Да айчыннага кіно сёлета прыцягнутая ўвага на самым высокім узроўні, паколькі Кіраўнік дзяржавы гэтым летам наведаў Нацыянальную кінастудыю, зрабіўшы важныя заўвагі, якія датычацца развіцця айчыннага кінематографа. Таму сёлетні «Лістапад» у гэтым кантэксце — яшчэ адна нагода зноў звярнуцца да тэмы развіцця беларускага кіно, але ўжо праз прызму сусветнага кінематографа: як беларускія фільмы выглядаюць на фоне стужак з іншых краін і ці адпавядаюць сусветным трэндам? Наогул сёлета будзе прадстаўлена больш за 170 фільмаў з 40 краін свету, а значыць, можна і сябе паказаць, і паглядзець на сусветныя кінатэндэнцыі. 

Як падкрэсліла начальнік аддзела па кінематаграфіі Міністэрства культуры Рэспублікі Беларусь Ірына ДРЫГА на прэс-канферэнцыі, на «Лістападзе» сёлета прадстаўлены ўсе кантыненты, акрамя Аўстраліі. Добрая навіна — да іншых конкурсаў у гэтым годзе далучыўся конкурс кароткаметражных фільмаў, а значыць, пашыраецца не толькі геаграфія краін-удзельніц, але і прырастае сама праграма фестывалю. Гэта значыць ён сапраўды развіваецца! Ірына Уладзіміраўна дадала, што «Лістапад» — гэта яшчэ і шмат пазаконкурснай актыўнасці: круглыя сталы (напрыклад, 1 лістапада ў Нацыянальнай бібліятэцы пройдзе круглы стол Саюзнай дзяржавы «Дыялог пакаленняў: прафесійны погляд на развіццё кінаіндустрыі»), майстар-класы і г. д. Як і ў мінулым годзе ў Мінску будзе магчымасць наведаць Дні нацыянальнага кіно іншых краін. Гэта тая традыцыя, якая сапраўды стала карыснай гледачу. З цікавостак праграмы — магчымасць паглядзець фільмы ганаровых гасцей — Карэна Шахназарава, Мікалая Бурляева, Уладзіміра Грамацікава. «Інтарэс да фестывалю высокі. Гэта галоўная падзея года!» — канстатавала Ірына Дрыга.

Генеральны дырэктар сталічнага «Кінавідэапраката» Уладзімір КАРАЧЭЎСКІ адзначыў, што «Лістапад» праходзіць на найлепшых пляцоўках, сярод якіх вылучаецца кінатэатр «Масква», адкрыты сёлета пасля рэканструкцыі (менавіта ў ім адбудзецца закрыццё фестывалю). Уладзімір Міхайлавіч звярнуў увагу на лаяльнасць арганізатараў, бо білеты па сваім кошце даступныя ўсім, а на сеанс, дзе дэманструюцца фільмы залатой калекцыі краін СНД, кошт сімвалічны. «Гэта зроблена дзеля таго, каб найлепшыя стужкі, прысвечаныя тэме 80-годдзя Вялікай Перамогі, змагло паглядзець як мага болей ахвотных, у тым ліку моладзь», — падкрэсліў Уладзімір Карачэўскі.

Генеральны дырэктар «Беларусьфільма» Дзмітрый СЯМЁНАЎ акцэнтаваў увагу на тым, наколькі вялікую работу наша дзяржава праводзіць для развіцця кінематаграфіі. Ён таксама праанансаваў Дзень адкрытых дзвярэй, які 1 лістапада адбудзецца на Нацыянальнай кінастудыі, каб усе ахвотныя змаглі пабачыць умовы працы і магутнасці «Беларусьфільма».

Старшыня журы конкурсу кароткаметражных фільмаў Уладзімір ГРАМАЦІКАЎ (Расія) падзякаваў за тое, што наша дзяржава захавала кінафестываль у такі няпросты час, бо вельмі важна сёння мець пляцоўку для дыялогу і абмену вопытам, для падтрымкі звычайных чалавечых зносін.

Варта дадаць, што «Лістапад» больш за 30 гадоў падтрымліваецца ў нашай дзяржаве на самым высокім узроўні, бо гэта ўнікальны фестываль, які выконвае пэўна самую галоўную ролю кіно — творчае сяброўства дзеля сумесных праектаў і ўзаемапаразумення ў свеце. Такім чынам наша краіна зноў дэманструе прыклад міратворчай палітыкі і ў мастацтве, а з усіх яго відаў самым галоўным, як не так даўно падкрэсліў Кіраўнік дзяржавы, з’яўляецца менавіта кіно.

Ірына ПРЫМАК