Адказваючы на пытанне аб тым, якую долю беларускія прэпараты займаюць на ўнутраным рынку, Аляксандр Старавойтаў адзначыў: «Калі Беларусь стала незалежнай, адным з прыярытэтаў, які пазначыў наш кіраўнік дзяржавы, было захаванне сваёй прамысловасці. Не абышло гэта і фармпрамысловасць». Ён дапоўніў: «Нацыянальная бяспека пачынаецца з бяспекі таго, што мы ядзім, таго, чым мы лечымся».

«Сёння ў краіне больш за 50 % рознічнага гандлю лекавымі прэпаратамі (складаюць прэпараты. — Заўв. БелТА) беларускай вытворчасці. Сёння нашы прадпрыемствы больш за 1,7 тыс. пазіцый выпускаюць самастойна. Пакуль на рынку крыху больш за 4 тыс. пазіцый, — расказаў намеснік міністра. — А ў бальніцах сёння ў нас больш за 80 % лекавых прэпаратаў нацыянальнай вытворчасці. І ўлічваючы, што сённяшні трэнд Рэспублікі Беларусь — гэта захаванне здароўя, то я магу з чыстым сумленнем і з поўнай упэўненасцю сказаць пра тое, што нашы прэпараты нічым не адрозніваюцца ад замежных аналагаў».

Намеснік міністра таксама звярнуў увагу, што за два гады беларускія фармпрадпрыемствы асвоілі вытворчасць 122 новых лекавых прэпаратаў. «На сённяшні дзень фармацэўтыка ў Беларусі вельмі шырока развіваецца. Дзяржаўных заводаў у нас восем, а шэсць канкрэтна занятыя выпускам лекавых прэпаратаў. Усяго ў Рэспубліцы Беларусь 52 уласнікі маюць ліцэнзію на выпуск лекавых прэпаратаў. І кожны год іх колькасць павялічваецца. Толькі на сёння ў нас больш за 15 інвестпраектаў, якія актыўна развіваюць фармацэўтыку», — сказаў Аляксандр Старавойтаў.