«Пры моцным ветры паспрабуйце адкласці ўсе справы і не выходзіць на вуліцу. Загадзя прыбярыце гаспадарчыя рэчы з двара і гаўбцоў у дом, абрэжце сухія дрэвы, якія могуць нанесці шкоду вашаму жыллю. Машыну пастаўце ў гараж. Пры адсутнасці гаража машыну варта паркаваць удалечыні ад дрэў, а таксама слаба ўмацаваных канструкцый. На вуліцы абыходзьце хісткія будынкі і дамы з няўстойлівым дахам. Пазбягайце дрэў і разнастайных збудаванняў падвышанай рызыкі (мастоў, эстакад, трубаправодаў, ліній электраперадач, патэнцыйна небяспечных прамысловых аб’ектаў)», — сказалі ў выратавальным ведамстве.

Калі навальніца заспела вас дома, то па магчымасці заставайцеся ўнутры, зачыніце вокны і коміны, каб пазбегнуць скразняку. Таксама не рэкамендуецца тапіць печку. Варта трымацца далей ад электраправодкі, антэн. Неабходна адключыць радыё і тэлевізар, пазбягаць выкарыстання тэлефона і электрапрыбораў.

«Калі падчас навальніцы вы апынуліся на адкрытай мясцовасці, то памятаеце, што маланка б’е ў самую высокую кропку на сваім шляху. Вялікае дрэва, самотны чалавек у поле і ёсць гэтая кропка, таму не хавайцеся пад высокія дрэвы (асабліва адзінокія). Пры адсутнасці хованкі варта легчы на зямлю або прысесці ў сухую яму, траншэю, прыхіліўшы галаву. Пры знаходжанні падчас навальніцы ў лесе варта схавацца сярод нізкарослай расліннасці. Калі хаваецца група асоб, то лепш прысесці на кукішкі, не датыкаючыся з іншымі людзьмі. Падчас навальніцы нельга купацца ў вадаёмах. Калі вы едзеце на ровары або матацыкле — спыніце рух і перачакайце навальніцу на адлегласці прыкладна 30 м ад іх. Падчас навальніцы варта знаходзіцца на выдаленні ад ліній электраперадач. Калі вы знаходзіцеся на ўзвышшы, то спусціцеся ўніз. Калі вы падчас навальніцы едзеце ў аўтамабілі, спыніцеся, зачыніце вокны і заставайцеся ў аўтамабілі», — падкрэслілі ў МНС.

Падчас моцнага дажджу варта ўстрымацца ад паездак па горадзе. Лепш заставацца ў кватэры ці на працы. Не варта спускацца ў падземныя пераходы і іншыя заглыбленыя памяшканні. Калі будынак (памяшканне) падтапляе, то трэба пастарацца пакінуць яго і перайсці на бліжэйшую ўзвышша. Калі пакінуць будынак нельга, то неабходна падняцца на вышэйразмешчаныя паверхі, выключыць электрычнасць і газ, шчыльна зачыніць вокны, дзверы і паведаміць пра сваё месцазнаходжанне ў дзяжурную службу МНС па нумарах 101 або 112.