Паводле слоў кіраўніка эканамічнага ведамства, замежныя інвестыцыі ў Беларусь прыбаўляюць: у І квартале забяспечаны 10-гадовы максімум па аб’ёме прамых замежных інвестыцый на чыстай аснове — $2,2 млрд. Такая дынаміка шмат у чым абумоўлена вынікамі маштабнай работы па карэкціроўцы заканадаўства, пашырэнні механізмаў дзяржпадтрымкі для бізнесу, удасканаленні прэферэнцыйных рэжымаў.
«У індустрыяльным парку „Вялікі камень“ за 10 гадоў развіцця зарэгістраваны 173 рэзідэнты. Яны створаны заснавальнікамі з 15 краін. Пры гэтым адна трэць з іх прыйшла ў апошнія паўтара года. Аб’ём заяўленых інвестыцый складае $1,6 млрд, створана 4 тыс. новых рабочых месцаў. У шасці беларускіх свабодных эканамічных зонах вядуць дзейнасць звыш 420 рэзідэнтаў з інвестарамі з больш як 30 краін. Сумарна ў рэалізацыю праектаў імі ўкладзена каля $15 млрд. З удзелам дзяржавы запушчаны пілотныя індустрыяльныя паркі ў Баранавічах і Пінску: уведзены ў эксплуатацыю першыя вытворчыя карпусы, выбраны першыя рэзідэнты», — расказаў Юрый Чабатар.
Міністр эканомікі таксама адзначыў высокую запатрабаванасць абноўленых механізмаў падтрымкі інвестпраектаў: інвестыцыйных дагавораў і прэферэнцыйных інвестпраектаў. «Заключаны чатыры інвестдагаворы на суму 2,8 млрд рублёў у сферах рыбаперапрацоўкі, вытворчасці і перапрацоўкі малочных прадуктаў, стварэння аб’ектаў сувязі. Рэалізуюцца 38 прэфпраектаў коштам 2 млрд рублёў, пры гэтым такі інструмент ужо прымяняецца і замежнымі інвестарамі. Разам з калегамі з Мінфіна працуем над спрашчэннем крытэрыяў і патрабаванняў для прэтэндэнтаў на атрыманне бюджэтных трансфертаў. Падрабязная інфармацыя аб усіх перавагах вядзення бізнесу ў Беларусі сабрана ў гідзе па мерах дзяржпадтрымкі інвестараў. Ён размешчаны на сайтах Мінэканомікі, Нацыянальнага агенцтва інвестыцый і прыватызацыі, а таксама выканкамаў. Таксама функцыянуе Інвестыцыйны партал Беларусі, дзе змешчана актуальная база інвестыцыйных прапаноў з усёй краіны. Такім чынам, створана асяроддзе, пры якім у любым месцы і ў любы час інвестар можа знайсці адпаведны варыянт інвесціравання», — адзначыў ён.
