Праграма сацыяльна-эканамічнага развіцця Гродзеншчыны заснавана на прыярытэтах Праграмы сацыяльна-эканамічнага развіцця Беларусі, прынятай на Усебеларускім народным сходзе. Як адзначыла старшыня Гродзенскага абласнога Савета дэпутатаў Алена Пасюта, асаблівая ўвага ўдзелена дэмаграфічнай бяспецы, стварэнню камфортных умоў для жыцця насельніцтва і развіццю чалавечага патэнцыялу. У прыватнасці, плануецца будаўніцтва 142 тысяч квадратных метраў жылля па дзяржзаказе, а таксама больш за 600 квадратных метраў арэнднага. Развіццё транспартнай інфраструктуры і паляпшэнне якасці жыцця жыхароў рэгіёна таксама застаюцца ў прыярытэце. Будзе пракладзена 1,5 тысячы кіламетраў дарог ад аграгарадкоў да раённых цэнтраў.

Праграма шырокая, пад кожны прыярытэт распрацаваны план мерапрыемстваў, мэты амбіцыйныя, але рэгіён настроены на руплівую працу. Асаблівая ўвага будзе ўдзелена адукацыі, у тым ліку прафесійнаму навучанню і прафарыентацыйнай рабоце, а таксама развіццю кадравага патэнцыялу. Будуць рэалізаваны мерапрыемствы, накіраваныя на падтрымку спартсменаў. Для гэтага выдзелена каля аднаго мільёна рублёў. Спартсменам, уключаным у нацыянальную зборную, будуць прызначаны імянныя стыпендыі.

Несумненна, важны аспект праграмы сацыяльна-эканамічнага развіцця — рост сельскай гаспадаркі і інвестыцыйнай прывабнасці рэгіёна. Ужо створаны інвестыцыйны партфель, ён уключае больш за 100 ініцыятыў, якія будуць рэалізаваны ў найбліжэйшы час. Асаблівая ўвага будзе ўдзелена мадэрнізацыі прамысловых прадпрыемстваў і ўдасканаленню некаторых кірункаў вытворчасці. Таксама плануецца развіццё турыстычнага патэнцыялу рэгіёна, што адпавядае задачам, пастаўленым дзяржавай. Адным з важных крокаў стане аднаўленне работы Гродзенскага аэрапорта, які звяжа рэгіён з буйнымі гарадамі, такімі як Масква і Санкт-Пецярбург. Гэта зробіць рэгіён больш прывабным для турыстаў.

Акрамя таго, работа дэпутацкага корпуса будзе сканцэнтравана на рэалізацыі праектаў, накіраваных на падтрымку жанчын, шматдзетных сем’яў. Таксама ўпор будзе зроблены на фарміраванне патрыятычнага патэнцыялу моладзі. Гэта сумесны праект Гродзенскага абласнога Савета дэпутатаў і абласнога інстытута развіцця адукацыі «Настаўнік Белай Русі: урокі любові да Радзімы».

Асаблівая ўвага — кантролю за выкарыстаннем бюджэтных сродкаў і рэалізацыі дзяржаўных праграм. Традыцыйна працягнецца работа ў рамках конкурсу грамадзянскіх ініцыятыў.

— Было прынята рашэнне аб перадачы абласной асацыяцыі мясцовых Саветаў 28 грамадзянскіх ініцыятыў, якія прайшлі папярэдні адбор. Яны будуць рэалізаваны на працягу года і накіраваны на добраўпарадкаванне тэрыторый агульнага карыстання, стварэнне прастору для моладзі і сем’яў, падтрыманне сямейных каштоўнасцяў і стварэнне экалагічных сцежак, — расказала Алена Пасюта, а таксама падкрэсліла, што ініцыятывы накіраваны на паляпшэнне якасці жыцця.

Вераніка КАЗЛОЎСКАЯ
Фота «Гродзенскай праўды»