Аматарам бегу і здаровага ладу жыцця прапануюць пачаць 2026 год бадзёра і актыўна. Брэстаўчан запрашаюць прыйсці на набярэжную ракі Мухавец. Забег працягнецца з 12.00 да 13.00. Яго старт і фініш вызначаны каля навагодняй ёлкі. Маршрут пралягае непасрэдна ўздоўж гарадской набярэжнай.

«Негалосна Брэст лічыцца сталіцай лёгкай атлетыкі ў Беларусі. Але не толькі прафесійны спорт цікавы, ёсць і аматарскі складнік лёгкай атлетыкі, бегу ў прыватнасці. Кожную суботу па экалагічнай сцежцы ўздоўж Мухаўца праходзяць аматарскія забегі, любы жадаючы можа далучыцца, — расказаў начальнік аддзела спорту і турызму Брэсцкага гарвыканкама Аляксей Крываносаў. — Ужо не ўпершыню арганізуем забегі 1 студзеня. Гэтым разам назвалі яго „Забегам абяцанняў“. Ім сімвалічна абяцаем быць у 2026 годзе больш актыўнымі, спартыўнымі, здаровымі і шчаслівымі».

У Брэсце жыве нямала захопленых бегам людзей. Некаторыя з іх аб’ядноўваюцца і ладзяць групавыя прабежкі. Брэстаўчане актыўна ўдзельнічаюць у спаборніцтвах на тэрыторыі горада і за яго межамі.

Ужо фарміруецца план лёгкаатлетычных мерапрыемстваў на 2026 год. Некаторыя дэталі ўжо вядомыя. У прыватнасці, традыцыйна ў Брэсце правядуць лёгкаатлетычны прабег «Памяць», прысвечаны воінам-інтэрнацыяналістам. Зноў збярэ прафесійных спартсменаў і аматараў бегу «Забег першых».