Лета заканчваецца, і з ім завяршаецца пік адпачынкаў. Некаторыя ўжо вярнуліся на свае працоўныя месцы, а іншым толькі трэба будзе гэта зрабіць. Незалежна ад таго, наколькі чалавек любіць сваю працу, падчас адпачынку многія прывыкаюць да свабоды, калі жыццё залежыць выключна ад уласных рашэнняў і планаў. Таму вяртанне да працоўнага рытму патрабуе ўсвядомленага падыходу. 

Псіхолаг раіць у апошнія дні адпачынку заняцца «тармажэннем». «Калі водпуск быў актыўным і насычаным уражаннямі, важна ў апошнія дні аднавіць рэжым сну, адпачынку і харчавання. Паспрабуйце класціся і ўставаць па працоўным графіку, нават калі вельмі не хочацца», — адзначыла яна. Ася Світава таксама рэкамендуе дадаць у гэтыя дні элементы прыемнага чакання. «Напрыклад, падрыхтуйце нешта прыемнае на апошні дзень водпуску», — дадала псіхолаг.

Каб спрасціць наладжванне рэжыму сну, варта ўвесці пэўныя рытуалы перад сном. «Гэта могуць быць простыя дзеянні: прыбраць гаджэты далей, прыняць душ або расслабляльную ванну, пачытаць кнігу. Галоўнае — стварыць рытуалы, якія дапамогуць вам супакоіцца, настроіцца на сон і легчы ў патрэбны час», — расказала яна.

Яшчэ адна карысная парада для тых, хто плануе водпуск: не прызначайце першы працоўны дзень на панядзелак. «У панядзелак наперадзе цэлы працоўны тыдзень, і  гэта можа быць складана. Рэкамендуецца выходзіць з водпуску, напрыклад, у сераду», — падзялілася Ася Світава.

Псіхолаг таксама перасцерагла ад спроб рэалізаваць усе задуманыя, але адкладзеныя планы ў апошнія дні адпачынку. Напрыклад, многія любяць у гэтыя дні хапацца за генеральную прыборку або рамонт. 

Для тых, хто ў апошнія дні сутыкаецца з трывогай, псіхолаг рэкамендуе загадзя зазірнуць у працоўныя чаты або стэлефанавацца з калегамі. «Мэта — каб выхад на працу не стаў нечаканасцю. Інфармацыя пра тое, што вас чакаюць на працы, дапаможа знізіць узровень трывожнасці», — расказала Ася Світава. 

Яна таксама падзялілася некалькімі псіхалагічнымі прыёмамі для палягчэння гэтага працэсу: «Сфакусуйцеся на пазітыве, успомніце, што вам падабаецца ў рабоце: зносіны з калегамі або цікавыя праекты. Не крытыкуйце сябе за нежаданне працаваць або за трывогу — гэта нармальная рэакцыя. Падтрымайце сябе унутраным памочнікам, скажыце сабе: «Так, цяпер мне няпроста, я ўваходжу ў рытм. Гэта патрабуе сіл, і гэта нармальна». 

Для тых, хто ўжо вярнуўся на працу і адчувае напружанне, Ася Світава рэкамендуе выкарыстоўваць усвядомлены падыход. «Можна прымяніць тэхніку майндфулнес: рабіць паўзы на 1-2 хвіліны, засяроджваючыся на дыханні і адчуваннях у целе. Гэта дапамагае перазагрузіць нервовую сістэму і прадухіліць назапашванне стрэсу. Важна таксама падтрымліваць актыўнасць на працягу працоўнага дня —  напрыклад, выйсці прагуляцца падчас абедзеннага перапынку ці схадзіць з калегам у кафэ. Актыўнасць - добры антыдэпрэсант», — дадала яна. 

Псіхолаг падкрэсліла: калі стан, пры якім кожную раніцу вы ідзяце на працу праз пераадоленне сябе, захоўваецца больш за два тыдні, варта звярнуцца да спецыяліста.