«Задача, якую паставіў перад намі Прэзідэнт краіны на 2021—2025 гады, была паспяхова выкананая. З запланаваных 412 тыс. га праведзены меліярацыйныя мерапрыемствы на плошчы 416 тыс. га. Дадаткова за пяць гадоў уведзена 75 тыс. га ў сельскагаспадарчы абарот. На перыяд пяцігодкі 2026—2030 гадоў стаіць задача правесці комплекс меліярацыйных мерапрыемстваў на плошчы 431 тыс. га. Гэта велізарная плошча. Разумеючы, што кожную капейку сёння неабходна лічыць, прапануецца, з улікам патрабавання Прэзідэнта краіны, высокабальныя землі, якія размешчаны на неасушанай тэрыторыі і зараснікі хмызняком, увесці ў сельскагаспадарчы абарот. План у 431 тыс. га будзе выкананы. Толькі мы пераразмяркуем рэсурсы для таго, каб гэтыя высокабальныя землі, якія размешчаны практычна ва ўсіх абласцях нашай рэспублікі, былі ўцягнутыя ў сельскагаспадарчы абарот. Гэтых зямель 45, 6 тыс. га», — сказаў Леанід Заяц.

Пераразмеркаванне рэсурсаў неабходна для правядзення культуртэхнічнай меліярацыі. «Пэўная частка зямлі будзе расчышчана ад хмязняку і заарана, а дзесьці неабходна пракласці дрэнаж. Усё гэта ў комплексе прывядзе да таго, што мы за бягучую пяцігодку поўнасцю пазбавімся дзікай расліннасці на нашых асушаных і неасушаных землях», — падкрэсліў старшыня Пастаяннай камісіі Савета Рэспублікі.

Ён указаў на тое, што выкананне гэтага плана сіламі меліярацыйных арганізацый, сельгасарганізацый забяспечыць большую контурнасць палёў, павялічыць прадукцыйнасць працы, знізіць матэрыяльныя затраты на апрацоўку глебы. «За мінулую пяцігодку мы правялі вялікі аб’ём работ. Самыя складаныя плошчы ўжо меліяраваны, прыведзены ў парадак. Таму мы можам пераразмеркаваць фінансавыя сродкі, якія выдзяляюцца ў агульным аб’ёме на меліярацыю. Гэта будзе выгадна сельгаспрадпрыемствам і землекарыстальнікам, а таксама мы зэканомім бюджэтныя сродкі», — адзначыў Леанід Заяц. Ён выказаў здагадку, што дадзеныя мерапрыемствы дазволяць зэканоміць каля 92 млн рублёў.

Як паведамлялася, 14 красавіка Прэзідэнт Беларусі Аляксандр Лукашэнка падчас рабочай паездкі ў Краснапольскі раён Магілёўскай вобласці заявіў аб неабходнасці мяняць тактыку меліярацыі.