Сярод удзельнікаў абласнога форуму сельскай моладзі, які праходзіць сёння ў Гродзенскай вобласці, — нямала актывістаў БРСМ, у тым ліку сакратары пярвічак, раённых арганізацый, а таксама тыя, для каго работа ў маладзёжнай арганізацыі стала школай і стартам для новых вышынь. Актыўнасць у БРСМ не толькі дапамагае раскрыць сябе пры ўдзеле ў конкурсах і распрацоўцы сваіх ідэй, іх рэалізацыі. Гэта яшчэ і магчымасць заявіць пра сябе як пра здольнага арганізатара, таленавітага спецыяліста. Разнастайныя праекты дазваляюць выбраць тое, у чым моцны і здольны малады чалавек, і гэта ў поўнай меры датычыцца тых, хто жыве і працуе на вёсцы. Пра гэта расказала ўдзельнікам форуму другі сакратар Гродзенскага абласнога камітэта БРСМ Наталля Станюкевіч. Яна прадставіла дзецям лепшае і самае яркае з насычанага календара маладзёжных падзей ад рэспубліканскага да мясцовага маштабу, у якім ёсць магчымасці праявіць сябе. 

«Конкурс „100 ідэй для Беларусі“, праект „Кветкі Вялікай Перамогі“, прававы праект „Сіла закона“, акцыя „Мы — грамадзяне Беларусі!“, абласны фестываль патрыятычнай песні „Сэрца зямлі маёй“, праект „Ад усёй душы“ і многае іншае — ва ўсіх гэтых ініцыятывах сельская моладзь удзельнічае вельмі актыўна», — падкрэсліла Наталля Станюкевіч. У прыклад яна прывяла таксама вялікую колькасць валанцёрскіх атрадаў у сельскіх школах вобласці. Так, атрад «Неабыякавае сэрца» Казлоўшчынскай СШ Дзятлаўскага раёна, які рэалізуе праект «#Мило_Сердие», заняў другое месца ў абласным конкурсе «Валанцёр года — 2025». 

«З сямі профіляў студатрадаўскага руху ў Гродзенскай вобласці найбольш паспяхова развіваецца сельскагаспадарчае, сёлета ў сельскагаспадарчых атрадах рэгіёна працавалі больш за 3 тыс. чалавек. Па выніках трэцяга працоўнага семестра найлепшым стаў сельгасатрад „Лідар“ з Гродзенскага раёна. Студатрад „Парэчанка“ ўжо не адзін год лідзіруе сярод профільных атрадаў у краіне», — дадала Наталля Станюкевіч.

Вельмі папулярныя на Гродзеншчыне праекты, разлічаныя канкрэтна на сельскую моладзь, адзначыла другі сакратар абкама БРСМ. Адна з фішак абласных «Дажынак» — маладзёжная «Сельская эстафета». Праект «Моладзь за ўраджай» праходзіць падчас уборачнай кампаніі. І сёлета найлепшымі сталі малады камбайнер СВК імя Дзяньшчыкова Гродзенскага раёна Дзяніс Круглікаў і яго зямляк — вадзіцель Кірыл Саўчанка. Творчыя таленты маладым сем’ям ёсць магчымасць праявіць у праекце «Уладар сяла». У наступным годзе БРСМ абяцае парадаваць сельскую моладзь новымі конкурсамі. 

«Сённяшні форум — магчымасць для маладых жыхароў вёскі даведацца больш пра тое, дзе можна праявіць сябе, і штуршок да таго, каб жыццё стала больш актыўным, цікавым, насычаным», — падсумавала Наталля Станюкевіч.