Начальнік упраўлення нарыхтовак і знешнеэканамічнай дзейнасці Белкаапсаюза Аляксей Сіроцін расказаў БелТА, як Белкаапсаюз кантралюе якасць прадукцыі ў стабфондах.
Патрабаванні да прадукцыі для стабілізацыйных фондаў становяцца больш жорсткімі штогод, паколькі пакупнікі ў першую чаргу арыентаваны на якасць. «Прыёмка ажыццяўляецца строга па нарматывах ДАСТаў і тэхнічных умоў, са зменамі па памерах бульбы і яблыкаў. Для яблыкаў цяпер мінімальная вага плода — 90 г, дыяметр у разрэзе — не менш за 60 мм, што вышэй за папярэднія параметры, якія залежалі ад гатунку», — растлумачыў Аляксей Сіроцін.
У рамках дзяржаўнага заказу ёсць адзіная форма тыпавога дагавора, дзе фіксуюцца аб’ёмы, цэны і штрафныя санкцыі за невыкананне абавязацельстваў. Гэта забяспечвае поўнае выкананне дагавораў на 100 %: пастаўшчыкі адказваюць за непастаўку, а нарыхтоўшчыкі — за нявыбарку прадукцыі. Штрафныя санкцыі па невыкананні гэтага дагавора складаюць 20 % ад сумы нявыбаркі. Усе гэтыя меры ў канчатковым выніку накіраваны на клопат пра спажыўца, гарантуючы наяўнасць якаснай прадукцыі на рынку ў міжсезонны перыяд без дэфіцыту і з высокім узроўнем стандартаў, падкрэсліў начальнік упраўлення.
У рамках дзяржаўнага заказу па стабілізацыйных фондах работа вядзецца ўпершыню, таму ўсе ўдзельнікі праяўляюць насцярожанасць, чакаючы, як практыка пакажа вынікі, адзначыў Аляксей Сіроцін. «Вытворцы прадукцыі зацікаўлены ў захаванні высокай якасці, паколькі менавіта янагарантуе своечасовую рэалізацыю тавараў, высокі попыт і паспяховы продаж на рынку», — сказаў ён.
Жорсткія рамкі патрабаванняў абгрунтаваныя: яны забяспечваюць надзейнасць паставак і адпаведнасць чаканням спажыўцоў, лічыць начальнік упраўлення.
