Для жыхароў раёна гэта не проста фармальная сустрэча. Да супрацоўнікаў органаў унутраных спраў яны звяртаюцца з пытаннямі, якія хвалююць больш за ўсё і не заўсёды маюць адназначнае рашэнне.
Станіслаў Карнееў — участковы, які дасканала ведае свой раён, яго жыхароў і праблемныя месцы. Шматгадовы досвед службы дапамагае яму знаходзіць падыход да кожнага, выслухоўваць абодва бакі канфлікту і разбірацца нават у нестандартных сітуацыях, дзе важныя не толькі веды заканадаўства, але і чалавечы ўдзел.
Аднымі з першых на прыём прыйшлі дзве пенсіянеркі. Жанчыны расказалі, што сусед рэгулярна шуміць вечарам і праводзіць рамонтныя работы ў гадзіны, калі гэта забаронена, перашкаджаючы жыхарам адпачываць. Выслухаўшы заяўніц, участковы вырашыў падысці да сітуацыі аб’ектыўна і звязаўся з другім бокам канфлікту. У ходзе размовы высветлілася, што сам мужчына не парушае заканадаўства, але таксама перыядычна чуе шум.
— Нагадваю, што шумець у жылых дамах забаронена з 23:00 да 7:00. За парушэнне прадугледжаны штраф у памеры ад дзвюх да дзесяці базавых велічынь, паўторна — ад дзесяці і вышэй, — акцэнтаваў увагу ўсіх удзельнікаў афіцэр.
Станіслаў Карнееў растлумачыў заяўніцам парадак фіксацыі падобных фактаў: парэкамендаваў адзначаць канкрэтныя даты і час правапарушэнняў, каб пры далейшым разглядзе можна было правесці пакватэрнае апытанне і ўстанавіць рэальнага парушальніка спакою.
Затым на прыём прыйшла сямейная пара. Іх непакоілi паводзіны сына — вучня 8 класа, які сістэматычна прагульвае школу, спасылаючыся на тое, што праспаў, і не праяўляе цікавасці да вучобы. Участковы падрабязна абмеркаваў з бацькамі магчымыя прычыны такіх паводзін, звярнуў увагу на неабходнасць комплекснага падыходу і звязаўся з інспектарам па справах непаўналетніх, каб сітуацыя была разгледжана з прафілактычнага боку.
— Участковы інспектар па справах непаўналетніх пагутарыць з падлеткам, правядзе прафілактычную гутарку. Але трэба разумець — магчыма, давядзецца задзейнічаць і іншых спецыялістаў: псіхолага або школьнага сацыяльнага педагога. Важна разабрацца ў прычынах такіх паводзін, а не караць або чытаць настаўленні, — далікатна падсумаваў міліцыянер. — Пагаварыце з сынам па душах, станьце яму сябрам, і, магчыма, гэта будзе першым крокам да вырашэння сітуацыі.
Пажылая жанчына прыйшла на прыём, кааб выказаць удзячнасць інспектару. Раней яна звярталася да ўчастковага з просьбай пагутарыць з сынам, які звольніўся з працы, а пасля сваркі з былой жонкай пачаў ужываць алкаголь і канфліктаваць з маці. Праваахоўнік тады растлумачыў мінчаніну, да чаго можа прывесці такі лад жыцця, прывёў прыклады з практыкі. Неўзабаве гараджанін уладкаваўся на працу і пачаў весці здаровы лад жыцця.
— Прафілактычная работа — важны кірунак службовай дзейнасці. Часам дастаткова простай размовы, каб пераканаць у чымсьці чалавека або папярэдзіць здзяйсненне супрацьпраўных дзеянняў, — адзначыў афіцэр.
Кожны зварот — напамін пра тое, што ўчастковы інспектар міліцыі застаецца найбольш блізкім да людзей прадстаўніком праваахоўнай сістэмы. Да яго звяртаюцца не толькі з заявамі аб правапарушэннях, але і з асабістымі, часам няпростымі пытаннямі, якія патрабуюць увагі, такту і даверу. Работа ўчастковага — гэта штодзённы дыялог з насельніцтвам, дзе строгасць закона спалучаецца з разуменнем чалавечых абставін. І менавіта такі падыход дазваляе не толькі вырашаць канфлікты, але і папярэджваць іх яшчэ да таго, як яны перарастуць у сур’ёзныя праблемы
Сталічныя ўчастковыя інспектары міліцыі кожную сераду праводзяць прыём грамадзян ва ўсіх грамадскіх пунктах аховы правапарадку з 17:00 да 20:00. Усе ахвотныя могуць звяртацца да іх па пытаннях, якія адносяцца да кампетэнцыі органаў унутраных спраў.
Вераніка КАНЮТА
Фота прэс-службы Першамайскага РУУС г. Мінска
