У Мінпрацы адзначылі, што лічбавізацыя і дэмаграфічныя выклікі фарміруюць новы запыт на рынку працы. На аснове актуальных даных міністэрства прааналізавала, якія прафесіі і ў якіх сферах будуць найбольш запатрабаваны ў найбліжэйшыя пяць гадоў.

У сферы апрацоўчай прамысловасці, якая з’яўляецца асновай рэальнага сектара, чакаецца неабходнасць у станочніках і наладчыках, слесарах-зборшчыках, электрамеханіках, электраманцёрах і кіроўцах. Ведамства патлумачыла, што попыт зрушваецца з работнікаў фізічнай працы на кваліфікаваных рабочых, здольных абслугоўваць і працаваць на складаным абсталяванні, пераважна з сярэдняй спецыяльнай або прафесійна-тэхнічнай адукацыяй. 

Што датычыцца сферы будаўніцтва, існуе патрэба ў бетоншчыках, мулярах, зваршчыках і электрамантажніках. Запыт на развіццё інфраструктуры — як сацыяльнай, так і эканамічнай — вызначае доўгатэрміновы попыт у гэтай галіне. Гэта датычыцца не толькі жылля, але і дарог, аб’ектаў сацыяльнага прызначэння і лагістычных хабаў. 

У сферы IT патрабуецца наяўнасць распрацоўшчыкаў ПА, праграмістаў, спецыялістаў па вэб-парталах і тэхнічнай падтрымцы. Як адзначылі ў ведамстве, сёння IT-спецыялісты неабходныя не толькі ў IT-кампаніях, але і ў традыцыйных галінах для павышэння іх эфектыўнасці. 

У ахове здароўя найбольш запатрабаваныя будуць спецыялісты па доглядзе і ўрачы розных профіляў. Рост долі пажылых людзей стварае стабільны попыт на спецыялістаў па доглядзе. 

У рознічным гандлі і грамадскім харчаванні захоўваецца неабходнасць у прадаўцах, касірах і кухарах. У міністэрстве падкрэслілі, што на гэтыя прафесіі існуе стабільны сярэднетэрміновы попыт.

Сфера адукацыі мае патрэбу ў настаўніках і выхавальніках, бо без якаснай адукацыі немагчыма падрыхтаваць кадры для ўсіх вышэйпералічаных галін.

Гаворачы аб тэхналагічным развіцці, у ведамстве адзначылі патрэбу ў інжынерах (тэхналагічных працэсаў, кантролю якасці, прамысловага і грамадзянскага будаўніцтва, механікаў). Эканоміцы неабходныя кадры, якія забяспечваюць не толькі штодзённае функцыянаванне, але і тэхналагічны прарыў, інфраструктурнае развіццё і стварэнне новых прадуктаў.