Дэпутаты азнаёміліся з работай дзвюх медыцынскіх устаноў рэгіёна — абласнога перынатальнага цэнтра і ўніверсітэцкай клінікі, наведалі Гродзенскі дзяржаўны медыцынскі ўніверсітэт. 

«Пабываўшы ў медустановах і медуніверсітэце ў Гродне, мы ўбачылі, наколькі прасоўваецца наперад медыцына ў Беларусі, — такое меркаванне выказала намеснік старшыні Камісіі Парламенцкага сходу па ахове здароўя, старшыня Камітэта Савета Федэрацыі Федэральнага Сходу РФ Алена Пермінава. — На тыя пытанні, якія цяпер ёсць і ў медыцынскай супольнасці, і, самае галоўнае, у пацыентаў, мы як парламентарыі павінны вельмі хутка рэагаваць. Лічу, што ў першую чаргу павінны быць развіты першасныя звёны ў медыцыне. У РФ ідзе цяпер другі этап развіцця першаснага медыцынскага звяна, вылучаюцца вялікія сродкі для таго, каб і паліклінікі ў сельскай мясцовасці, у малых гарадах былі абсталяваныя, але самае галоўнае, каб былі падрыхтаваныя добрыя кадры, развіваецца настаўніцтва. Было карысна азнаёміцца, як у Беларусі працуе гэта добрая практыка».

Як адзначыла расійскі парламентарый, і ў Беларусі, і ў РФ ёсць добрыя практыкі. Задача камісіі — іх аб’ядноўваць і распаўсюджваць у абедзвюх краінах. Для гэтага вельмі карысна ўзаемадзеянне на ўзроўні рэгіёнаў. Цікавы таксама абмен навуковымі практыкамі, метадамі навучання студэнтаў. 

• «У нашага супрацоўніцтва ва ўсіх сферах вялікія перспектывы, і ў ахове здароўя яно развіваецца ўзаемакарысна, — падкрэсліў намеснік старшыні Гродзенскага аблвыканкама Віктар Пранюк. — Нашы медустановы добра абсталяваныя, у іх працуюць высокакваліфікаваныя кадры, у іх аказваецца сучасная тэхналагічная медыцынская дапамога людзям, дзе б яны ні жылі. Гэта ў поўнай меры датычыцца і грамадзян Расійскай Федэрацыі. Усё робіцца для таго, каб яны адчувалі: рускія людзі нам не чужыя. Наладжаны добрыя сувязі ГрДМУ з профільнымі ўніверсітэтамі Расіі, што таксама спрыяе павышэнню ўзроўню падрыхтоўкі кадраў для аховы здароўя».

Ролю і задачы дэпутацкага корпуса ў развіцці ўзаемасувязяў на карысць здароўя людзей, у тым ліку і ў рэгіёнах дзвюх дзяржаў, адзначыла старшыня Гродзенскага абласнога Савета дэпутатаў Алена Пасюта. 

Эфектыўнасць узаемадзеяння, у якім зацікаўлены абодва бакі, пазначыла першы намеснік міністра аховы здароўя Беларусі Алена Богдан. Яна падкрэсліла карысць абмену вопытам, узаемнага знаёмства з формамі арганізацыі аховы здароўя, новымі тэхналогіямі і адзначыла зацікаўленасць у прадаўжэнні цеснага ўзаемадзеяння ў гэтых напрамках. 

• Аб канкрэтных прыкладах выніковага супрацоўніцтва расказала начальнік Галоўнага ўпраўлення аховы здароўя Гродзенскага аблвыканкама Людміла Кеда. Яна таксама прадставіла пазітыўны вопыт рэгіёна ў стварэнні ўмоў для роўнага доступу да медыцынскіх паслуг усіх жыхароў, на аснове міжраённых цэнтраў, што забяспечваюць высокатэхналагічную дапамогу людзям, у якім бы населеным пункце яны ні пражывалі. Прыведзеныя ёю лічбы і факты прадэманстравалі і паспяховае развіццё абласных устаноў аховы здароўя, вялікія зрухі ў аказанні першаснай дапамогі насельніцтву. 

На пасяджэнні камісіі пад старшынствам яе кіраўніка, старшыні Пастаяннай камісіі Палаты прадстаўнікоў Нацыянальнага сходу Беларусі па ахове здароўя, фізічнай культуры, сямейнай і маладзёжнай палітыцы Валерыя Малашкі разгледзелі пытанні роўнага доступу грамадзян дзвюх краін да медыцынскіх паслуг, распрацоўкі праграмы Саюзнай дзяржавы «Інавацыйныя тэхналогіі і абсталяванне для вытворчасці прадуктаў спецыялізаванага дзіцячага харчавання на 2025-2028 гады», прапановы па рабоце пастаянна дзеючага семінара пры Парламенцкім сходзе Саюза Беларусі і Расіі ў маі — чэрвені 2026 года, пытанні прававой абароны медработнікаў у дзвюх дзяржавах. 

Дэпутаты падвялі вынікі рэалізацыі мерапрыемстваў Саюзнай дзяржавы ў сферы аховы здароўя за 2025 год, абмеркавалі распрацоўку новых. У мерапрыемстве прынялі ўдзел прадстаўнікі Пастаяннага камітэта Саюзнай дзяржавы, міністэрстваў аховы здароўя Беларусі і Расійскай Федэрацыі, Міністэрства РФ па справах грамадзянскай абароны, надзвычайных сітуацыях і ліквідацыі наступстваў стыхійных бедстваў, а таксама Гродзенскага аблвыканкама.