Як падкрэсліў лідар нацыянальнага прафцэнтра, умовы надвор'я ўнеслі свае карэктывы, але аграрыі паспяхова спраўляюцца са сваімі задачамі. Многія прадпрыемствы паказваюць нават лепшы вынік, чым у мінулым годзе. Сярод іх і ААТ «Святая Воля», дзе ўжо практычна завяршылі жніво.

- Гэта заслуга ўсіх работнікаў. І вельмі ганарова паціснуць руку найлепшым прадстаўнікам галіны, якія прыклалі свае намаганні, каб забяспечыць краіну хлебам, - падкрэсліў Юрый Сянько і дадаў, што прафсаюзы традыцыйна падчас уборачнай кампаніі аказваюць дапамогу аграрыям па ўсіх пытаннях - ад забеспячэння бяспечных умоў працы да ўшаноўвання найлепшых работнікаў.

Дарэчы, з пачатку ўборачнай кампаніі ўжо больш за 6 тысяч работнікаў адзначаны прафсаюзамі за добрасумленную працу. Гэта не толькі камбайнеры, але і вадзіцелі, работнікі зернесушыльных комплексаў, повары, якія адказваюць за арганізацыю харчавання хлебаробаў, і іншыя. У першую чаргу заахвочванне самых адказных і працавітых удзельнікаў жніва вядзецца галіновым прафсаюзам работнікаў аграпрамысловага комплексу. Свой уклад у важную справу па ўшанаванні найлепшых работнікаў вёскі ўносіць Федэрацыя прафсаюзаў Беларусі і прафсаюзы розных галін.

Трэба адзначыць, што на сёння ўжо тысячы работнікаў па праве ганарацца вынікамі сваёй працы. У краіне звыш 2 тысяч экіпажаў намалацілі больш за тысячу тон, 188 перасягнулі двухтысячную мяжу, 17 – трохтысячную. Ёсць і безумоўныя лідары з вынікамі 4 і нават 7 тысяч тон. Акрамя таго, выдатныя вынікі ў рабоце паказваюць і многія вадзіцелі. Значны ўклад у агульны каравай уносяць працаўнікі, занятыя на сушцы збожжа. Задача прафсаюзаў - адзначыць кожнага з іх і тым самым яшчэ раз падкрэсліць: высакакласныя спецыялісты, людзі, якія адказна падыходзяць да сваёй працы, заўсёды былі і будуць у пашане.

Найважнейшую ролю ў падтрымцы работнікаў, стварэнні неабходных умоў працы, павышэнні заработнай платы адыгрываюць і калектыўныя дагаворы. Прафсаюзы настойваюць на ўключэнні ў гэтыя дакументы дадатковых бонусаў і гарантый: выдзяленне жылля, выплата значных сум матэрыяльнай дапамогі па тых ці іншых падставах, падтрымка маладых спецыялістаў і сем'яў і інш. Усё гэта не толькі матывуе работнікаў на якасную працу, але і дапамагае ў іх замацаванні на працоўных месцах.

Практыка работы ААТ "Святая воля" яшчэ раз пацвярджае рэзультатыўнасць такога падыходу. Маладым спецыялістам тут выдзяляецца новае добраўпарадкаванае жыллё, ствараюцца неабходныя ўмовы для працы і жыцця ў цэлым. У выніку моладзь з задавальненнем застаецца жыць у вёсцы. Адзін з прыкладаў - аграном гаспадаркі Віталь Амбрамчук і яго нявеста Марыя Лярко: у найбліжэйшыя дні яны збіраюцца пабрацца шлюбам. Ім ужо выдзелены сучасны дом. І маладыя людзі з упэўненасцю гавораць, што з задавальненнем застануцца тут жыць і працаваць. Дарэчы, падарунак да вяселля і наваселля маладая пара атрымала і ад прафсаюзаў: Юрый Сянько ўручыў ім сертыфікат на набыццё тэлевізара.

Алена КРАВЕЦ