У «Мінскбуд» адзначылі, што на будаўніцтве Нацыянальнага гістарычнага музея завяршаецца ўзвядзенне каркаса будынка, а таксама ідзе актыўнае ўцяпленне фасада. На паўднёвым баку ўжо пачаліся дахавыя работы. 

Да канца гэтага месяца будаўнікі плануюць прыступіць да мантажу вітражных сістэм (каб закрыць контур першых трох паверхаў) і ўладкавання вентфасада.

Па словах начальніка ўчастка генпадраднага БУ-7 будтрэста № 4 Дзмітрыя Харытонава, унутры будынка працуюць муляры і тынкоўшчыкі, вядуцца чарнавыя электрамантажныя і сантэхнічныя работы, выконваецца сцяжка падлог. У кастрычніку плануецца зманціраваць таксама ўсе тры эскалатары. 

На аб’екце сёння задзейнічаны 320 чалавек, працуюць чатыры вежавыя краны. Адзін з іх вось-вось пакіне пляцоўку: сёння пачынаецца яго дэмантаж. Будаўнікі ідуць у графіцы. Ім дапамагаюць будатрадаўцы — 21 чалавек. Хутка на аб’ект заедуць спецыялісты для мантажу асвятлення пад размяшчэнне экспанатаў. 

Пад скляпеннямі гістарычнага музея, які будуецца, упершыню гучала класічная музыка. У гасцях у будаўнікоў чацвёртага трэста з дабрачынным канцэртам пабывалі артысты сімфанічнага аркестра Вялікага тэатра оперы і балета. Ініцыятыву праявілі БРСМ і маладыя музыканты аркестра.