца ў кантакце з хворым на гепатыт В і інш.).
Асобы, якім бясплатная вакцынацыя не прапануецца, могуць вакцынавацца за ўласны кошт. Для гэтага варта звярнуцца ў Мінскі гарадскі цэнтр вакцынапрафілактыкі, які працуе на базе Дзіцячай інфекцыйнай клінічнай бальніцы г. Мінска. Па нумары 258-76-12 можна запісацца на папярэднюю кансультацыю і выкананне прышчэпкі. Для фарміравання належнай абароны патрабуецца выкананне трох прышчэпак з інтэрваламі паміж першай і другой — 1 месяц, першай і трэцяй — 6 месяцаў.
(Такія медыцынскія цэнтры, як «Нардзін», «Ладэ», «Экамедсэрвіс»
, якія таксама займаюцца вакцынацыяй, зараз вакцынацыю менавіта супраць гепатыту В не праводзяць. — С.Б.).
У нашай краіне з 1997 года прышчэпкі ад гепатыту В выконваліся толькі асобным дзецям, а з 2000 года — усім нованароджаным і дзецям ва ўзросце 13 гадоў. Паўтараць вакцынацыю ў дарослым жыцці гэтым дзецям не давядзецца. А вось дарослым, якія нарадзіліся да ўвядзення падобнай імунізацыі, можна рэкамендаваць зрабіць гэта ў любы зручны момант. Усё ж такі гепатыт В, як, дарэчы, і гепатыт С, перадаецца не толькі з кроўю, але і падчас неабароненых палавых кантактаў. Ёсць верагоднасць заражэння і ў бытавых умовах для тых, хто пражывае з такімі інфіцыраванымі. На жаль, вакцыны супраць гепатыту С пакуль не вынайдзена. Гэта абумоўлівае большае распаўсюджванне гепатыту С у апошнія гады.
Святлана БАРЫСЕНКА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
