Нягледзячы на дажджлівае лета, уборачная кампанія — 2025 у самым разгары па ўсёй краіне. Бяспека ў гэты час знаходзіцца на асаблівым кантролі ратавальнікаў. Супрацоўнікі МНС загадзя рэалізавалі комплекс прафілактычных і арганізацыйных мерапрыемстваў па падрыхтоўцы да ўборачнай, але ж... Загаранні, на жаль, усё роўна здараюцца. Так, напрыклад, днямі ў Брагінскім раёне работнікі МНС выратавалі больш за 90 гектараў збожжавых культур. Таксама дзякуючы ратавальнікам у Стаўбцоўскім раёне нядаўна ўдалося захаваць амаль 40 гектараў пасеваў азімага жыта. Як падраздзяленні МНС сочаць за правядзеннем уборкі збожжа, што правяраюць інспектары ў палях і наколькі аграрыі ведаюць парадак дзеянняў у выпадку ўзнікнення пажару, даведалася карэспандэнт «Звязды», адправіўшыся на палі агракамбіната «Ждановічы», што на Міншчыне.
«Калі раптам што — гатовы спрацаваць аператыўна»
На месца прызначэння прыехала з самай раніцы. Дзень стаяў даволі сонечны, уборачная кампанія тут разгарнулася ў поўную сілу. Мая задача — паглядзець, чым жа займаюцца дзяжурныя супрацоўнікі МНС падчас жніва, таму па прыбыцці адразу накіравалася да спецтэхнікі, якая прызначана для барацьбы з пажарамі.
Тут пазнаёмілася з ратавальнікам Андрэем МАКАЕДАМ. «Рабочая змена, спадзяюся,сёння будзе спакойнай», — гаворыць ён. Аднак напагатове трэба быць пастаянна. «Працаваць мы пачынаем, калі стартуе праца ў камбайнераў, — расказвае мужчына. — Ва ўмовах пастаянна зменлівага надвор’я аб неабходнасці нясення дзяжурства ў канкрэтным месцы нам паведамляюць звечара. Але раніцай яшчэ робім папярэдні званок. Пры ўзнікненні якой-небудзь надзвычайнай сітуацыі наш абавязак — аператыўна яе ліквідаваць. «Што будзеце рабіць, калі раптам загарыцца камбайн? Колькі ў вас ёсць часу, каб выратаваць людзей і тэхніку?» — пытаюся я. «Хопіць пару хвілін. Трэба пад’ехаць да месца здарэння, аператыўна падаць рукаўную лінію, якая напоўнена вадой або пенай. Яна ў нас ужо сабраная, падключаная. На падрыхтоўку да тушэння дарма час марнаваць не прыйдзецца ў выпадку чаго».
Аляксандр КРУК — вадзіцель пажарнага аварыйна-выратавальнага аўтамабіля. Працуе на ўборачнай ужо 18-ты год. «Наша задача — бяспека падчас жніва. Мы не проста сядзім у машыне, як некаторыя могуць падумаць. Перад выездам правяраем наяўнасць усіх сродкаў. Па прыездзе на палі ва ўсе вочы сочым за сітуацыяй, трымаем сувязь з камбайнерамі. Калі раптам што — гатовы спрацаваць аператыўна».
Веды ў аграрыяў выдатныя
Набліжаўся абед. Праверыць выкананне правілаў бяспекі і правесці інструктаж на поле прыехала старшы інспектар сектара нагляду і прафілактыкі Мінскага раённага аддзела па надзвычайных сітуацыях Дар’я АЎРАЙЦЭВІЧ. «Пры правядзенні рэйдавых мерапрыемстваў на тэрыторыі палёў падчас уборачнай нам трэба пераканацца ў тым, што на камбайнах прысутнічаюць першасныя сродкі пажаратушэння, а менавіта парашковыя вогнетушыцелі, палотнішчы, рыдлёўкі. У тым ліку варта даведацца, ці засвоіў камбайнер праграму пажарна-тэхнічнага мінімуму для таго, каб пры ўзнікненні надзвычайнай сітуацыі ведаць, як дзейнічаць, як прымяняць першасныя сродкі пажаратушэння, каму дакладваць».
Таксама супрацоўнікі МНС правяраюць наяўнасць на турбінах іскрагасільнікаў. «Акрамя таго, на полі, дзе працуе тэхніка, павінна быць так званае прыкрыццё. Гэта можа быць трактар з вадой або іншыя машыны. Абавязкова правяраем наяўнасць трактара, які падчас загарання на полі зможа абараць і лакалізаваць месца, дзе здарылася надзвычайная сітуацыя», — расказвае Дар’я Уладзіміраўна.
Паводле слоў спецыяліста, МНС правярае яшчэ захоўванне і складзіраванне кармоў на тэрыторыі сельскагаспадарчых аб’ектаў.
«Што за тып вогнетушыльнага рэчыва? Колькі часу ў вас ёсць, каб патушыць загаранне? Як часта чысціцца камбайн ад саломы?» — пытаецца супрацоўнік МНС у камбайнера агракамбіната «Ждановічы» Святаслава ЛЮБЕЗНАГА. За плячыма ў мужчыны шматгадовы досвед працы на ўборачнай, аграрый падрыхтаваны на «выдатна». На ўсе пытанні адказаў, ведае, што айчынны гомсельмашаўскі камбайн, на якім ён працуе, аснашчаны чатырма вогнетушыцелямі. З лёгкасцю таксама расказвае, як імі скарыстацца. «Што датычыцца абдзімання жняяркі, ачысткі камбайна ад назапашанай саломы, яна ажыццяўляецца два разы на дзень у абавязковым парадку: раніцай і пасля абеду», — гаворыць Святаслаў.
У завяршэнні інструктажу інспектар МНС нацэліла работнікаў строга выконваць правілы пажарнай бяспекі падчас уборкі і нарыхтоўкі збожжавых. А калі ўсё ж нешта здарылася — аператыўна тэлефанаваць дзяжурнай брыгадзе.
Яна ВАЛАСАЧ
Фота МНС
Дарэчы
У мэтах папярэджання пажараў на аб’ектах уборкі, перапрацоўкі і захоўвання ўраджаю МНС загадзя рэалізаваны комплекс арганізацыйных і прафілактычных мерапрыемстваў па падрыхтоўцы да ўборкі збожжавых: з пачатку ўборачнай кампаніі работнікамі МНС абследавана больш за 8 тысяч аб’ектаў, задзейнічаных ва ўборачнай кампаніі. Органамі дзяржаўнага пажарнага нагляду з удзелам прадстаўнікоў органаў унутраных спраў і іншых зацікаўленых на месцах уборкі і захоўвання ўраджаю праводзяцца сумесныя рэйдавыя мерапрыемствы.
Асаблівая ўвага работнікаў органаў дзяржаўнага пажарнага нагляду ўдзяляецца пытанням забеспячэння супрацьпажарнага рэжыму, захавання мер пажарнай бяспекі пры ажыццяўленні тэхналагічных працэсаў, ведання работнікамі сваіх абавязкаў, парадку дзеянняў у выпадку ўзнікнення пажару, стану, наяўнасці і спраўнасці тэхнічных сродкаў супрацьпажарнай абароны, першасных сродкаў пажаратушэння, стану задзейнічанай ва ўборцы тэхнікі.
У бягучым годзе на аб’ектах уборкі, перапрацоўкі і захоўвання ўраджаю ў краіне адбылося 16 пажараў, што менш на 15,8 %, чым за аналагічны перыяд мінулага года, з іх 8 — у месцах перапрацоўкі збожжавых, 1 — на сельскагаспадарчай тэхніцы, 7 — збожжавыя культуры на корані.
Пры ліквідацыі пажараў на названых аб’ектах пажарнымі аварыйна-выратавальнымі падраздзяленнямі ўсяго ў краіне выратавана: 4 будынкі, 202,5 тоны збожжа, 358 гектараў пасеваў збожжавых.
