Кожную сераду з 17.00 да 20.00 у грамадскіх пунктах аховы правапарадку сталіцы ўчастковыя інспектары міліцыі праводзяць прыём грамадзян. Такая форма работы — гэта магчымасць для жыхароў раёна напрамую расказаць аб набалелым, атрымаць параду і вырашыць праблемы. 

Карэспандэнты «Звязды» пабывалі на прыёме грамадзян у Партызанскім РУУС г. Мінска, які праводзіла ўчастковы інспектар Анастасія Горбель. 

Склад на лесвічнай клетцы: калі рэчы замінаюць бяспецы?

Першай на прыём прыйшла маладая жанчына. Яе непакоіць сітуацыя ў пад’ездзе: суседзі па лесвічнай клетцы — шматдзетная сям’я — ператварылі агульны калідор у склад асабістых рэчаў.

«Санкі, ватрушкі, каляскі — усё захоўваецца каля дзвярэй. Прайсці складана», — паскардзілася мінчанка.

Анастасія Горбель патлумачыла, што закон у гэтым пытанні адназначны: згодна з правіламі карыстання жылымі памяшканнямі, захламляць лесвічныя пляцоўкі і калідоры катэгарычна забаронена. Гэта не толькі пытанне камфорту, але і пажарнай бяспекі.

«Я зафіксавала ваш адрас. Адразу пасля завяршэння прыёму наведаю вашых суседзяў і правяду прафілактычную гутарку. Правілы абавязковыя для ўсіх. Дапаможам знайсці кампраміснае рашэнне для захоўвання рэчаў», — запэўніла інспектар.

Таямніцы ў смартфоне: муж занепакоены дзіўнымі паводзінамі жонкі

Мужчына, які прыйшоў на прыём грамадзян, расказаў, што яго сямейнае жыццё ў апошні час ператварылася ў трывожнае чаканне. Ён паведаміў, што жонка стала паводзіць сябе вельмі дзіўна: гадзінамі не выпускае тэлефон з рук, ігнаруе просьбы блізкіх і ўвесь час кудысьці з’язджае. На ўсе пытанні адзін адказ: «Усё добра, не адцягвай».

«Я вельмі баюся за яе. Такое пачуццё, быццам яна знаходзіцца пад нечым уплывам. Раптам яна трапіла ў сеткі ашуканцаў?» — падзяліўся перажываннямі мінчанін.

Анастасія Горбель падтрымала мужчыну ў яго пільнасці. «Вы правільна зрабілі, што прыйшлі, — сказала праваахоўнік. — Падобныя прыкметы часта ўказваюць на тое, што чалавек стаў ахвярай псіхалагічнай апрацоўкі. Гэта можа быць як выманьванне грошай, так і ўцягванне ў злачынную дзейнасць у якасці „кур’ера“ тэлефонных ашуканцаў. Зламыснікі ад імя лжэправаахоўнікаў, супрацоўнікаў банка і дзяржустаноў часта запалохваюць людзей уяўнай крымінальнай адказнасцю і прымушаюць выконваць свае ўказанні. Мы абавязкова сустрэнемся з вашай жонкай, праверым яе гаджэт і мякка растлумачым, у якую пастку яна магла трапіць. Наша задача — своечасова яе спыніць, калі высветліцца, што нешта пайшло не так».

Слёзы за сцяной: неабыякавасць супраць хатняга гвалту

Апошняй на прыём прыйшла жанчына, занепакоеная шумам з суседняй кватэры. Некалькі дзён яна чуе за сцяной разлютаваныя спрэчкі паміж мужчынам і жанчынай на павышаных танах. Але найбольш яе палохае дзіцячы плач, які нязменна суправаджае гэтыя канфлікты.

«Я ў стужцы навін чытаю артыкулы аб тым, што праблема хатняга гвалту існуе. Не хачу чакаць, пакуль здарыцца непапраўнае. Там жа маленькае дзіця», — патлумачыла прычыну звароту заяўніца.

Участковы інспектар падзякавала жанчыне за грамадзянскую пазіцыю. Анастасія Горбель аператыўна звязалася з гаспадыняй названай кватэры і дамовілася аб сустрэчы.

«Прафілактыка гвалту ў сям’і — наш прыярытэт, — адзначыла ўчастковы інспектар міліцыі. — Мы абавязкова наведаем гэту сям’ю ў бліжэйшы час, праверым умовы пражывання дзіцяці і разбярэмся ў прычынах канфліктаў. Умяшанне на ранняй стадыі часта дапамагае прадухіліць трагедыю».

Вераніка КАНЮТА

Фота прэс-службы Партызанскага РУУС г. Мінска