У Гомелі рыхтуюцца да маштабнай рэканструкцыі шматпавярховага дома па вуліцы Косарава, які пацярпеў падчас выбуху бытавога газу ў снежні мінулага года.

Дэманціраваная частка будынка будзе адбудавана нанова. Над вытворчасцю вырабаў для аднаўлення пацярпелага пад’езда працуе завод буйнапанэльнага домабудавання. Гэта структурнае падраздзяленне ААТ «Гомельскі домабудаўнічы камбінат».

Перад вытворцамі буйнагабарытных панэляў была пастаўлена няпростая задача. Шматпавярховік на Косарава ўзведзены ў савецкі час, і таму для ўзнаўлення яго канструкцый, спраектаваных у 1980-я гады, неабходна было адаптаваць старыя інжынерныя рашэнні пад сучасныя будаўнічыя нормы і патрабаванні бяспекі, у тым ліку і нарматывы па трываласці і марозаўстойлівасці.

Сумесна з інстытутам «Гомельграмадзянпраект» Гомельскаму домабудаўнічаму камбінату ўдалося максімальна наблізіць новыя вырабы да іх зыходных параметраў і пры гэтым захаваць сучасныя стандарты. Сёння на прадпрыемстве для аднаўлення дома вырабляюць знешнія і ўнутраныя сценавыя панэлі, пліты перакрыцця, а таксама лоджыі і элементы, што іх падзяляюць.

— Наша галоўная задача — забяспечыць будоўлю якаснымі матэрыяламі, і мы ўжо справіліся з гэтай нетрывіяльнай задачай, — падкрэсліў начальнік фармовачнага цэха ААТ «Гомельскі домабудаўнічы камбінат» Дзяніс ЗАГОРАЦ. — На заводзе, у канструктарскім аддзеле, мы перапрацавалі ўсю тэхналагічную дакументацыю, каб адаптаваць яе пад нашу вытворчасць. Было няпроста, бо гэтыя вырабы значна адрозніваюцца ад таго, што мы выпускаем. У іх іншая таўшчыня і спецыяльная падвеска па перыметры. Але дзякуючы таму што наша вытворчая лінія гнуткая, можам фармаваць практычна любыя вырабы ў межах памеру паддона.

Над вытворчасцю элементаў пашкоджанага дома працуюць і спецыялісты цэха пліт перакрыцця. Дзякуючы таму, што тут ёсць адпаведнае абсталяванне і таксама дастаткова гнуткая канвеерная лінія, тэхнолагі сумесна з канструктарамі змаглі ў кароткія тэрміны распрацаваць праектную дакументацыю для вырабу бартавой аснасткі і адаптаваць яе пад існуючую вытворчую лінію. Гэта дазволіла аператыўна вырабіць неабходныя барты, замацаваць іх на наяўным абсталяванні і пачаць выпуск патрэбных канструкцый. У выніку тут былі выраблены першыя ўзоры пліт перакрыцця. Гэта адзін з асноўных відаў канструкцый, якія неабходны для таго, каб у максімальна кароткія тэрміны аднавіць пашкоджаныя элементы дома і пачаць мантаж.

У цэху вонкавых сценавых панэляў таксама ідзе вытворчасць адных з найважнейшых відаў прадукцыі, неабходных для аднаўлення дома. Тут рыхтуюцца трохслаёвыя жалезабетонныя канструкцыі з уцяпляльнікам усярэдзіне. Як патлумачылі спецыялісты, частка вырабаў выканана з выкарыстаннем розных нестандартных рашэнняў. Усё гэта робіцца для таго, каб максімальна хутка інтэграваць новыя элементы ў наяўны тэхналагічны працэс і забяспечыць выпуск матэрыялаў, неабходных для якаснага аднаўлення дома. На сёння поўнасцю сфарміраваны пералік усіх вырабаў, якія трэба вырабіць і выпрабаваць.

— Мы цалкам упэўнены ў сучасных матэрыялах і тэхналогіях, але пры запуску любога новага вырабу ў рэалізацыю неабходна пацвердзіць патрабаванні бяспекі тэхнічнага рэгламенту Рэспублікі Беларусь, — падкрэсліў намеснік генеральнага дырэктара ААТ «Гомельскі домабудаўнічы камбінат», дырэктар завода буйнапанэльнага домабудавання Раман ІВАШКЕВІЧ.

Прадпрыемствам разам з інстытутам «Гомельграмадзянпраект» было прынята рашэнне разам рыхтаваць узоры прадукцыі, каб акрэдытаваныя лабараторыі змаглі правесці шырокі комплекс выпрабаванняў па іх.

— На сёння па шэрагу пазіцый іспыты ўжо завершаны, атрыманы станоўчыя вынікі. Мы пацвердзілі ўсе паказчыкі па плітах перакрыцця, па вонкавых і ўнутраных сценавых панэлях. Былі праведзены выпрабаванні па разліку мяжы вогнеўстойлівасці па плітах перакрыцця, і таксама атрыманы станоўчы вынік. Гэта тыя віды канструкцый, якія спатрэбяцца ў першую чаргу для аднаўлення дома. Пасля таго як увесь комплекс выпрабаванняў будзе поўнасцю завершаны, вынікі і пратаколы накіруюць у адпаведныя інстанцыі, і мы атрымаем афіцыйнае пацвярджэнне, будзем канчаткова ўпэўнены ў надзейнасці і бяспецы нашых вырабаў, каб запусціць масавую вытворчасць, — рэзюмаваў Раман Івашкевіч.

Наталля КАПРЫЛЕНКА,

фота аўтара