Урад зацвердзіў памеры матэрыяльнай дапамогі, якая будзе выплачана ветэранам Вялікай Айчыннай вайны і іншым катэгорыям грамадзян да Дня Перамогі.
Згодна з пастановай урада, выплата матэрыяльнай дапамогі будзе праводзіцца ў перыяд з 2 да 8 мая 2025 года ў наступных памерах:
5000 рублёў (+1 тысяча рублёў у параўнанні з 2024 годам)
— інвалідам і ўдзельнікам Вялікай Айчыннай вайны, асобам, якія прымалі ўдзел у баявых дзеяннях па абароне Айчыны да 3 верасня 1945 года.
2500 рублёў (+500 рублёў у параўнанні з 2024-м)
— асобам, узнагароджаным ордэнамі або медалямі СССР за самаадданую працу ў тыле ў гады Вялікай Айчыннай вайны;
— асобам, якія працавалі на аб'ектах супрацьпаветранай абароны, мясцовай супрацьпаветранай абароны, на будаўніцтве абарончых збудаванняў, марскіхбаз, аэрадромаў і іншых ваенных аб'ектаў у межах тылавых граніц дзеючых франтоў, на прыфрантавых участках чыгунак і аўтамабільных дарог;
— асобам, якія працавалі на прадпрыемствах, ва ўстановах і арганізацыях горада Ленінграда ў перыяд блакады з 8 верасня 1941 года да 27 студзеня 1944 года, і ўзнагароджаным медалём «За абарону Ленінграда», асобам, узнагароджаным знакам «Жыхару блакаднага Ленінграда».
1500 рублёў (+500 рублёў у параўнанні з 2024 годам)
— членам сем'яў ваеннаслужачых, партызан і падпольшчыкаў, якія загінулі (памерлі), прапалі без вестак у гады Вялікай Айчыннай вайны (сужэнцам, якія не ўступілі ў новы шлюб, дзецям — інвалідам з дзяцінства (у тым ліку ўсыноўленым, удачароным), іншым утрыманцам, якім устаноўлена павышэнне пенсіі па ўказанай прычыне ў адпаведнасці з заканадаўствам);
— былым вязням, у тым ліку непаўналетнім, фашысцкіх канцлагераў, турмаў, гета, а таксама былым непаўналетнім вязням іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны, якім устаноўлена павышэнне пенсіі па ўказанай прычыне ў адпаведнасці з заканадаўствам;
— інвалідам з дзяцінства з прычыны ранення, кантузіі, калецтва, звязаных з баявымі дзеяннямі ў перыяд Вялікай Айчыннай вайны альбо з наступствамі ваенных дзеянняў.
Як паведамілі ў Міністэрстве працы і сацыяльнай абароны, на выплату аднаразовай матдапамогі з рэспубліканскага бюджэту прадугледжана 12,9 мільёна рублёў.
