Сям’я Грэбэ жыве ў Бараўлянах. Пару тыдняў таму, у абед, 12-гадовы Дзіма выйшаў з дому і накіраваўся ў школу. Паслізнуўся, упаў і адчуў рэзкі боль. Як высветлілася пазней, гэта быў пералом вялікагалёначнай косці са зрушэннем.

У гэты момант міма праходзіла жанчына. Яна пачула крык, убачыла дзіця на снезе і адразу падбегла да яго.

Незнаёмка выклікала хуткую. Яна не дазваляла Дзіму рухацца, сачыла, каб ён не заплюшчваў вочы, размаўляла з ім — не давала страціць прытомнасць. Жанчына заставалася побач, пакуль хуткая не забрала хлопчыка. Фельчару яна перадала ўсё, што паспела даведацца аб яго стане.

Мама Дзімы Вольга прымчалася ў бальніцу пасля званка ўрачоў. Калі зрабілі першы здымак, урач здзівіўся: пералом быў без зрушэння.

— Калі косці зрушваюцца, іх упраўляюць альбо робяць аперацыю па злучэнні косных абломкаў. Нам гэтага ўдалося пазбегнуць. Менавіта таму я так моцна хацела знайсці гэту жанчыну — дзякуючы ёй мы пазбеглі ўскладненняў, — гаворыць Вольга.

Яна стала шукаць выратавальніцу: размяшчала аб’явы ў мясцовых чатах, затым напісала пост у Threads. Карыстальнікі пачалі яго актыўна прасоўваць. Людзей пакарыла дабрыня незнаёмкі. Пост набраў амаль 7 тысяч лайкаў і 170 каментарыяў.

Многія думалі, што жанчына — медык. Але Ірына (так завуць выратавальніцу) працуе выхавальнікам у мясцовым дзіцячым садку.

Вольга і Ірына ўжо запланавалі сустрэчу. Маці хлопчыка падрыхтавала падарунак — у знак падзякі за дабрыню. Дарэчы, Дзіма, ужо аднаўляе здароўе дома.